ဆန်ဂိုဒေါင်တစ်ခုတွင် တွေ့ရသည့် ဆန်အိတ်များ ( ဓာတ်ပုံ − ဂျေမောင်မောင်(အမရပူရ) )
ပြည်တွင်း၌ ဆန်ဈေး ဆက်တိုက် မြင့်တက်လာသော်လည်း တရုတ်ကုန်သည်များက ဈေးတိုး မပေး သဖြင့် မြန်မာပြည် အလယ်ပိုင်း (အညာဒေသ) မှ ဆန်များကိုသာ အဓိကထား တင်ပို့နေရကြောင်း မူဆယ် ဆန်စပါးလုပ်ငန်းအသင်းမှ သတင်းရရှိသည်။
ဧရာဝတီ၊ ပဲခူး၊ ရန်ကုန်တိုင်းဒေသကြီးမှ ဆန်များမှာ ပြည်တွင်းဈေးကွက်တွင် ဝယ်လိုအားကောင်း ကာ ဈေး ဆက် တိုက်မြင့်တက်လာပြီး တရုတ်ဈေးကွက်မှ ပေးသော ဈေးနှုန်းထက် ပိုများနေသည်။
ပြည်တွင်း ဈေးကွက်တွင် ဆန်ကြမ်း ရှယ်တစ်အိတ်လျှင် ကျပ် ၁၉,၀၀၀ ဝန်းကျင်ရှိနေကြောင်း ပြည်ပသို့ ဆန်တင်ပို့နေသော လုပ်ငန်းရှင် ဦးမျိုးသူရအေး ကပြောသည်။
လက်ရှိ မူဆယ်သို့ ဝင်ရောက်နေသော ဆန်းများမှာ ရွှေဘို၊ မတ္တရာ စသောမန္တလေးတစ်ဝိုက်နှင့် မကွေး၊ မင်းဘူး၊ ပွင့်ဖြူဘက်မှ ဆန်များဖြစ်ကြောင်း မူဆယ်ဆန်ကုန်သည်များကပြောသည်။
မူဆယ်သို့နေ့စဉ်ဆန်အဝင်မှာ အိတ်ရေလေးသောင်းဝန်းကျင် ရှိသော်လည်း တရုတ်နိုင်ငံသို့ ရောင်းချ ရသော ပမာဏမှာ အိတ်ရေ နှစ်သောင်းဝန်းကျင်သာ ရှိသည်။
ဇူလိုင် ၂၀ ရက်မှစတင်၍ မူဆယ်တွင် မိုးဆက်တိုက်ရွာပြီး လေးရက်ကြာရေကြီး မှုကြောင့် ဈေးကွက် မဖွင့်ရသဖြင့် ဂိုဒေါင်တွင်ထားစရာမရှိအောင် ဆန်အိတ်များ စုပုံနေခဲ့သည်။ ဂိုဒေါင်များတွင် ဆန်များပြည့်နေ သဖြင့် ကားများပေါ်တွင်သာ ညအိပ်ကြေးပေး၍ ထားရသည်ဟု သိရသည်။
မူဆယ်တွင် မိုးဆက်တိုက် ရွာသွန်းမှုကြောင့် တရုတ်နိုင်ငံသို့ ဆန်ရောင်းချမှုကို လေးရက်ခန့် ရပ်နားခဲ့ရပြီး လက်ရှိအချိန်တွင် တရုတ်နိုင်ငံက ပြန်ဝယ်လာသော်လည်း ဆန်ဂိုဒေါင်များမှာ လျော့နည်းမှုမရှိပေ။
မူဆယ်ဈေးကွက်တွင် မြန်မာဆန်ဈေးမှာ တည်ငြိမ်နေပြီး အမြင့်ဆုံး ဆန်ဈေး တစ်အိတ်လျှင် ၁၅၄ ယွမ်မှ ၁၅၈ ယွမ်ကြား ဈေးရှိကြောင်း သတင်းရရှိသည်။
7Day DAILY
No comments:
Post a Comment