ရာထူးမှ ဆင်းပေးရမည် ဖြစ်သော်လည်း နိုင်ငံ၏ ဒီမိုကရေစီ စနစ်နှင့် စီးပွားရေး အင်အားကို မြှင့်တင် တည်ဆောက် ပေးနိုင်ခဲ့သဖြင့် အပြည့်အဝ ကျေနပ်မှု ရှိကြောင်း အင်ဒိုနီးရှား သမ္မတဆူဆီလိုဘမ်ဘန်း ယူဟွိုင်အိုနိုက ပြောကြား ခဲ့သည်။ စစ်ဗိုလ်ချုပ်ကြီး ဘဝမှ သမ္မတအဖြစ် ပြောင်းလဲ တာဝန်ယူခဲ့သူ ယူဟွိုင်အိုနို သည် နိုင်ငံအာဏာကို ဆယ်စုနှစ် တစ်ခုမျှ ထိန်းသိမ်း ထားခဲ့ပြီးနောက် ဇူလိုင်လ ရွေးကောက် ပွဲတွင် ပြုပြင်ပြောင်းလဲရေး အမြင်ရှိသူ ဂျိုကို ဝီဒိုဒိုကို အရေးနိမ့်ခဲ့သည်။ ယူဟွိုင်အိုနိုသည် အောက်တိုဘာ လတွင် သမ္မတသက်တမ်း ကုန်ဆုံးမည်ဖြစ်ပြီး ဝီဒိုဒိုက ၎င်း၏ နေရာတွင် အစားထိုး ဝင်ရောက် မည် ဖြစ်သည်။
ယူဟွိုင်အိုနိုသည် အဂတိ လိုက်စားမှု၊ သူပုန်ထကြွမှုများနှင့် မငြိမ်မသက် ဖြစ်နေသည့် အင်ဒိုနီးရှား နိုင်ငံကို သမ္မတအဖြစ် စတင်တာဝန်ယူခဲ့ရသူ ဖြစ်သည်။ “ကျွန်တော်တို့ စိန်ခေါ်မှုတွေ အများကြီး ကြုံခဲ့တယ်။ ဒါပေမဲ့ တစ်ခုချင်းစီ ပြဿနာတွေကို ဖြေရှင်းနိုင်ခဲ့ပါတယ်”ဟု ယူဟွိုင်အိုနိုက ဆိုသည်။ “အာချေးမှာ ဖြစ်နေတဲ့ ခွဲထွက်ရေး ပြောက်ကျား ပြဿနာတွေကို ကျွန်တော်တို့ ရှင်းလင်းနိုင်ခဲ့တယ်။ ပါပူအာမှာ အခြေအနေတွေ တည်ငြိမ်အောင် ထိန်းသိမ်းနိုင်ခဲ့တယ်။ (၂၀၀၄)ခုနှစ်၊ ဆူနာမီရေလှိုင်း ရိုက်ခတ်မှု ဖြစ်ရပ်ကြီး အပါအဝင် တခြား သဘာဝ ကပ်ဘေးတွေကနေ ပြန်နိုးထလာနိုင်ခဲ့တယ်။ ပြီးတော့ ခြစားမှုတွေကို ပြင်းပြင်းထန်ထန် ကြိုးစား တိုက်ဖျက်ခဲ့တယ်။ ဒါက အမြဲတမ်း အဆင်ပြေ အောင်မြင်နေဖို့တော့ မလွယ် ပါဘူး။ နိုင်ငံထဲက အကြမ်းဖက် လက်နက်ကိုင် အဖွဲ့တွေကို ကျွန်တော်တို့ ဖျက်ဆီးနိုင်ခဲ့တယ်။ တစ်ကမ္ဘာလုံးနဲ့ နိုင်ငံတကာ အဆင့် ဆက်ဆံရေးတွေကို ပိုပြီးတော့ တက်တက်ကြွကြွ အကောင်အထည် ဖော်နိုင်ခဲ့ပါတယ်”ဟုလည်း ယူဟွိုင်အိုနိုက ပြောကြားသွားခဲ့သည်။
_Ref: Channelnewsasia
7Day DAILY
No comments:
Post a Comment