Friday 24 April 2015

အာဆီယမ်လူထုဖိုရမ် ကျင်းပနေ

မလေးရှားနိုင်ငံ ကွာလာလမ်ပူမြို့မှာ ကျင်းပမယ့် အာဆီယံ အဖွဲ့ရဲ့ ထိပ်သီး ညီလာခံ မတိုင်ခင် အာဆီယံ နိုင်ငံတွေက လူမှုအခြေပြု အရပ်ဖက် အဖွဲ့အစည်း တွေဟာ ASEAN People’s Forum လို့ ခေါ်တဲ့ ဆွေးနွေးပွဲတွေ ကျင်းပနေပါတယ်။

မြန်မာနိုင်ငံက အရပ်ဖက် အဖွဲ့အစည်း အသီးသီးကို ကိုယ်စား ပြုတဲ့ လူ ၁၀၀ လောက်လည်း တက်ရောက် နေပါတယ်။

အဲဒီ့ ဖိုရမ်မှာ အမျိုးသမီး အခွင့်အရေး၊ ငြိမ်းချမ်းရေး၊ ဘာသာပေါင်းစုံ ချစ်ကြည်ရေး နဲ့ ဒုက္ခသည်ဆိုင်ရာ အကြောင်းချင်းရာတွေ စတဲ့ ခေါင်းစဉ် ပေါင်းစုံကို ဆွေးနွေး ဖလှယ်ကြတာ ဖြစ်တယ်လို့ ရန်ကုန်မြို့ အခြေ စိုက် Women Peace Network (Arakan) ဆိုတဲ့ ရိုဟင်ဂျာ အမျိုးသမီးတွေ အများစု ပါဝင်တဲ့ ပဋိပက္ခနဲ့ ခွဲခြား ဆက်ဆံမှု လျှော့ချဖို့ ရည်ရွယ်တဲ့ အဖွဲ့ကို တည်ထောင်သူ မဝေဝေနုက ဘီဘီစီကို ပြောပါတယ်။

အာရှတိုက်ထဲက ဒုက္ခသည်တွေ အရေးကို ဖြေရှင်းဖို့ အချိန်တန်ပြီ ဆိုတဲ့ ခေါင်းစဉ်နဲ့ ဆွေးနွေးရာမှာ ကိုယ်တိုင်ပါဝင်ခဲ့တဲ့ မဝေဝေနုက ဒီ အရေး ကိုင်တွယ်ရာမှာ အရပ်ဖက် အဖွဲ့အစည်းတွေ အနေနဲ့ အစိုးရအပေါ် ပြဿနာရဲ့ အရင်းအမြစ်ကို ကိုင်တွယ် ဖြေရှင်းဖို့ တွန်းအားပေးမှုတွေ ဆောင်ရွက်နိုင်သလို၊ လူ့ဂုဏ်သိက္ခာ နဲ့ အညီ ဒုက္ခသည်တွေ နေထိုင်နိုင်ရေး အတွက်လည်း ကူညီမှုတွေ ပြုလုပ်နိုင်တယ် လို့ ဆိုပါတယ်။

မလေးရှား အပါအဝင် အာဆီယံနိုင်ငံတွေဟာ ကုလသမဂ္ဂရဲ့ ဒုက္ခသည်များ ဆိုင်ရာ ၁၉၅၁ ပဋိဉာဉ်မှာ လက် မှတ် ရေးထိုးတာ မဟုတ်တဲ့အတွက် မလေးရှားရောက် ရိုဟင်ဂျာ လူမျိုးစု ဒုက္ခသည်တွေ သာမက၊ ကျန်လူမျိုး ဒုက္ခသည်တွေ အားလုံးအတွက် တိကျတဲ့ လုံခြုံမှုနဲ့ အာမခံချက် မရနိုင် ဖြစ်နေရပြီး၊ ကုလသမဂ္ဂ ဒုက္ခသည်များ ဆိုင်ရာ မဟာမင်းကြီး ရုံး UNHCR အနေနဲ့လည်း လုပ်ဆောင်ရ ခက်ခဲနေတယ်လို့ မဝေဝေနုက ပြောပါတယ်။

BBC Burmese 

No comments:

Post a Comment