Wednesday 20 January 2016

ရေရှားမယ် ကြိုပြင်ထားပါ

ယခုနှစ်သည် အယ်လ်နီညိုရာသီဥတုနှစ်ဖြစ်၍ ရာသီဖောက်ပြန်ခြင်းများ ကြုံတွေ့ရပေမည်။ (ဓာတ်ပုံ − ဂျေမောင်မောင် (အမရပူရ))
ယခုနှစ်သည် အယ်လ်နီညို ရာသီဥတုကို ပြင်းထန်စွာခံစားရ မည့်နှစ်ဟု ပညာရှင်များက ခန့်မှန်းထားကြပြီး အယ်လ်နီညိုအား ကောင်းမှုကြောင့် မိုးနည်းကာအပူဒဏ်ကို ဆိုးရွားစွာခံစားရတော့မည်ဖြစ်သည်။
အယ်လ်နီညို ရာသီဥတုသည် ၂၀၁၅ အောက်တိုဘာကတည်းက အားကောင်းခဲ့ရာမှ ၂၀၁၆ ဇွန်လအထိ အကျိုးသက်ရောက်မှုရှိနိုင်သည်ဟု မိုးလေဝသနှင့်ဇလဗေဒပညာရှင်များက ခန့်မှန်းထားကြသည်။ လက်ရှိအချိန်တွင် အယ်လ်နီညိုရာသီဥတုမှာ ကမ္ဘာ့သမိုင်း၌ အားအကောင်းဆုံးအဆင့်သို့ ရောက်ရှိနေလေသည်။

အယ်လ်နီညိုရာသီဥတုအကျိုးဆက်အဖြစ် မုတ်သုံမိုးဝင်ရောက်မှုနောက်ကျခြင်း၊ ထွက်ခွာမှုစောခြင်း၊ မိုးရွာသွန်းမှုနည်းပါးခြင်း၊ ပူပြင်းခြောက်သွေ့မှုများလွန်ကဲခြင်း စသည့်အချက်များကြောင့် ရေပြဿနာအခက်အခဲကြုံတွေ့နိုင်သည်ဟု ပညာရှင်များကသတိ ပေးထားသည်။

‘‘အယ်လ်နီညိုနှစ်ဆိုရင် ခြောက်သွေ့ပြီး ပူနွေးတဲ့နှစ်ကို ဖြစ်စေတာ။ အယ်လ်နီညိုအားကောင်းရင် ကောင်းသလောက် အပူချိန်များမယ်။ မိုးကလျော့မယ်။ ဒီကြားထဲ ဒီနှစ်က ပူပြင်းခြောက်သွေ့တဲ့နှစ်ဆိုတော့ ရေရှားပါးမှုဟာ အဆိုးဆုံးဖြစ်လာနိုင်တယ်’’ဟု မိုးလေဝသပညာရှင် ဒေါက်တာထွန်းလွင်က ပြောကြားသည်။

ပုံမှန်အားဖြင့် မြန်မာနိုင်ငံအလယ်ပိုင်းဒေများသည် မိုးခေါင်ရေရှားပါးမှုဒဏ်ကို နှစ်စဉ်ခံစားနေရပြီး ရန်ကုန်တိုင်းဧရိယာရှိ မြို့နယ်အချို့တွင်ပင် နွေရာသီရောက်သည်နှင့် ရေရှားပါးမှုပြဿနာများ နှစ်စဉ်ကြုံတွေ့နေရသည်ဖြစ်ရာ အယ်လ်နီညိုကြောင့် ယခုနှစ်၌ ရေရှားပါးမှုဒဏ်ကို ယခင်ထက် နှစ်ဆတိုးကာ ရင်ဆိုင်ရတော့မည် ဖြစ်သည်။

‘‘ဒီနှစ်အယ်လ်နီညိုရာသီဥတုက ၉၈ တုန်းကလိုပဲ ပြင်းနိုင်တယ်လို့ သတိပေးထားတယ်။ အဲဒီကာလတုန်းကဆို ဆရာတို့လည်းခံခဲ့ရတာပဲ။ အခုချိန်မှာဆို အဲဒီတုန်းက သစ်တောအခြေအနေကလည်းမရှိတော့ဘူးဆိုတော့ မြေအောက်ရေရော၊ မြေပေါ်ရေရောခန်းခြောက်လာပြီး ရေကတော့ ရှားမှာပဲ’’ဟု မကြာမီကြုံရတော့မည့်အခြေအနေကို စိမ်းလန်းအမိမြေဖွံ့ဖြိုးတိုးတက်ရေးအသင်း မန်နေဂျင်းဒါရိုက်တာ ဦးဝင်းမျိုးသူက ပြောသည်။

မြန်မာနိုင်ငံတွင် တစ်ချိန်က ရေချိုအရင်းအမြစ်များအလွန်ပေါများခဲ့သော်လည်း သစ်တောပြုန်းတီးမှုများ၊ ရာသီဥတုပြောင်းလဲမှုများကြောင့် ရေအရင်းအမြစ်၏ အဓိကကျသော မြစ်ချောင်းအင်းအိုင်များလည်း ခန်းခြောက်လာပြီ ဖြစ်သည်။

သစ်တောပြုန်းတီးမှုများ၏ အကျိုးဆက်များအဖြစ် မြန်မာနိုင်ငံအနှံ့အပြားတွင် မိုးနည်းပါးခြင်းနှင့် မြစ်ချောင်းများ အတွင်းသို့ ရေဝင်ရောက်မှုလျော့နည်းခြင်း၊ သစ်တောသစ်ပင်များသည် မိုးရေကိုစုပ်ယူ၍ မြေအောက်ရေအဖြစ် ပြောင်းလဲသိုလှောင်စေနိုင်သော အစွမ်းရှိသဖြင့် သစ်တောသစ်ပင်များ ရှားပါးလာမှုနှင့်အတူ မြေအောက်ရေများ ခန်းခြောက်ခြင်း၊ အပူချိန်မြင့်မားလာခြင်းတို့ကြောင့်သဘာဝရေထွက်များခန်းခြောက်လာခဲ့သည်။

‘‘နဂိုကမှ ရေရှားရတဲ့အပြင် အယ်လ်နီညိုကြောင့် ရေပြတ်လပ်တဲ့ဒုက္ခက ပိုများလာမယ်။ ရေကြီးရေလျှံမှုတွေလည်း ဖြစ်လာနိုင်တယ်။ ဒီတော့လူတွေက ရေကိုချွေတာဖို့လိုမယ်’’ဟု Myanmar Environment Institute မှ ပါမောက္ခ ဦးမောင်မောင်အေးက သတိပေးစကားဆိုသည်။

ရေရှားပါးမှုပြဿနာသည် ရာသီဥတုပြောင်းလဲခြင်း၏ အဓိက ဆိုးမွေဖြစ်ပြီး အကျိုးဆက်အဖြစ် သောက်သုံးရေရှားပါးမှုအပြင် စိုက်ပျိုးရေရှားပါးမှုကိုပါ ကြုံတွေ့နေရသည်။ အထူးသဖြင့် အပူချိန်မြင့်မားသော နွေရာသီတွင် ရေရှားပါးမှုပြဿနာကို ပိုမိုဆိုးရွားစွာ ကြုံတွေ့ရလေ့ရှိပြီး မြန်မာနိုင်ငံအလယ်ပိုင်းဒေသများဖြစ်သည့် မကွေး၊ မန္တလေး၊ စစ်ကိုင်း၊ ပဲခူး စသည့်ဒေသများ၌ နှစ်စဉ်ရေပြတ်လပ်မှုဒဏ်ခံစားနေရသည်။

ရေရှားပါးမှုပြဿနာကို ပြေလည်စေရန် မြန်မာနိုင်ငံအနှံ့အပြားတွင် ဆည်မြောင်းတာတမံများဆောက်လုပ်ခြင်း၊ မြစ်ရေတင်စီမံကိန်းများ အကောင်အထည်ဖော်ခြင်း စသည်တို့ပြုလုပ်ခဲ့ကြသော်လည်း စီမံကိန်းများ၏ အကျိုးကိုမူ ပြည်သူများထိရောက်စွာ ခံစားရခြင်းမရှိခဲ့ကြောင်း ပညာရှင်များက ထောက်ပြကြသည်။ ဆည်မြောင်းတာတမံများ နေရာအနှံ့အပြားတွင် ဆောက်လုပ်ခဲ့သော်လည်း အရည်အသွေးမမီခြင်းနှင့် စီမံခန့်ခွဲမှု အားနည်းခြင်း၊ အဓိကအသုံးပြုမည့် လယ်ယာများသို့ မရောက်ရှိဘဲ မြောင်းဘေးဝန်းကျင်တွင်သာ အသုံးပြုနိုင်ခြင်း၊ စနစ်တကျတည်ဆောက်ခဲ့ခြင်းမဟုတ်သဖြင့် ရေဝပ်ဧရိယာအတွင်းရှိ ကျေးရွာများ၊ လယ်ယာများ၊ အဆမတန်ပျက်စီးဆုံးရှုံးခြင်း၊ ဆည်တာတမံများ၏ အောက်ခြေဒေသများတွင် ရေရှားပါးခြင်းတို့ ဖြစ်ပေါ်လျက်ရှိသည်။

ကုလသမဂ္ဂ၏ ၂၀၁၁ စာရင်းများအရ မြန်မာနိုင်ငံသည် ကမ္ဘာ့ရေအရင်းအမြစ် အကြွယ်ဝဆုံးနိုင်ငံများစာရင်းတွင် နံပါတ်(၁၄) ချိတ်ပြီး ပြန်ပြည့်မြဲရေပမာဏ ၁၆၈ကုဗမီတာပိုင်ဆိုင်ထားသည်။ ရေအရင်းအမြစ်များစွာ ရှိနေသေးသော်လည်း
မြန်မာနိုင်ငံ၏ နေရာဒေသအချို့တွင် ရေပြတ်လပ်သည့်ပြဿနာများ၊ ရေရှားပါးသည့် ပြဿနာများ ကြုံတွေ့နေရဆဲဖြစ်သည်။

‘‘တကယ်တမ်းက မြန်မာက ရေပေါတဲ့နိုင်ငံ။ တချို့နေရာတွေမှာ ရှားပြီးတချို့နေရာတွေမှာ ပေါနေတာပေါ့။ နေရာအလိုက် ပြောင်းလဲတယ်။ ဒါကိုသိပြီး စီမံခန့်ခွဲဖို့လိုတယ်’’ဟု ရေဆိုင်ရာအကြံပေးအဖွဲ့ အမျိုးသားအဆင့် ရေအရင်းအမြစ်ကော်မတီ အတွင်းရေးမှူး ဒေါက်တာ ဒေါ်ခင်နီနီသိန်းက ပြောသည်။

ထို့အပြင် ၂၀၁၅ ဇွန်လမှစတင်ကာ မြန်မာနိုင်ငံဒေသအနှံ့အပြားတွင်ဖြစ်ပွားခဲ့သည့် မိုးသည်းထန်စွာရွာသွန်းမှုများကြောင့် ရေကြီးနစ်မြုပ်မှုများဖြစ်ပေါ်ခဲ့ရာ မြန်မာနိုင်ငံ၏ အပူပိုင်းဒေသများဖြစ်သည့် မကွေးတိုင်းနှင့် စစ်ကိုင်းတိုင်းတို့တွင်လည်း ရေဘေးဒဏ် ခံစားခဲ့ရသည်။ ရေဘေးကြောင့် ရေတွင်း၊ ရေကန်များလည်း ပျက်စီးခဲ့၍ ယင်းဒေသများတွင်လာမည့် ရေရှားကာလများ၌ သတိထားရန်လိုကြောင်း ၎င်းတို့က ဆိုသည်။

အယ်လ်နီညိုရာသီဥတုကြောင့် အပူဒဏ်နှင့် ရေရှားပါးပြတ်လပ်မှုအန္တရာယ်များ ရင်ဆိုင်ကြုံတွေ့ရမည်ဖြစ်ရာ ရေစုဆောင်းခြင်း၊ ဖြန့်ဖြူးခြင်း၊ ရေအရင်းအမြစ်ရှာဖွေစုဆောင်းခြင်းများ ပြုလုပ်ထားရန်လိုကြောင်း ပညာရှင်များက သတိပေးပြောကြားထားသည်။

မကြာမီကာလတွင် အစိုးရသစ်အဖြစ် တာဝန်လွှဲပြောင်းယူမည့် အမျိုးသားဒီမိုကရေစီအဖွဲ့ချုပ်ကလည်း အယ်လ်နီညိုအကျိုးဆက်ကြောင့် သောက်သုံးရေရှားပါးပြတ်လပ်မှုများ ဖြစ်ပေါ်လာနိုင်သည့်အတွက် ရေရှားပါး ပြတ်လပ်ချိန်တွင်
ပြည်သူများအား သောက်သုံးရေများအချိန်နှင့်တစ်ပြေးညီ ကူညီပံ့ပိုးနိုင်ရန် ကြိုတင်ပြင်ဆင်မှု ပြုလုပ်ထားရေး တစ်နိုင်ငံလုံးအမျိုးသားဒီမိုကရေစီဖွဲ့ချုပ်ရုံးများသို့ ညွှန်ကြားထားသည်။

အပူပိုင်းဒေသများတွင် ရေကြီးနစ်မြုပ်မှုကြောင့် ပျက်စီးဆုံးရှုံးသွားသည့် ရေတွင်းရေကန်များကို ပြန်လည်ပြုပြင်ထားပြီး ပညာရှင်များသတိပေးချက်အတိုင်း ရေရှားပါးမှု အန္တရာယ်ကြုံတွေ့နိုင်သည့်ဒေသများအတွက် ရေဖြန့် ဖြူးပေးနိုင်ရန် ကြိုတင်လုပ်ဆောင်ထားကြောင်း ရေရရှိရေးအဓိက လုပ်ဆောင်နေသည့် ကျေးလက်ဒေသဖွံ့ဖြိုးတိုးတက်ရေးဦးစီးဌာန လက်ထောက်ညွှန်ကြားရေးမှူး ဒေါက်တာဝင်းမင်းဦးက ပြောသည်။

‘‘ပညာရှင်တွေကလည်း သတိပေးထားတယ်ဆိုတော့ ပညာပေးတာတွေ၊ ရေဖြန့်ဝေရေးအဖွဲ့တွေဖွဲ့ပြီးလုပ်နေပါတယ်။ တစ်နိုင်ငံလုံးအတိုင်းအတာနဲ့ လုပ်နေတယ်ဆိုပေမယ့် အပူပိုင်းဒေသတွေနဲ့ ရခိုင်ပြည်နယ်တွေက ရွာတွေကိုတော့ အဓိကထားပြီးလုပ်နေတယ်’’ဟု ဒေါက်တာဝင်းမင်းဦးက ပြောသည်။

ရေရှားပါး ပြတ်လပ်ချိန်အတွက် ကြိုတင်ကာ ရေစုဆောင်းခြင်း၊ ဖြန့်ဖြူးခြင်း စသည့်ရေတို စီမံကိန်းများအပြင် သစ်တောများ ပြန်လည်ထိန်းသိမ်းခြင်း၊ မိုးတွင်းကာလတွင် ရွာသွန်းသည့် မိုးရေများကို အလဟဿမဖြစ်စေဘဲ စုဆောင်းနိုင်သည့် မိုးရေခံစီမံကိန်းကို ရေရှည်စီမံကိန်းအဖြစ် လုပ်ဆောင်ရန်လိုအပ်ကြောင်း ပညာရှင်များက ဆိုသည်။

‘‘တီချယ်တို့ ပြောနေတာ ကြာပါပြီ။ မိုးရေခံစီမံကိန်းကို လုပ်မယ်ဆိုပြီးတော့။ တချို့က ပေါ့ပေါ့လေးပဲတွေးတယ်။ ဘာခက်လဲဆိုပြီးတော့ မိုးရေခံစီမံကိန်းဆို တချို့က ခေါင်မိုးကကျတဲ့ရေပဲ ထင်ကြတယ်။ လယ်ကွင်းမှာကျတာ၊ ကျောက်တောင်မှာကျတာကို တစ်ဖက်ယပ်ဆည်ကြီးလုပ်ထားလို့ရတယ်လေ။ မြေကြီးထဲကို စိမ့်သွားလို့ရှိရင် အဲဒီမြေကြီးထဲကိုလိုက်ပြီး မြေတာတမံဆောက်လို့ရတယ်။ ဒါကိုမြေအောက်ရေကာတာလို့ ခေါ်တယ်။ ရေရှည်လုပ်နိုင်တာတွေအများကြီးပဲ’’ဟု ဒေါက်တာဒေါ်ခင်နီနီသိန်းက ဆိုသည်။

နွေရာသီတွင် မဖြစ်မနေကြုံတွေ့ရမည့် ရေရှားပါးမှုပြဿနာအတွက် သက်ဆိုင်ရာဌာနများက ရေအရင်းအမြစ် ရှာဖွေထားခြင်း၊ ရေကြိုတင်စုဆောင်းခြင်းများ ပြုလုပ်ထားရန်လိုသကဲ့သို့ ပြည်သူများကလည်း ရေကိုချွေတာသုံးစွဲရန် လိုအပ်ကြောင်း သတိပေးထားသည်။ ‘‘ရာသီဥတုပြောင်းလဲခြင်းမှာ ရေပြဿနာကလည်း ပါနေမှာပဲဆိုတော့ ရေရှားပါးမှုက ရှေ့လျှောက်ကြုံရမယ့်ပြဿနာပဲ။ ဒီတော့ ရေနဲ့ပတ်သက်ပြီး ရေရှည်မှာ ကြိုပြင်ထားဖို့လိုမယ်’’ဟု ဦးဝင်းမျိုးသူက ဆိုသည်။ ။

7Day Daily

No comments:

Post a Comment