ရန်ကုန်တိုင်း ဒေသကြီးအတွင်း မောင်းနှင်နေကြသည့် ယာဉ်များတွင် တရားဝင် လိုင်စင် ကိုင်ဆောင်ကာ မောင်းနှင်မှုရှိ၊ မရှိ လိုင်စင်အတု၊ အစစ်ခွဲခြားသည့် စက်များဖြင့် မကြာမီ စစ်ဆေး အရေးယူ ဆောင်ရွက်သွားမည် ဖြစ်ကြောင်း ယာဉ်ထိန်း တပ်ဖွဲ့မှ သိရသည်။ယာဉ်လိုင်စင်အတု ကိုင်ဆောင်ကာ မောင်းနှင်နေသော ယာဉ်မောင်းများကို လိုင်စင်အတု၊ အစစ်ခွဲခြားနိုင်သည့် စက်ဖြင့် စစ်ဆေးကာ ဖမ်းဆီး အရေးယူမှုများ ပြုလုပ်နိုင်ရန် အတွက် ယင်းစက်များကို ဝယ်ယူကာ တပ်ဖွဲ့ဝင်များ အားလုံးကို တပ်ဆင်ပေးကာ ထိရောက်သည့် အရေးယူမှုများ ပြုလုပ်သွားမည် ဖြစ်သည်။
ထိုကဲ့သို့ အရေးယူ လုပ်ဆောင်ရာတွင် လိုင်စင်အတု ကိုင်ဆောင် အသုံးပြုနေခြင်းကို တွေ့ရှိပါက ငွေဒဏ်နှင့် ထောင်ဒဏ် နှစ်ရပ်လုံးဖြင့် အရေးယူ သွားမည်ဖြစ်ကြောင်း သိရသည်။
ထိုကဲ့သို့ ဖမ်းဆီးနိုင်ရန် အတွက်လည်း အဖွဲ့ကိုးဖွဲ့ဖွဲ့ကာ မြို့နယ် ၃၁ မြို့နယ်၌ (Mobile) လှည့်ကင်း စနစ်ဖြင့် စည်ပင်ရဲ၊ နယ်မြေခံရဲ၊ က.ည.န၊ ပို့/ဆက်၊ ယာဉ်ထိန်း တပ်ဖွဲ့ဝင် အရာရှိ ဦးစီး ၁၂ ဦးတို့ဖြင့် စစ်ဆေးသွားမည် ဖြစ်သည်။
လိုင်စင်အတု ကိုင်ဆောင်ပါက ပြစ်မှုပုဒ်မ (၄၂ဝ) (လိမ်လည်မှု) အပြင် (၄၆၈) (စာရွက်စာတမ်း အတုပြု လုပ်မှု) ဖြင့် အရေးယူ ဆောင်ရွက်သွားမည် ဖြစ်သည်ဟု အမှတ်(၂) ယာဉ်ထိန်း တပ်ဖွဲ့ခွဲမှူး ရုံးမှ တာဝန်ရှိသူ တစ်ဦးက ပြောသည်။
ဇွန် ၁ ရက်မှစတင်ကာ စည်းကမ်း ချိုးဖောက်မှု များပြားသော နေရာများ၌ အဖွဲ့တစ်ဖွဲ့လျှင် ယာဉ်ထိန်းရဲ တပ်ဖွဲ့မှ အရာရှိဦးစီး တပ်ဖွဲ့ဝင် ၁၂ ဦး၊ နယ်မြေခံ ရဲတပ်ဖွဲ့၊ စည်ပင်သာယာ ရဲတပ်ဖွဲ့၊ က.ည.နနှင့် မ-ထ-သ(မြို့တွင်း) အုပ်ချုပ်ရေး အဖွဲ့များ ပူးပေါင်းပါဝင်သော အဖွဲ့များနှင့် ပူးပေါင်း အဖွဲ့ဖွဲ့ပြီး လှည့်လည်ကာ (Mobile) ဖြင့် အဖွဲ့ကိုးဖွဲ့၍ အရေးယူ ဆောင်ရွက်လျက်ရှိရာ စုစုပေါင်း ၃၂ဝ၇ မှု အထိဖမ်းဆီး အရေးယူနိုင်ခဲ့ကြောင်း သိရသည်။ အဆိုပါ အမှုများထဲတွင် မီးနီဖြတ်မှု ၄၂ မှု၊ လမ်းပိတ်ရပ်မှု ၁၆၉ မှုနှင့် လမ်းပြောင်းပြန် ၁၆၈ မှုတို့ ပါဝင်ကြောင်း သိရသည်။
မြ၀တီ
No comments:
Post a Comment