ဇန်န၀ါရီ ၂၁ ရက်ကပြုလုပ်သော အမျိုးသားလွှတ်တော် အစည်းအဝေးသို့ တက်ရောက်လာသော လွှတ်တော်ကိုယ်စားလှယ်များကိုတွေ့ရစဉ်
ခြောက်ပွင့်ဆိုင်တွေ့ဆုံဆွေးနွေးပွဲတွင် လွှတ်တော်ကိုယ်စားလှယ်များအနေဖြင့် ဆွေးနွေးစေလိုသည့် အချက်များကို ဇန်န၀ါရီ ၂၃ ရက်နောက်ဆုံးထားပြီးတင်ပြကြရန် အမျိုးသားလွှတ်တော်ဥက္ကဋ္ဌ ဦးခင်အောင်မြင့် က ဇန်န၀ါရီ ၂၁ ရက်ကပြုလုပ်သည့် အမျိုးသားလွှတ်တော်အစည်းအဝေးတွင် ညွှန်ကြား သည်။
အမျိုးသားလွှတ်တော်ဥက္ကဋ္ဌ ဦးခင်အောင်မြင့်က "ခြောက်ပွင့်ဆိုင် တွေ့ဆုံဆွေးနွေးရေးအဆိုနဲ့ပတ်သက်ပြီး နိုင်ငံတော်သမ္မတက ပြည်ထောင်စုလွှတ်တော်နာယကထံ သ၀ဏ်လွှာပေးပို့လာပါတယ်။ အဲဒီသ၀ဏ်လွှာ အရ ပြည်ထောင်စုလွှတ်တော်နာယက,က အမျိုးသားလွှတ်တော်ဥက္ကဋ္ဌထံ သ၀ဏ်လွှာထပ်မံပေးပို့ လာပါတယ်။ ပြည်ထောင်စုလွှတ်တော်နာယက,က ယင်းကိစ္စနဲ့ပတ်သက်ပြီး သဘောထားနဲ့ တွေ့ဆုံ ဆွေးနွေးပွဲ ဆောင်ရွက်လိုသည်ကို အလျင်အမြန်ပြန်ကြားပေးဖို့ သ၀ဏ်လွှာပို့လာပါတယ်" ဟုပြောကြား သည်။
"မိမိအနေနဲ့ တွေ့ဆုံဆွေးနွေးပွဲအား အမျိုးသားလွှတ်တော်ဥက္ကဋ္ဌအနေနဲ့တက်ရောက်မှာဖြစ်ပါတယ်။ လွှတ်တော်ကိုယ်စားလှယ်တွေအနေနဲ့ တွေ့ဆုံဆွေးနွေးပွဲမှာ အကြံပြုတင်ပြလိုသောအကြောင်းအရာ အချက်အလက်များကို မိမိထံသို့ ဇန်န၀ါရီ ၂၃ ရက်အရောက် စာဖြင့်ရေးသားပေးပို့ရန်ညွှန်ကြားပါတယ်။ လွှတ်တော်ကိုယ်စားလှယ်တွေထံကနေ ရရှိလာတဲ့အကြံပြုချက်တွေကို လိုအပ်သလိုဆောင်ရွက်ပြီး ခြောက် ပွင့်ဆိုင်ဆွေးနွေးပွဲမှာ ဆွေးနွေးသွားမှာဖြစ်ပါတယ်" ဟု အမျိုးသားလွှတ်တော်ဥက္ကဋ္ဌက ပြောကြားသည်။
ခြောက်ပွင့်ဆိုင်တွေ့ဆုံဆွေးနွေးရေးအဆိုတင်သွင်းခဲ့သူ ဦးမြင့်ထွန်းက "ပြည်သူလူထုရဲ့လိုလား တောင့်တချက်၊ နိုင်ငံရေးအင်အားစုတွေရဲ့ လိုလားတောင့်တချက်တွေကိုပြုစုခိုင်းတယ်။ လူထုလူတန်းစား ဆိုတာ အလုပ်သမား၊ လယ်သမားတွေပါပါတယ်။ လွှတ်တော်နှစ်ခုပြန်ပေါင်းပြီးဆွေးနွေးရမယ်။ ဘာတွေကိုဆွေးနွေးမယ်ဆိုတာတွေကို ဆွေးနွေးတိုင်းမှာ လူထုရဲ့လိုလားချက်၊ တောင့်တချက်တွေ ပါရမယ်။ အကြံပြုချက်တော့ပေးမှာပါ။ ဒါပေမဲ့ စဉ်းစားရဦးမယ်။ တစ်နိုင်ငံလုံးနဲ့ဆိုင်တာဆိုတော့လေ။ လွှတ်တော်မှာ တရားဝင်ပြောရမှာပြောဆိုတော့ အကြံဥာဏ်တွေယူရဦးမယ်" ဟုသုံးသပ်သည်။
"အခုလို အမျိုးသားလွှတ်တော်ဥက္ကဋ္ဌကြီးကလည်း ဖွင့်ပြောလာပြီဆိုတော့ တွေ့ဖို့သေချာသလောက် ရှိသွားပြီ။ ဘာဖြစ်လို့လဲဆိုတော့ လူထုလိုလားချက်တွေကိုပြန်ကြည့်လိုက်ရင် တွေ့စေချင်တယ်ဆိုတာ သိသာ တယ်လေ။ ပြည်ထောင်စုလွှတ်တော်ကချမှတ်ထားတဲ့အဆိုဖြစ်တယ်။ နိုင်ငံရဲ့ အမြင့်ဆုံး လွှတ်တော်က ချမှတ်ထားတာကို အောက်ကလွှတ်တော်တွေက ၁၂ ပွင့်တွေဘာတွေ လျှောက်လုပ်နေတဲ့ အခါကျတော့ ဆရာလုပ်ချင်တဲ့သဘောလေးတွေတွေ့ရတယ်။ ဒီခြောက်ယောက်က အမြဲတမ်း တွေ့နေ ရမယ်။ အမြဲထိတွေ့နေရမယ်။ ဒီလိုတွေ့နေမှပဲ အခက်အခဲတွေကိုဖြေရှင်းနိုင်မယ်လေ" ဟု ဦးမြင့်ထွန်းက ပြောကြားသည်။
ဒေါက်တာမြတ်ဥာဏစိုးက "အမျိုးသားလွှတ်တော်ဥက္ကဋ္ဌက ခြောက်ပွင့်ဆိုင်ကိုလက်ခံတယ်။ တက်ရောက် မယ်လို့ အဖြေထွက်သွားပြီ။ ဘယ်အချိန်ကျင်းပမယ်ဆိုတာတော့မသိဘူး။ ကျွန်တော်တို့ကတော့ အမျိုးသား ဒီမိုကရေစီ အဖွဲ့ချုပ်ကိုယ်စားလှယ်ဖြစ်တဲ့အတွက် သီးခြားအကြံပေးဖို့တော့မရှိပါဘူး။ သမ္မတရဲ့ သ၀ဏ်လွှာမှာလည်း ခြောက်ပွင့်ဆိုင်လုပ်သင့်တယ်။ ဘယ်နေ့ ဘယ်ရက်တွေ့မယ်ဆိုတာမပါဘူး။ တိတိကျကျ မပြောထားဘူး။ လွှတ်တော်ကတော့ပြတ်ပြတ်သားသားပဲ။ ပြည်ထောင်စုလွှတ်တော်က အတည်ပြုထားတာကို ဆက်လက်လုပ်ဆောင်မယ်ဆိုတဲ့သဘောကိုပြလိုက်တာပဲ" ဟုပြောကြားသည်။
ပြည်ထောင်စုလွှတ်တော်တွင် ခြောက်ပွင့်ဆိုင်တွေ့ဆုံဆွေးနွေးရေးအဆိုအား ၂၀၁၄ ခုနှစ် နိုဝင်ဘာ ၂၅ ရက် တွင် အမျိုးသားလွှတ်တော်ကိုယ်စားလှယ် ဦးမြင့်ထွန်းက နိုင်ငံတော်သမ္မတ၊ ပြည်သူ့လွှတ်တော်ဥက္ကဋ္ဌ၊ အမျိုးသားလွှတ်တော်ဥက္ကဋ္ဌ၊ အမျိုးသားဒီမိုကရေစီအဖွဲ့ချုပ်ဥက္ကဋ္ဌ၊ တပ်မတော်ကာကွယ်ရေးဦးစီးချုပ်၊ တိုင်းရင်းသားပါတီများ၏ ကိုယ်စားလှယ်တစ်ဦးတို့ တွေ့ဆုံဆွေးနွေးရန် အဆိုတင်သွင်းခဲ့ပြီး ပြည်ထောင်စု လွှတ်တော်ကအတည်ပြုခဲ့သည်။
Eleven Media Group
No comments:
Post a Comment