Wednesday 20 January 2016

ကျူရှင်စနစ် ကြီးစိုးနေမှုပြဿနာ အဖြေရှာတွေ့နိုင်မှာလား

နေပြည်တော်တွင် သူငယ်တန်းသင်ရိုးညွှန်းတမ်းသစ်ဆိုင်ရာ ရှင်းလင်းဆွေးနွေးပွဲ ကျင်းပနေစဉ်။ (ဓာတ်ပုံ - ပညာရေးဝန်ကြီးဌာန)
‘‘ကျူရှင်စနစ်ပျောက်ဖို့ဆို ရင် အောင်ချက် အဓိကထားတဲ့ စာမေးပွဲစနစ်ကို ပြောင်းပေးရမယ်။ သင်ကြားနည်းစနစ် ပြောင်းပေးရမယ်။ အဲဒါဆိုရင် ကျုရှင်က အလိုလိုပျောက်သွားလိမ့်မယ်’’ဟု အခြေခံပညာဦးစီးဌာနမှ ဦးစီးအရာရှိတစ်ဦးက ပြောသည်။
စာမေးပွဲစနစ်တွင် မှတ်ဉာဏ်ကို အဓိကထားသည့် အလွတ်ကျက်နိုင်မှုကို အသားပေးသည့် သင်ကြားမှုများနှင့် အမှတ်ပေးအကဲဖြတ်နေခြင်းသည် ကျောင်းသားများအတွက် ကျူရှင်စနစ်ကို ပိုမိုအားကောင်းစေသည့် အချက်များဖြစ်သည်။

ပညာရေးစနစ် ပိုမိုတိုးတက်ကောင်းမွန်လာစေရန် အခြေခံပညာနှင့် အဆင့်မြင့်ပညာရေး ကဏ္ဍများတွင် ခိုင်မာစွာအမြစ်တွယ်နေသည့် ကျူရှင်စနစ်ပျောက်ကွယ်စေရေး ဦးစားပေးဆောင်ရွက်ရန် လိုအပ်လျက်ရှိသည်။

အခြေခံပညာကျောင်းများမှ ကျောင်းသားမိဘအများစုသည် မိမိတို့၏ကလေးကို ဆရာများ၏အလေးထားမှုရစေရန်နှင့် စာမေးပွဲတွင် အမှတ်ကောင်းကောင်းရစေရန် ကျူရှင်အပ်နှံသော အလေ့အထကျယ်ပြန့်နေသည်။

‘‘အဓိကကတော့ ကိုယ့်ကလေးကို ဂရုစိုက်စေချင်တယ်။ အခန်းထဲမှာလည်း အဆင့်ကောင်းကောင်းရစေချင်တယ်’’ ဟု ကြည့်မြင်တိုင်မြို့နယ်မှ ပဉ္စမတန်းကျောင်းသား၏ မိခင် ဒေါ်သင်းသင်းက ပြောသည်။

အခြေခံပညာကျောင်းများတွင် ကလေးဗဟိုပြုသင်ကြားနည်းစနစ်ကို ပြောင်းလဲကျင့်သုံးရန် စီစဉ်ခဲ့သော်လည်း ဆရာနှင့်ကျောင်းသား အချိုးမမျှတခြင်း၊ စာသင်ခန်းမလုံလောက်ခြင်းတို့ကြောင့် ဆရာဗဟိုပြုသင်ကြားနည်းစနစ်ကိုသာ ကျင့်သုံးနေရခြင်းသည် ကျူရှင်စနစ်ကို ပိုမိုအားကောင်းလာစေသည့် အချက်တစ်ချက်ဖြစ်ကြောင်း ပညာရှင်များက ထောက်ပြသည်။

အခြေခံပညာကျောင်းများတွင် ကျူရှင်စနစ်ပျံ့နှံ့လာစေသည့် အချက်တစ်ချက်မှာ ကျောင်းတွင်းစစ် အတန်းများတွင် ဆရာက စဉ်ဆက်မပြတ်အကဲဖြတ်ရခြင်းနှင့် ပညာရေးဌာနက အောင်ချက်ကောင်းမွန်စေရန် ကြိုးပမ်းမှုများကြောင့်ဖြစ်သည်ဟု လက်တွေ့သင်ကြားနေသည့် ဆရာ၊ ဆရာမများက ဆိုသည်။

‘‘စာမေးပွဲ အောင်ဖို့ကိုပဲ မိဘတွေက လိုချင်တယ်။ သက်ဆိုင်ရာဌာနက တာဝန်ရှိတဲ့သူတွေနဲ့ နိုင်ငံတော်အဆင့်လူကြီးတွေက စာမေးပွဲရဲ့အောင်မှတ်ကိုပဲ အဓိကထားခဲ့တယ်။ အဲဒီအတွက်ကို ဆရာတွေက မိဘတွေရဲ့ဆန္ဒနဲ့ ဌာနကတာဝန်ရှိသူတွေရဲ့ ဆန္ဒအရလိုက်လုပ်ရတာ’’ဟု အခြေခံပညာဦးစီးဌာနမှ အဆင့်မြင့်အရာရှိတစ်ဦးက ပြောသည်။

အသက်မွေးဝမ်းကျောင်းတက္ကသိုလ်များသို့ ဝင်ခွင့်ရရှိရန် တက္ကသိုလ်ဝင်စာမေးပွဲတွင် ရမှတ်ကောင်းမွန်နေရန် လိုအပ်သောကြောင့် အမှတ်ကောင်းကောင်းရရှိစေရန် ပြင်ပကျူရှင်များကို အားကိုးအားထားပြုလာကြသည်။

ယခင်က စာသင်ကျောင်းများတွင် ဆရာ၊ ဆရာမများသည် ကျောင်းဆင်းချိန်၌ ကျောင်းသူ၊ကျောင်းသားများအား မပြန်စေဘဲအချိန်ပို ဆက်လက်သင်ကြားခဲ့ခြင်း၊ စာမေးပွဲနီးကပ်ချိန်တွင် စနေ၊တနင်္ဂနွေ ကျောင်းပိတ်ရက်များ၌ပါ စာဆက်လက်သင်ကြားပေးခြင်းတို့ ပြုလုပ်ပေးခဲ့သည်ဟု မြောက်ဥက္ကလာပမြို့နယ်မှ အငြိမ်းစားကျောင်းအုပ်ဆရာကြီးက ပြောသည်။

‘‘ဆရာက စာမေးပွဲနီးပြီးဆို စနေ၊ တနင်္ဂနွေအိမ်ခေါ်သင်တာရှိတယ်။ ကျောင်းဆင်းချိန်မှာ အချိန်ပိုဆိုပြီးတော့ သင်ပေးတာမျိုး ရှိတယ်။ အခုနောက်ပိုင်းတော့ အဲဒီလိုတွေ မရှိကြတော့ဘူး’’ဟု ၎င်းက ပြောသည်။

ကျောင်းသားမိဘများသည် ကျောင်းသားများပြားသည့် စာသင်ခန်းအတွင်း၌ ၎င်းတို့၏ကလေးများအဆင့် ကောင်းမွန်စေရန်နှင့်
ဆရာ၏ ဂရုစိုက်မှုရရှိစေရန် ကျောင်းဆရာများထံတွင် ကျူရှင်အပ်နှံလေ့ရှိသည်။

‘‘အတန်းပိုင်ဆီမှာ မထားဘဲအပြင်ဆရာဆီမှာ ထားတာပဲဖြစ်ဖြစ်၊ တခြားဆရာဆီမှာထားတာပဲဖြစ်ဖြစ် ကလေးကို ဂရုမစိုက်တာမျိုး၊စာမေးပွဲမှာ အမှတ်မကောင်းတာမျိုး ဖြစ်တယ်။ တချို့ကျောင်းတွေမှာ တော်တော်ဆိုးတယ်’’ဟု ဒဂုံမြို့နယ်နေ တတိယတန်း ကျောင်းသားမိခင် ဒေါ်သိင်္ဂီက ပြောသည်။ အခြေခံပညာကျောင်းများတွင် ကျူရှင်စနစ်ကြီးထွားလာသဖြင့်
ငွေကြေးတတ်နိုင်သော ကျောင်းသားမိဘများသည် အစိုးရအသိအမှတ်ပြု ဖွင့်လှစ်ခွင့်ရရှိထားသော ကိုယ်ပိုင်ကျောင်းများသို့ ပြောင်းလဲရွေးချယ်လာကြသည်။

‘‘ကျူရှင်တော့ မသင်ရတော့ဘူး။ ဒါပေမဲ့လစာက အစိုးရကျောင်းထက် ပိုကုန်တယ်’’ဟု ဒဂုံမြို့သစ်မြောက်ပိုင်းမြို့နယ်ရှိ ပထမတန်းကျောင်းသား၏မိခင် ဒေါ်ယဉ်ယဉ်က ပြောသည်။ အခြေခံပညာကဏ္ဍတွင် ၁၉၉၀ ဝန်းကျင်မှ စတင်၍ ကျုရှင်သင်ကြားမှုသည် အားကောင်းလာခဲ့ပြီး အခြေခံပညာဦးစီးဌာနက သတိပေးအရေးယူမှုများ ပြုလုပ်ခဲ့သလို ကျူရှင်မသင်ရန် ညွှန်ကြားချက်များထုတ်ပြန်ခဲ့သည်။

‘‘ကျူရှင်မသင်ဖို့အတွက် နှစ်စကတည်းက တစ်ခါတည်းညွှန်ကြားချက်ထုတ်ထားတယ်။ အဲဒါကိုသင်တယ်၊ ပြုတယ်ဆိုရင် သက်သေအထောက်အထားနဲ့ လာတိုင်လို့ရတယ်။ စစ်ဆေးအရေးယူမှုတွေ လုပ်ပြီးတော့ ထိုက်သင့်တဲ့ အပြစ်ဒဏ်ကို ပေးသွားမယ်’’ဟု အခြေခံပညာဦးစီးဌာနမှ အဆင့်မြင့်အရာရှိတစ်ဦးက ပြောသည်။

အခြေခံပညာကျောင်းများတွင် ကျောင်းသူ၊ ကျောင်းသားများ၏ တီထွင်ဖန်တီးမှုနှင့် အသုံးချနိုင်မှုကို ဖော်ထုတ်နိုင်သည့် သင်ကြားနည်းစနစ်ဖြင့် သင်ကြားသွားခြင်းနှင့် အမှတ်ပေးအကဲဖြတ်ခြင်းတို့ကို ကျင့်သုံးမည်ဆိုပါက ကျူရှင်စနစ် ပပျောက်နိုင်မည်ဟုပညာရေးလောကမှ ပညာရှင်များက အကြံပြုသည်။

ထို့အပြင် အခြေခံပညာကျောင်းများရှိ ဆရာ၊ ဆရာမများ၏ လူနေမှုဘဝများ မြင့်မားလာစေရေး လစာများမြှင့်တင်ပေးခြင်း၊အခြေခံလိုအပ်ချက်များ ဖြည့်တင်းဆောင်ရွက်ပေးပါက ကျူရှင်စနစ်ပျောက်ကွယ်သွားနိုင်ဖွယ်ရှိနေသည်။

‘‘သူက စနစ်တစ်ခု အကောင်အထည်ဖော်မှုရဲ့ အားနည်းချက်ကြောင့်မို့လို့ ထွက်ပေါ်လာတဲ့ ရလဒ်တစ်ခုပဲ။ စနစ်တစ်ခုကို ထိထိရောက်ရောက် အကောင်အထည်ပေါ်အောင်လုပ်လိုက်ရင် ကျူရှင်က အလိုလိုပျောက်သွားလိမ့်မယ်။ ချက်ချင်းကြီးတော့ မဖြစ်နိုင်ဘူး’’ဟု အခြေခံပညာဦးစီးဌာနမှ အဆင့်မြင့်အရာရှိတစ်ဦးက ပြောသည်။

ပညာရေးဝန်ကြီးဌာနက စတင်ပြောင်းလဲကျင့်သုံးရန် စီစဉ်နေသည့် သူငယ်တန်းအပေါင်း ၁၂တန်း (KG+12) ပညာရေးစနစ်သည် စဉ်းစားတွေးခေါ်မှုကို ဦးစားပေးသည့် သင်ကြားနည်းစနစ်များသို့ ပြောင်းလဲသင်ကြားတော့မည် ဖြစ်သည်။

၂၀၁၆-၁၇ ပညာသင်နှစ်တွင် စတင်အသုံးပြုဖွယ်ရှိသည့် သူငယ်တန်း၏ သင်ရိုးညွှန်းတမ်းအသစ်၌ အလွတ်ကျက်သင်ကြားမှု မရှိတော့ဘဲ ကလေးငယ်၏ ဘက်စုံဖွံ့ဖြိုးရေးကို ဦးတည်သည့် သင်ခန်းစာများ၊ လေ့ကျင့်ခန်းများနှင့် စစ်ဆေးအကဲဖြတ်ခြင်းတို့ ဝင် လာမည်ဟု ဆိုသည်။

၂၀၁၅ အထွေထွေရွေးကောက်ပွဲတွင် အနိုင်ရရှိခဲ့သည့် အမျိုးသားဒီမိုကရေစီအဖွဲ့ချုပ်၏ ရွေးကောက်ပွဲကြေညာစာတမ်း၌ ပညာရေးကဏ္ဍတွင် ‘‘ကျောင်းသား၊ မိဘနှင့် ရပ်ကျေးအပေါ် ဝန်ထုပ်ဝန်ပိုးမဖြစ်စေသော ထိရောက်သည့် ပညာရေးဝန်ဆောင်မှု ဖြစ်စေရန် ဆောင်ရွက်မည်’’ဟု ဖော်ပြထားသည်။

ဒေါ်အောင်ဆန်းစုကြည်ဦးဆောင်သော အစိုးရသစ်အနေဖြင့် အဘက်ဘက်၌ နိမ့်ကျနေသော မြန်မာ့ပညာရေးအဆင့်အတန်းကို ပြန်လည်မြှင့်တင်ရာတွင် ကျူရှင်စနစ်ကြီးစိုးနေမှုကိုလည်း ကိုင်တွယ်ဖြေရှင်းရန် လိုအပ်နေသည်။

7Day Daily

No comments:

Post a Comment