ပြင်သစ်နိုင်ငံမှာ သောကြာနေ့ည တိုက်ခိုက်သူတွေ နေသွားခဲ့တယ် ဆိုတဲ့ နေရာတွေကို ပြင်သစ် ရဲတွေက ဝင်ရောက် စစ်ဆေးနေပါတယ်။
နိုင်ငံတကာက ရှာဖွေနေတဲ့ ၈ ယောက်မြောက် သေနတ်သမားလို့ သံသယရှိတဲ့ ဆာလာ အက်ဘ်ဒီဆလမ် Salah Abdeslam ဟာ ပဲရစ်မြို့က အခန်း ၁ ခန်းနဲ့ ဟိုတယ်ခန်း ၂ ခန်းကို ငှားရမ်းခဲ့တယ်လို့ ဆိုပါတယ်။
သူဟာ အကြမ်းဖက်သမားတွေကို ဘယ်လ်ဂျီယံကနေ ပြင်သစ်ကို သွားရောက် ခေါ်ဆောင်ရာမှာ သုံးခဲ့တယ်လို့ ယူဆရတဲ့ ကားတစ်စီးကိုလည်း ငှားရမ်းခဲ့ပြီး၊ အဲဒီ ကားကိုလည်း မှုခင်း စစ်ဆေးရေးအဖွဲ့က စစ်ဆေးနေပါတယ်။
သူ ငှားခဲ့တဲ့ ဟိုတယ်ခန်းတွေကို ရှာဖွေရာမှာ ဗုံးလုပ်ဖို့ သုံးတဲ့ ပစ္စည်းတွေလို့ ယူဆရတဲ့ ဆေးထိုးပိုက်တွေ၊ ပြွန်တွေကို တွေ့ကြရပါတယ်။
၁၂၉ ယောက် သေဆုံးခဲ့ရတဲ့ သောကြာနေ့ ပဲရစ် တိုက်ခိုက်မှုကို IS အစ္စလာမ္မစ်နိုင်ငံအဖွဲ့က သူတို့ လုပ်ခဲ့တာလို့ ပြောထားပါတယ်။
အစောပိုင်းကတော့ ပြင်သစ် လုံခြုံရေး အင်အား ၁ သိန်း ၁ သောင်း ၅ ထောင်ကို အစောင့်ချထား လိုက်တယ်လို့ ပြင်သစ် ပြည်ထဲရေး ဝန်ကြီး Bernard Cazeneuve က ပြောခဲ့ပါတယ်။
လွတ်မြောက်နေတဲ့ ဆာလာ အက်ဘ်ဒီဆလမ် Salah Abdeslam ဟာ သူ့ဇာတိဖြစ်တဲ့ ဘယ်လ်ဂျီယံကို ထွက်ပြေး ရောက်ရှိသွားပြီလို့ ယူဆနေကြပါတယ်။ သူ့ကိုရှာဖွေရာမှာ သတင်းပေးနိုင်ဖို့ ဘယ်လ်ဂျီယံ ရဲတပ်ဖွဲ့က သူ့ဓာတ်ပုံကို ထုတ်ပြန်ထားပါတယ်။
BBC Burmese
No comments:
Post a Comment