ကချင်ပြည်နယ်၊ အင်းတော်ကြီးဒေသ၊ ဆယ်ဇင်းကျေးရွာအပိုင်၊ ဝေကန်မှော်ရပ်ကွက်မှ အုပ်ချုပ်ရေးမှူးနှင့် အတွင်းရေးမှူးအား တောင်းသည့်ငွေ မပေးနိုင်၍ ဇူလိုင် ၁၇ ရက်နေ့တွင် KIA အဖွဲ့မှ ဖမ်းဆီးသွားပြီး ချုပ်နှောင် ထားကြောင်း ယင်းဒေသခံများထံမှ သိရသည်။
KIA အဖွဲ့သည် အုပ်ချုပ်ရေးမှူး ဦးမြင့်လွင် နေအိမ်သို့ ရောက်ရှိလာပြီး ငွေ ၅ သိန်းပေးရန် တောင်းရာ အဆင်မပြေသဖြင့် ငွေလျော့ယူရန် ပြောသော်လည်း လက်မခံဘဲ ထိုးကြိတ်ရိုက်နှက်ကာ အတွင်းရေးမှူး ဦးမောင်ကြီးနှင့်အတူ ဖမ်းသွားခြင်းဖြစ်ကြောင်း သိရသည်။
“ ငွေ ၅ သိန်း ပေးဆိုပြီး လာတောင်းတယ်၊ ကိုမြင့်လွင် က အဲဒီလောက်ငွေ မတတ်နိုင်တဲ့အတွက် ရှိတဲ့ငွေ ၁ သိန်း ပဲ ယူသွားပါဆိုပြီး တောင်းပန်တာ မရဘူး၊ တောင်းတဲ့ငွေ မပြည့်လို့ ဟိုသတင်းပေးတယ် ဒီသတင်းပေး တယ်ဆိုပြီး ဖမ်းသွားတာ ” ဟု အုပ်ချုပ်ရေးမှူး၏ ဇနီးဖြစ်သူက ပြောသည်။
ဖမ်းဆီးခံရသော အုပ်ချုပ်ရေးမှူးနှင့် အတွင်းရေးမှူးအား KIA အဖွဲ့မှ တပ်ရင်း(၂၆)ဌာနချုပ် အချုပ်ခန်းတွင် ချုပ်နှောင်ထားကြောင်း အတွင်းရေးမှူး၏ ဇနီးဖြစ်သူအား လာရောက်သတင်းပေးသဖြင့် ပြန်လည်လွတ်မြောက် ရေး ကြိုးပမ်းခဲ့သော်လည်း မအောင်မြင်ခဲ့ကြောင်း သိရသည်။
“ ကျွန်မက ကိုမောင်ကြီးရဲ့ ဇနီး ဒေါ်လှဂျာ ပါ ၊ ကချင် တိုင်းရင်းသူစစ်ပါရှင်၊ ကျွန်မတို့ သိကျွမ်းတဲ့ KIA တပ်ဖွဲ့ ၀င် တချို့ဆီကနေ သတင်းရပါတယ်၊ ကိုမောင်ကြီးတို့ ၂ ယောက်ကို အချုပ်ခန်းထဲမှာ ချုပ်ထားတယ်၊ ဒါ့ကြောင့် ကျွန်မ ဖုန်းဆက်ပြီး နောင်လွတ်ခရိုင်ရုံးကို လှမ်းတောင်းပန်ပါတယ်၊ ငွေပေးပါ့မယ်၊ လွှတ်ပေးပါလို့ ပြောတာ လုံးဝ ငြင်းလိုက်တယ် ” ဟု ယင်းက ပြောကြားသွားသည်။
ဒေါ်လှဂျာ မှ ဇူလိုင် ၂၂ ရက်နေ့တွင် ဖုန်းဖြင့် ဆက်သွယ်၍ မေးမြန်းခဲ့သော်လည်း KIA အဖွဲ့မှ ထိန်းသိမ်းထား ခြင်းမရှိဟု ငြင်းဆိုခဲ့ကြောင်းနှင့် ဦးမြင့်လွင်နှင့် ဦးမောင်ကြီး တို့ နှစ်ဦးသည် ဇူလိုင် ၂၈ ရက်နေ့အထိ နေအိမ်သို့ ပြန်လည်ရောက်ရှိခြင်း မရှိသေးကြောင်း သိရှိရပါသည်။
ရဲမာန်သော်
No comments:
Post a Comment