Wednesday 23 December 2015

ရွေးကောက်ပွဲရှုံးသော်လည်း ပြည်ခိုင်ဖြိုး ဆက်လက်အရေးပါနေဦးမည်

၂၀၁၅ ရွေးကောက်ပွဲမတိုင်မီက ပြည်ခိုင်ဖြိုးပါတီ စုရုံးမဲဆွယ်ပွဲတစ်ခုကို တွေ့ရစဉ် (ဓာတ်ပုံ − စိုင်းဇော်)
ကရင်ပြည်နယ် ရှေ့ တန်းစစ် မြေပြင်တွင် ခြေထောက်နှစ်ဖက် လုံး ကျည်ဆန်ထိသည့် ဒဏ်ရာ များရရှိခဲ့သူ စစ်အရာရှိဟောင်း ဦးညွန့်ဖေသည် ရန်ကုန်မြို့တော် စည်ပင်သာယာရေးကော်မတီ တွင် ဌာနမှူးတစ်ဦးအဖြစ် တာ ၀န်ထမ်းဆောင်စဉ်က သက်ပြည့် ပင်စင်ယူပြီး မိသားစုနှင့် အချိန် ကုန်ရန်အားခဲခဲ့သူဖြစ်သည်။
သို့သော် စစ်ဗိုလ်ချုပ်ဟောင်း များဦးဆောင်သော ပြည်ခိုင်ဖြိုး ပါတီက သူ့ကို ၂၀၁၀ရွေးကောက် ပွဲတွင် ရန်ကုန်တိုင်းဒေသကြီး လွှတ်တော်အတွက် ၀င်ရောက် ယှဉ်ပြိုင်ရန် တာဝန်ပေးခဲ့သည်။

လွှတ်တော်အမတ်ဖြစ်လာ ပြီး ငါးနှစ်တာကာလအတွင်း ဦးညွန့်ဖေက သူ၏မဲဆန္ဒနယ် သာကေတမြို့နယ်အတွင်း တံ တားဆောက်၊ လမ်းဖောက်၊ ရေ တွင်းတူး စသည့်ဖွံ့ဖြိုးရေးလုပ် ငန်းများ လုပ်ကိုင်ခဲ့သည်။ ထိုသို့ လုပ်ကိုင်ခဲ့သည့် ဦးညွန့်ဖေတစ် ယောက် လက်ရှိနေရာအတွက် ၂၀၁၅ ရွေးကောက်ပွဲတွင် ပြန် လည်အရွေးခံရာ သူ၏ပါတီ ခေါင်းဆောင်များကဲ့သို့ပင် အရှုံး ဖြင့်သာ ရင်ဆိုင်ခဲ့ရသည်။ ပြည် ခိုင်ဖြိုးပါတီသည် ပြည်ထောင်စု လွှတ်တော်တွင် ၄၁ နေရာသာ ရရှိပြီး အဓိကပြိုင်ဘက် အမျိုး သားဒီမိုကရေစီအဖွဲ့ချုပ် (NLD) က နေရာပေါင်း ၃၉၀ ရရှိသွား သည်။

ပြည်ခိုင်ဖြိုး နေရာအနည်းစု သာ အနိုင်ရခဲ့သော်လည်း အခြေ ခံဥပဒေအရ လွှတ်တော်အရပ်ရပ် တွင် ၂၅ ရာခိုင်နှုန်းနေရာရထား သည့် စစ်တပ်၏ ထောက်ခံမှု ရရှိ ထားခြင်း၊ အုပ်ချုပ်ရေးယန္တရား တွင် စစ်အရာရှိနှင့် ပြည်ခိုင်ဖြိုး အမာခံအများအပြားပါရှိနေခြင်း တို့ကြောင့် မြန်မာ့နိုင်ငံရေးတွင် အားကောင်းသော အင်အားစုအ ဖြစ် ရပ်တည်နိုင်မည့် အနေအ ထားတွင်ရှိသည်။

အမျိုးသား လွှတ်တော်မှ ပြည်ခိုင်ဖြိုးအမတ် ဦးညွန့်တင်က ပါတီသည် အရေးကြီးသည့်အခန်း ကဏ္ဍတွင် ရှိနေမည်ဟု ပြော သည်။

‘‘တို့ပါတီက တပ်မတော်နဲ့ က မဟာမိတ်ပဲ။ သူတို့နဲ့ပူးပေါင်း ပြီး လွှတ်တော်မှာ အပြန်အလှန် ထိန်းကျောင်းတာ ဆက်လုပ်နိုင် မှာပဲ။ ပါတီကြီးတစ်ခုအပြတ်အ သတ်နိုင်သွားလို့ လုပ်ချင်တာလုပ် ဆိုပြီး လွှတ်ပေးထားလို့ ဘယ်ရမ လဲ’’ဟု ၇၃ နှစ်အရွယ် သံအမတ်ကြီးဟောင်း ဦးညွန့်တင်ကပြောသည်။

‘‘တို့က ကဖျက်ယဖျက်လုပ် မှာလို့ ဆိုလိုတာမဟုတ်ဘူး။တိုင်း ပြည်ထူထောင်ရေးအတွက် ၀ိုင်း ၀န်းပြီး ကြိုးစားသွားဖို့ပဲ’’

ပြည်ခိုင်ဖြိုးသည် လွှတ် တော်အတွင်းဆက်ရှိနေသည် သာမက အခြားသောပါတီများနှင့် ယှဉ်လျှင် လူအင်အား၊ ငွေအင် အားအလွန် တောင့်တင်းသည့် အတွက် နိုင်ငံရေးပါတီအဖြစ် အခိုင်အမာဆက်လက်ရပ်တည် နေဦးမည်ဖြစ်ကြောင်း ရန်ကုန် တွင် နိုင်ငံရေးသင်တန်းများ ပို့ချ နေသော Educational Initiatives အဖွဲ့၏ ဒါရိုက်တာ Igor Blazevic က ဆိုသည်။

NLD ဦးဆောင်မည့်အစိုးရ အပေါ်ထားရှိသည့် လူထု၏မျှော် လင့်ချက်များကို အစိုးရသစ်က ဖြေရှင်းပေးနိုင်ခြင်းမရှိသည့်အ ခြေအနေနှင့် ကြုံရပြီး သမ္မတဦး သိန်းစိန်အစိုးရသက်တမ်းကာလ ပိုကောင်းသယောင်ယောင် ရှိခဲ့ သည်ဟု ထင်ကာ လူတချို့က စိတ်ပြောင်းလာလျှင် ပြည်ခိုင်ဖြိုး ပါတီက အမြတ်ထွက်နိုင်သည်ဟု လည်း သူကဆိုသည်။

‘‘အင်အားချည်းနဲ့တဲ့ ဒီမိုက ရေစီစနစ်ကို ကူးပြောင်းရာမှာ ယခင် အာဏာရပါတီတွေဟာ ဆက်လက်အသက်ရှင်နိုင်တယ်။ နိုင်ငံရေးမှာ အရေးပါတဲ့အခြေအ နေကို ဆက်လက်ထိန်းထားနိုင် တယ်ဆိုတာ တွေ့ရပါတယ်’’ဟု Igor Blazevic က ဆိုသည်။

အရေးပါနေဆဲ ယခင်အာ ဏာရပါတီများထဲတွင် အင်ဒိုနီး ရှားရှိ ဂိုလ်ကာပါတီ၊ ဆလိုဗေးနီး ယားနှင့် ဟန်ဂေရီနိုင်ငံတို့ရှိ ဆို ရှယ်ဒီမိုကရက်ပါတီများ ပါဝင် သည်ဟု သူက ပြောသည်။

အရှုံးကိုသုံးသပ်ခြင်း
သံအမတ်ကြီးဟောင်း ဦးညွန့်တင်က ပြည်ခိုင်ဖြိုးအကြီး အကျယ်ရှုံးသွားခြင်းမှာ ပါတီတွင် တစ်စုံတစ်ရာချို့ယွင်းချက်ရှိ၍ မဟုတ်ဘဲ ပြည်သူလူထုက ပြည် ခိုင်ဖြိုးပါတီအုပ်ချုပ်ပြီးနောက် NLD ကိုစမ်းသပ်အုပ်ချုပ်စေချင် သည့် သဘောဖြစ်ကြောင်း သုံး သပ်သည်။

သံအမတ်ဟောင်း ဦးညွန့် တင်သည် ၂၀၁၅ တွင် ရွေး ကောက်ပွဲထပ်မံဝင်ရောက်ခြင်း မပြုခဲ့ပေ။ ပါတီတွင် အကြံပေး အဖြစ် ဆက်လက်လုပ်ကိုင်မည် ဟု ဆိုသည်။

စစ်အရာရှိဟောင်း ဦးညွန့် ဖေကို ရွေးကောက်ပွဲရှုံးခြင်း၊ပါတီ ၏ အားနည်းချက်၊ မူဝါဒပြင်ဆင် မှုအကြောင်း မေးသောအခါ ‘‘ဘာမှ အားမနည်းဘူး။ ဘာမှပြင် စရာကို မလိုဘူး။ တို့ မဆိုးဘူးဆို တာထက် လူထုက ပိုကောင်းတာ ကို လိုချင်လို့ပေါ့ကွာ’’ဟုဆိုသည်။

သူက လွှတ်တော်သက်တမ်း လုပ်ဆောင်ချက်များကို ပြန် ပြောင်းစဉ်းစားရင်း စိတ်လွတ် လက်လွတ်ပုံစံဖြင့် ကုလားထိုင် တွင်ခါးကို လျှော့ထိုင်လျက် ‘‘ငါး နှစ်လုံးလုံး လူမိုက်လုပ်ခဲ့ရတယ်’’ ဟု ပြောသည်။ ၆၅ နှစ်အရွယ် ဦးညွန့်ဖေက ရန်ကုန်တိုင်းဒေသ ကြီး အတိုက်အခံအမတ်အချို့၏ အဆိုတင်သွင်းမှု အများအပြားကို ကန့်ကွက်ခဲ့ရသည်ဟုဆိုသည်။

‘‘ရန်ကုန်တိုင်းတစ်တိုင်းလုံး မှာရှိတဲ့ မူလတန်းကလေးများ အားလုံး အာဟာရတိုက်ကျွေးရေး အဆို တင်လာတယ်။ တင်တဲ့သူ ကတော့ ဟီးရိုးပေါ့။ ဖြစ်မှမဖြစ် နိုင်တာ။ တွက်ကြည့်လိုက်ရင်ပဲ တစ်နေ့ကို သိန်း ၂,၀၀၀ လောက် ကုန်မယ်။ ဒီတော့ ပယ်ချတာပေါ့’’ ဟု စာအုပ်အကြီးအသေး၊ ဖိုင်တွဲ အကြီးအသေး၊ သတင်းစာဂျာ နယ်စသည်များကို စစ်တန်းလျား တစ်ခုမှာကဲ့သို့ သေချာသပ်ရပ်စွာ စီထားသော စားပွဲနောက်မှဦးညွန့် ဖေက ပြောသည်။

‘‘(ရွှေတိဂုံဘုရားအနီး) ဒဂုံ စီးတီးစီမံကိန်းဆိုတာလည်း တို့ တိုင်းအဆင့်က ဘာလုပ်နိုင်မှာ လဲ။ ပြည်ထောင်စုအဆင့်က ဆုံး ဖြတ်တဲ့ဟာဆိုတော့ ပယ်ချရတာ ပေါ့’’

သူ၏ နောက်ဘက်နံရံတွင် တော့ သမ္မတဦးသိန်းစိန်ဓာတ်ပုံ၊ ပြည်ခိုင်ဖြိုး ခြင်္သေ့ပုံပါတီတံဆိပ် ယှဉ်တွဲထားသော အစိမ်းရောင် ရင့်ရင့်ပိုစတာကို ချိတ်ထားသည်။

ပါတီတွင်း ပြန်လည်တည်ဆောက်ရေး
ယခင်စစ်အစိုးရလက်ထက် တွင် စစ်ဗိုလ်ချုပ်ကြီးများဦး ဆောင်၍ ပြည်ခိုင်ဖြိုးအသင်းကို လူမှုရေးအသင်းအဖြစ် ဖွဲ့စည်းခဲ့ ပြီး ၂၀၁၀ ရွေးကောက်ပွဲနီးချိန် တွင် အသင်းကို ထိုအမည်ဖြင့် ပင်နိုင်ငံရေးပါတီအဖြစ် အသွင် ပြောင်းသွားခဲ့သည်။ မဲမသမာမှု များ အကြီးအကျယ်ဖြစ်ပွားခဲ့ သော ထိုရွေးကောက်ပွဲတွင် ပြည် ခိုင်ဖြိုးက အပြတ်အသတ်အနိုင်ရခဲ့သည်။

သို့သော်လည်း ၂၀၁၅ ရွေး ကောက်ပွဲတွင် ပြည်ခိုင်ဖြိုးအပြတ် အသတ်ရှုံးနိမ့်သွားရခြင်းမှာ လူ ထုက ပါတီကိုမုန်းသည်ဆိုခြင်း ထက် အုပ်ချုပ်သူအပြောင်းအလဲ ကို လိုလားခြင်းကြောင့် ဖြစ်သည် ဟုလည်းကောင်း၊ ရွေးကောက်ပွဲ မတိုင်မီပင် ပါတီခေါင်းဆောင် ပိုင်း အကွဲအပြဲများဖြစ်ပေါ်ခဲ့ခြင်း ကြောင့်ဟုလည်းကောင်း ပါတီ တွင်း ပြောဆိုသုံးသပ်မှုများရှိနေ သည်။

လာမည့် ရွေးကောက်ပွဲများ အတွက် ပြင်ဆင်ရန် ပါတီတွင် အပြောင်းအလဲလုပ်မည်ဟု ပါတီ ခေါင်းဆောင်အချို့က ထုတ်ဖော် ပြောကြားထားပြီး ရွေးကောက်ပွဲ အပြီးတစ်လအကြာတွင် အမာခံ များဖြင့် ပါတီပြန်လည်ဖွဲ့စည်းရန် ပြင်ဆင်နေပြီဖြစ်သည်။

‘‘ပါတီကတော့ လွှတ်တော် အတွင်းမှာရော၊အပြင်မှာပါဆက် လက်လှုပ်ရှားနေဦးမှာပဲ’’ဟု ပြည် ခိုင်ဖြိုး၏ ရန်ကုန်တိုင်းဒေသကြီး အတွင်းရေးမှူးဖြစ်သူ ဦးသာဝင်း က ပြောသည်။

ရွေးကောက်ပွဲအပြီး တစ်လ အကြာ တိုင်းနှင့်ပြည်နယ်အသီး သီးတွင် ပါတီအမာခံများ၏ စာ ရင်းကို ပြန်လည်ပြုစုနေပြီး ထိုအ ချက်အလက်များဖြင့် ပါတီကို ပြန်လည်ဖွဲ့စည်းမည်ဟု သိရ သည်။ မည်သည့်အချိန်တွင် မည် သို့ မည်ပုံ ပြုလုပ်မည်ဟူသော အ သေးစိတ်အချက်အလက်များ မ ထွက်ပေါ်လာသေးပေ။

လက်ရှိ စိစစ်နေသော ပါတီ အမာခံများမှာ ရွေးကောက်ပွဲ အောင်နိုင်ရေး လှုပ်ရှားမှုတွင်တက်တက်ကြွကြွ ပါဝင်ခဲ့သူများ ဖြစ်ကြောင်း ဦးသာဝင်းက ဆို သည်။

ရန်ကုန်၊ ဒေါပုံမြို့နယ်ရှိ ပြည်ခိုင်ဖြိုးပါတီ ဗဟိုအလုပ်အမှု ဆောင် ဦးမောင်မောင်သန်းက လည်း ပါတီတွင် ရာထူးတာဝန် များယူထားပြီး တာဝန်အမှန် တကယ် မထမ်းဆောင်သူများရှိ ကြောင်း၊ ထိုသူတို့နေရာတွင် အ စားထိုးရန် ရွေးကာက်ပွဲအောင် နိုင်ရေးကာလတွင် အမှန်တကယ် အလုပ်လုပ်ကိုင်သူများ စာရင်းကို ပါတီဌာနချုပ်သို့ ပေးပို့မည်ဖြစ် ကြောင်းရှင်းပြသည်။

‘‘ပါတီအတွက် အချိန်ပြည့် လုပ်နိုင်တဲ့သူဆိုရင်လည်း အချိန် ပြည့်ပေါ့။ အချိန်ပိုင်းလုပ်နိုင်သူ လည်း အချိန်ပိုင်းပေါ့။ အမှန်တ ကယ် ပြည်သူ့အတွက်လုပ်နိုင်တဲ့ ပုဂ္ဂိုလ်မျိုးတွေလိုအပ်နေတယ်။ အခုပါတီ ကေဒါစာရင်းကို ရပ် ကွက်အလိုက် ကောက်နေပါ တယ်’’ဟု ဦးမောင်မောင်သန်းက ဆိုသည်။

ယခင်စစ်အစိုးရလက်ထက် တွင် အာဏာပိုင်တို့နှင့် မကင်း ရာမကင်းကြောင်း စီးပွားရေး သမားအချို့ကို အမိန့်ညွှန်ကြား ချက်ဖြင့် တာဝန်ပေးစေခိုင်းသော် လည်း ဖိဖိစီးစီးလုပ်ကိုင်နိုင်ခြင်း မရှိပေ။ အကြောင်းအမျိုးမျိုး ကြောင့် ပါတီတွင်ဝင်ရောက်လုပ် ကိုင်နေသူအချို့မှာ အတိုက်အခံ NLD ထောက်ခံနေသူများဖြစ်နေ သည်ဟု သူကဆိုသည်။

‘‘တချို့တွေက ဖရဲသီးဗျ။ အပြင်မှစိမ်းပြီးအတွင်းမှာ နီနေ တာ။ ဒါတွေလည်း ကြုံခဲ့ရတာပဲ’’ ဟု ဦးမောင်မောင်သန်းက ပြော သည်။

ပါတီပြန်လည်ဖွဲ့စည်းရာ တွင် မြို့နယ်၊ ခရိုင်အဆင့်ထိသာ ပြုလုပ်မည်လော၊ ဗဟိုအဆင့်ကို ပါ ပြောင်းလဲမည်လောဆိုသည် ကို မသိရသေးပေ။ပါတီ၏ တရား ၀င်ဥက္ကဋ္ဌဖြစ်သော ဦးသိန်းစိန် သမ္မတသက်တမ်းကုန်ဆုံးသည့် အခါ ပါတီတွင်ပြန်လည်ဦးဆောင် မည်လောဆိုသည်မှာလည်း ရှင်း ရှင်းလင်းလင်းမသိရှိရသေးပေ။

ပါတီပြန်လည်ဖွဲ့စည်းပုံနှင့် ပတ်သက်၍ ပါတီခေါင်းဆောင် များကြား ဆွေးနွေးလျက်ရှိကြောင်း၊ သို့သော် အသေးစိတ်ကိုမူ ထုတ် ဖော် ပြောဆိုနိုင်ခြင်း မရှိသေး ကြောင်းသြဂုတ်လခေါင်းဆောင်ပိုင်း အပြောင်းအလဲတွင် ပါတီဗဟိုကော်မတီဝင် ဖြစ်လာသော ပြန်ကြားရေး ဒုဝန်ကြီးဟောင်း ဦးပိုက်ထွေးက Myamar Now ကိုပြောကြားသည်။

ရှုံးနိမ့်ခြင်းကပေးသောလွတ်လပ်မှု
ရွေးကောက်ပွဲတွင် အခြေ အနေမကောင်းသော်လည်း ပြည် ခိုင်ဖြိုး လွှတ်တော်အမတ်အချို့ မှာ ထိုရှုံးနိမ့်မှုကြောင့်ပင် လွတ် လပ်သော ပုဂ္ဂလိကဘ၀ ပိုင်ဆိုင် ရန် အိပ်မက်မက်နေပြီဖြစ်သည်။

စစ်အရာရှိဟောင်း ဦးညွန့် ဖေက ဇန်န၀ါရီလ ၎င်းတို့၏လွှတ် တော်သက်တမ်းကုန်ဆုံးသောအ ခါ နေပြည်တော် လယ်ဝေးမြို့ရှိ သူပိုင်ဆိုင်ရာ တောအိမ်လေးတွင် မိသားစုနှင့် သွားရောက်အနား ယူမည်ဟု ဆိုသည်။

‘‘တာဝန်ဝတ္တရားတွေပေါ့ပါး သွားပြီပေါ့ကွာ။ တော်လောက်ပြီ လေ’’ဟု သူက ရယ်မောရင်းပြော ဆိုလေသည်။ ။

Eleven Media Group

No comments:

Post a Comment