Thursday, 21 May 2015

ပန်ဆန်းညီလာခံရလဒ်နှင့်UWSA ၏ သရုပ်မှန်

“၀”ကိုယ်ပိုင်အုပ်ချုပ်ခွင့်ရဒေသ၊ ပန်ဆန်းမြို့ ၌ မေလ ၁ ရက်နေ့မှ ၆ ရက်နေ့အထိ ကျင်းပ ပြုလုပ်ခဲ့သည့် စတုတ်္ထအကြိမ်မြောက်တိုင်းရင်းသား ညီလာခံပြီးဆုံးသွားခဲ့ပြီး ထုတ်ပြန်ကြေညာချက်တစ် ရပ်လည်းထွက်ပေါ်လာခဲ့ပါသည်။ ငြိမ်းချမ်းရေးကိစ္စ နှင့် ပတ်သက်၍ ညီလာခံအပေါ် မိမိတို့နိုင်ငံသူနိုင်ငံ သားတို့ကမျှော်လင့်ချက်ကြီးဖြစ်ခဲ့ကြသော်လည်း တကယ်အမှန်တွင်တိုင်းရင်းသားလက်နက်ကိုင်အဖွဲ့ ၁၂ ဖွဲ့၏ငြိမ်းချမ်းရေးအဖြေရှာမှုများသည် တိကျမှန် ကန်သောအဖြေမရရှိခဲ့ဘဲ “၀”အဖွဲ့၏ ကိုယ်ပိုင်ပြည် နယ်တောင်းဆိုရေးကသာအဓိကနေရာယူသွားခဲ့သည့် သဘောကိုမြင်တွေ့နေရပါသည်။

ညီလာခံကို ကျင်းပသည့် ရည်ရွယ်ချက်မှာ ပြည်ထောင်စု ငြိမ်းချမ်းရေး လုပ်ငန်းကော်မတီ (UPWC) နှင့် တစ်နိုင်ငံလုံး အပစ်အခတ်ရပ်စဲရေး ဆိုင်ရာညှိနှိုင်းရေးအဖွဲ့ NCCT တုိ့သဘောတူထား သည့်တစ်နိုင်ငံလုံးပစ်ခတ်တိုက်ခိုင်မှုရပ်စဲရေးဆိုင်ရာ  သဘောတူစာချုပ် (NCA)   မူကြမ်းကို ပြန်လည်သုံး သပ်ညှိနှိုင်းဆွေးနွေးရင်း တိုင်းရင်းသားလက်နက်ကိုင် အဖွဲ့အသီးသီး၏သဘောထားနှင့် အကြံပြုချက်ကို ထုတ်ဖော်ရန်ဟု သိရှိရပါသည်။ ညီလာခံနှင့် ပတ် သက်၍ ပြန်လည်စဉ်းစားကြည့်ပါလျှင် “၀”ပြည် သွေးစည်းညီညွတ်ရေးပါတီ (UWSP)   သည် NCA စာချုပ်မူကြမ်းဆွေးနွေးပွဲအဆင့်ဆင့်တွင်ပါဝင်ခဲ့ခြင်း မရှိဘဲ ရံဖန်ရံခါလေ့လာသူအဖြစ်ဖြင့် တက်ရောက်ခဲ့ သည်ကိုသာ သိရှိခဲ့ရပါသည်။ NCA  စာချုပ်မူကြမ်း နှင့် ပတ်သက်၍ ညီညွတ်သောတိုင်းရင်းသားလူမျိုး များဖက်ဒရယ်ကောင်စီ (UNFC)  အဖွဲ့ ထိပ်သီး ခေါင်းဆောင်များညီလာခံကို ဆွေးနွေးပွဲအဆင့်ဆင့် မှာမပါဝင်ခဲ့သော(UWSP)  အဖွဲ့အနေဖြင့် ပန်ဆန်း မြို့၌ ယခုမှ မည်သည့်အတွက်ကြောင့်ဦးစီးကျင်းပရ ကြောင်း မေးခွန်းထုတ်စရာတစ်ခုဖြစ်နေသည်ကို တွေ့မြင်ရပါသည်။ ညီလာခံ၏ထုတ်ပြန်ကြေညာချက်  ၁၂ ချက်သည်လည်း ယေဘုယျအားဖြင့် အပြု သဘောထက်အပျက်သဘောသာဆောင်နေကြောင်း တွေ့မြင်သုံးသပ်ဖော်ထုတ်ရရှိပါသည်။

အဆိုပါညီလာခံ၌ “၀”ကိုယ်ပိုင် အုပ်ချုပ်ခွင့်ရ တိုင်းအား ပြည်နယ်အဆင့်တိုးမြှင့်သတ်မှတ်ပေးရေး ၀ိုင်းဝန်းထောက်ခံပေးရန် “၀”ပြည်သွေးစည်းညီညွတ် ရေးတပ်မတော် (UWSA) ၏ စစ်သေနာပတိချုပ် ဦးပေါက်ယူချန်းကပန်ဆန်းအစည်းအဝေးတက်ရောက် လာသည့် တိုင်းရင်းသား ခေါင်းဆောင်များအား တောင်းဆိုခဲ့ကြောင်းတွေ့ရှိရပြီး အပြန်အလှန်ဆွေး နွေးချက်များ၌ တိုင်းရင်းသား ခေါင်းဆောင်များ၊ အတိုက်အခံများနှင့် ပြည်သူတစ်ရပ်လုံး မည်သို့မျှ လက်ခံမည်မဟုတ်ကြောင်းနှင့် ထိုသို့လက်ခံပါက တိုင်းပြည်အစိတ်စိတ်အမြွှာမြွှာပြိုကွဲရေး၏လမ်းစပင် ဖြစ်ကြောင်း ဖော်ထုတ်ဆွေးနွေးခဲ့ကြသည်ဟု သိရ ပါသည်။

ညီလာခံ၏ထုတ်ပြန်ချက်အပိုဒ် ၄ တွင် “တိုင်း ရင်းသားလူမျိုးဒေသအထူးသဖြင့် စစ်ပွဲဖြစ်ပွားနေ သည့်ဒေသများတွင် မြန်မာ့တပ်မတော်၏လူ့အခွင့် အရေးချိုးဖောက်ခြင်း၊ ပြည်သူလူထူများအပေါ်ညှဉ်း ပန်းနှိပ်စက်နေခြင်းကို ပြင်းထန်စွာရှုတ်ချသည်။ နောင်တွင် ဤကဲ့သို့လူ့အခွင့်အရေးချိုးဖောက်သည့် ကိစ်္စရပ်များ ထပ်မံဖြစ်ပွားအောင်ထိန်းချုပ်ပေးရန် တောင်းဆိုသည်”ဟု ညီလာခံ၏ ထုတ်ပြန်ကြေညာ ချက်တွင် အချက်တစ်ချက်အဖြစ်ထည့်သွင်းဖော်ပြ လျက် မြန်မာ့တပ်မတော်အပေါ်မဟုတ်မမှန်စွပ်စွဲ ပြောဆိုထားသည်ကိုလည်းတွေ့ရှိရသဖြင့် အထူးအံ့ သြမိပါသည်။ နိုင်ငံတော်နှင့် နိုင်ငံသားများအား ကာကွယ်စောင့်ရှောက်နေသောတပ်မတော်သည် မည်သည့်အခါကမှထိုကဲ့သို့သောလုပ်ဆောင်မှုမျိုးကို လုပ်ဆောင်ခဲ့ခြင်းမရှိခဲ့ရာ စွပ်စွဲကြေညာချက်ကိုထုတ် ပြန်ရန် ဦးစီးကျင်းပသည့် “၀”အဖွဲ့အနေဖြင့်လည်း မည်မျှလောက်အထိဥပဒေနှင့် အညီ ရိုးရိုးသားသား မှန်မှန်ကန်ကန်ရှိသနည်းဆိုသည်ကို ဦးစွာ ဆန်းစစ် သုံး သပ်ကြည့်ရန်လိုမည်ဖြစ်ပါသည်။

ဗမာပြည်ကွန်မြူနစ်ပါတီ (ဗကပ) အင်အား ချည့်နဲ့ လာချိန် ၁၉၈၉ ခုနှစ် ဧပြီလ ၁၇ ရက်တွင် ဗမာပြည်ကွန်မြူနစ်ပါတီ၏ဌာနချုပ်တည်ရှိနေသော “၀”နယ်မြေအတွင်းမှ ပန်ဆန်းဌာနချုပ်ကို သိမ်းယူ ခဲ့ပြီး “၀”အဖွဲ့ကိုဖွဲ့စည်းလိုက်ခြင်းဖြစ်ပါသည်။ စတင် ဖွဲ့စည်းစဉ်ကတည်းက အစိုးရအဖွဲ့နှင့် ငြိမ်းချမ်းရေး ရယူပြီး တပ်မတော်နှင့် သင့်မြတ်စွာ နေထိုင်သွား မည်ဖြစ်ကြောင်းထုတ်ပြန်ခဲ့သော်လည်း တရားဝင်စီး ပွားရေးနှင့် တရားမ၀င်စီးပွားရေးလုပ်ငန်းများပါလုပ် ကိုင်ပြီး အင်အားကြီးထွားအောင်ဆောင်ရွက်ခဲ့ကြ သည်။ ဗကပလက်အောက်မှခွဲထွက်ခဲ့စဉ်တုန်းက လက်နက်ကိုင်အရေအတွက် ထောက်ဂဏန်းမျှသာ ရှိသည့် “၀”အဖွဲ့မှာ မူးယစ်ဆေးဝါးထုတ်လုပ်ရောင်း ၀ယ်ဖောက်ကားခြင်းဖြင့် စီးပွားရှာခြင်း၊ လူလက်နက် စုဆောင်းခြင်းများပြုလုပ်ပြီး အင်အားကြီးထွားအောင် ဆောင်ရွက်ခဲ့ကြောင်းတွေ့ရပါသည်။ အထက်တွင် ဖော်ပြသလို လူလက်နက်စုဆောင်းရာတွင်လည်း အပြည်ပြည်ဆိုင်ရာနှင့် နိုင်ငံတော်ဥပဒေပြဋ္ဌာန်းချက်  များကိုဆန့်ကျင်၍ အရွယ်မရောက်သေးသူ ကျောင်း နေအရွယ်ကလေးသူငယ်များကို စစ်သင်တန်းတက် စေခြင်းများ၊ နယ်မြေလူထုစိတ်မပါဘဲ အတင်းအဓမ်္မ စစ်သားလုပ်ရန်စေခိုင်းခြင်းများ၊ အတင်းအဓမ်္မ လူသစ်စုဆောင်းခြင်းများကို မိုက်ကြေးခွဲပြုလုပ်ခြင်း ဖြင့် “၀”ခေါင်းဆောင်များကသာ လူ့အခွင့်အရေး ချိုးဖောက်မှုများကို ပြုလုပ်နေကြကြောင်း တွေ့မြင် ရမည်ဖြစ်ပါသည်။

“၀”ပြည် သွေးစည်းညီညွတ်ရေးတပ်မတော် (UWSA) နှင့် မိုင်းလားအဖွဲ့တို့ကြီးစိုးရာဒေသများ သည် ၁၇ ရာစုနှောင်းပိုင်းမှစ၍ မျက်မှောက်ကာလ  တိုင်အောင်မူးယစ်ဆေးဝါးစံချိန်တင်ထွက်ရှိရာဒေသ များအဖြစ် ကမ်္ဘာကမှတ်တမ်းတင်ခြင်းခံရသည်အထိ ဘိန်းနှင့် အင်မ်ဖီတမင်းဘေးပြားများထွက်ရှိရာဒေသ များဖြစ်လာပါသည်။ လက်ရှိအချိန်မှာလည်း “၀”ပြည်သွေးစည်းညီညွတ်ရေးတပ်မတော် (UWSA) စစ်သေနာပတိချုပ်ဦးပေါက်ယူချန်းနှင့် အခြားသော “၀”တပ်ဖွဲ့ခေါင်းဆောင် ၂၁ ဦးတို့သည်လည်း အမေ ရိကန်မူးယစ်ဆေးဝါးတိုက်ဖျက်ရေးအေဂျင်စီDEA ကဒေါ်လာငွေများစွာထုတ်ပြန်ကြေညာ၍ ဖမ်းဝရမ်း ထုတ်ခြင်းကို ခံထားရသူများဖြစ်ပြီး မူးယစ်ရာဇာများ အဖြစ်လူသိများသူများဖြစ်ကြပါသည်။

ရန်သူမျိုးငါးပါးထဲတွင်မပါရှိဘဲ လူသားမျိုးနွယ်  တစ်အုပ်စုလုံးအား လူညွန့်တုံးစေမည့်အရာမှာမူးယစ်  ဆေးဝါးပင်ဖြစ်ပါသည်။ အမှန်စင်စစ်မှာမူ မူးယစ် ဆေးဝါးသည် ရန်သူမျိုးငါးပါးထက်ပင်ဆိုးရွားသော အရာတစ်ခုစြဖ်ပါသည်။ မူးယစ်ဆေးဝါးအန်္တရာယ် သည်ကြီးမားလွန်းလှသောကြောင့် တစ်ကမ်္ဘာလုံးက ရန်သူတော်အဖြစ်သတ်မှတ်ပြီး ဘုံရန်သူအဖြစ်သတ် မှတ်ချေမှုန်းလျက်ရှိပါသည်။ မူးယစ်ဆေးဝါးစိုက်ပျိုး ထုတ်လုပ်ရောင်းချမှုသည့် မိမိတို့နိုင်ငံတွင် ကိုလိုနီ စနစ်၏အမွေဆိုးအဖြစ် အမြစ်တွယ်ကျန်ရစ်ခဲ့သော  အရာတစ်ခုပင်ဖြစ်ပါသည်။ မူးယစ်ဆေးဝါးကြောင့်  ဘ၀နစ်နာဆုံးရှုံးသွားရသော အနာဂတ်လူငယ်များ  ဒုနှင့်ဒေးရှိမည်ဆိုလျှင် ငြင်းဆိုနိုင်မည်မဟုတ်ပါ။ ထို့ ကြောင့် နိုင်ငံတော်အစိုးရအနေဖြင့်လည်း မူးယစ် ဆေးဝါးကာကွယ်တားဆီးရေးကို အမျိုးသားရေး တာဝန်တစ်ရပ်အနေဖြင့် အလေးအနက်လက်ခံကျင့်  သုံးဆောင်ရွက်လျက်ရှိပြီး နိုင်ငံတကာနှင့်လည်း ပူးပေါင်းဆောင်ရွက်လျက်ရှိပါသည်။ တပ်မတော် အနေဖြင့်လည်း တစ်မျိုးသားလုံးလူညွန့်တုံးစေမည့် မူးယစ်ဆေးဝါးကို အမျိုးသားအကျိုးစီးပွားအတွက် ရှင်းလင်းဖြိုခွင်းလျက်ရှိပါသည်။ သို့သော် အချို့သော နယ်စပ်ဒေသများတွင် ကိုယ်ကျိုးရှာမသမာသူလူ တစ်စုမှ ၎င်းင်းတို့၏ကိုယ်ကျိုးစီးပွားအတွက် မူးယစ် ဆေးဝါးထုတ်လုပ်ဖြန့်ဖြူးရောင်းချလျက်ရှိပါသည်။ ထိုအထဲတွင် “၀”ဒေသသည် မြန်မာနိုင်ငံတွင်မူးယစ် ဆေးဝါးအများဆုံးထွက်ရှိရာဒေသတစ်ခုဖြစ်ပါသည်။ “၀”ပြည်သွေးစည်းညီညွတ်ရေးတပ်မတော် (UWSA)  ဟုဆိုလျှင် ဘိန်းနှင့် တွဲဖက်ကာ ကမ္ဘာကရှုမြင်ကြပါ တယ်။ (United Wa State Army)  ဟု အင်တာနက် တွင် ရှာဖွေပါက ဘိန်းစိုက်ပျိုးထုတ်လုပ်မှုနှင့် သက်ဆိုင်သည့်အကြောင်းအခြင်းရာများ များစွာတွေ့ ရှိရမည်ဖြစ်ပါသည်။ “၀”ပြည်သွေးစည်းညီညွတ်ရေး တပ်မတော် (UWSA)   ခေါင်းဆောင်များကို ယနေ့ အချိန်ထိ အမေရိကန်ရဲတပ်ဖွဲ့စာမျက်နှာတွင် အလိုရှိ ကြောင်းဒေါ်လာငွေများစွာဖြင့် ကြေညာထားဆဲဖြစ် ပါသည်။ မူးယစ်ဆေးဝါးဖြင့်နာမည်ပျက်နေသည့် “၀”ခေါင်းဆောင်တို့မှာယခုတိုင်းရင်းသားညီလာခံပန်ဆန်း အစည်းအဝေးဖြင့် ၎င်းင်းတို့၏နာမည်ပျက်များကို ဖုံး ကွယ်ရန်ကြိုးစားနေသည်မှာပေါ်လွင်ထင်ရှားပါသည်။

တပ်မတော်အပေါ်စွပ်စွဲထားသော လူ့အခွင့် အရေးချိုးဖောက်ခြင်း၊ ပြည်သူလူထုများအပေါ်ညှဉ်း ပန်းနှိပ်စက်နေခြင်းဆိုသောအချက်နှင့်ပတ်သက်၍ တပ်မတော်သားများသည်နိုင်ငံတော်မှပြဋ္ဌာန်းထား သော စစ်ဘက်ဥပဒေနှင့် နယ်ဘက်ဥပဒေများကို လိုက်နာရသည့်အပြင်အပြည်ပြည်ဆိုင်ရာဥပဒေများ ကို တစ်ပြိုင်နက်တည်းလိုက်နာကြရသူများဖြစ်ပါ သည်။ စစ်ပွဲဆိုင်ရာဥပဒေLaw of Armed Conflict-LOAC (သို့မဟုတ်) အပြည်ပြည်ဆိုင်ရာလူ့ အခွင့်အရေးချိုးဖောက်မှုဆိုင်ရာဥပဒေInternatonal Humanitarian Law-THL  အရ လူသားချင်းစာနာမှု (Humanity)  ဆိုသည်မှာ တိုက်ပွဲဝင်မဟုတ်သည့် ပြည်သူလူထုအပေါ်မလိုလားအပ်သောထိခိုက်ဒဏ် ရာရရှိစေမှု၊ မလိုလားအပ်သောဒုက်္ခခံစားရမှု (Unnecessary Suffering)  များဖြစ်ပေါ်စေနိုင်သည့် လက်နက်ခဲယမ်းများအသုံးပြုခြင်း၊ စစ်ဆင်မှုနည်း  လမ်းများအသုံးပြုခြင်းတို့အား တားမြစ်ထားသည့်မူ သဘောတရားဖြစ်ပေရာ တိုင်းရင်းသားများနေရာ ဒေသများ၌ စစ်ပွဲများဖြစ်လာပါကလည်း တပ်မတော်  အနေဖြင့် ပြည်တွင်းပြဋ္ဌာန်းဥပဒေများနှင့် အပြည် ပြည်ဆိုင်ရာဥပဒေများကို လိုက်နာရသူများဖြစ်သော ကြောင့် အဆိုပါဥပဒေပြဋ္ဌာန်းချက်များနှင့် အညီ ဒေသခံပြည်သူလူထုကို ဘေးလွတ်ရာသို့ရွှေ့ပြောင်း ပေးခြင်း၊ အရပ်သားပြည်သူလူထုအယောင်ဆောင် ထားသော သောင်းကျန်းသူလက်နက်ကိုင်အဖွဲ့ဝင် များကိုသာ ရှာဖွေဖော်ထုတ်ဖမ်းဆီးခြင်း၊ အစိုးရအဖွဲ့ အစည်းများနှင့် နိုင်ငံသူနိုင်ငံသားများ၏အသက်အိုး  အိမ်ထိပါးနှောင့်ယှက်သူများနှင့် နိုင်ငံတော်၏အချုပ် အခြာအာဏာကိုထိခိုက်လာစေသည့်တိုက်ခိုက်လာ သောသောင်းကျန်းသူအဖွဲ့အစည်းများကိုသာ တုံ့ပြန် တိုက်ခိုက်ခြင်းတို့ကြောင့်အရပ်သားပြည်သူလူထုအပေါ် မလိုလားအပ်သော လူ့အခွင့်အရေးချိုးဖောက်မှုမျိုး မရှိနိုင်သည်မှာပေါ်လွင်ထင်ရှားလျက်ရှိပါသည်။

“၀”ပြည်သွေးစည်းညီညွတ်ရေးတပ်မတော် (UWSA)  သည် နယ်ခြားစောင့်တပ်ဖွဲ့စည်းရေးကို လက်မခံခြင်းနှင့် ၂၀၁၀ ရွေးကောက်ပွဲများကို “၀”ကိုယ်ပိုင်အုပ်ချုပ်ခွင့်ရတိုင်းတွင် လုံးဝလုပ်ခွင့်မပေး ခြင်းတို့အပြင် ယခုကျင်းပသည့်ညီလာခံတွင် နိုင်ငံ တော်အစိုးရမှတပ်မတော်နှင့် တိုက်ပွဲဖြစ်ပွားလျက်ရှိ သည့်လက်နက်ကိုင်အဖွဲ့အစည်းများအား မဖိတ်ကြား ရန်အကြောင်းကြားချက်ကို ဆန့်ကျင်ဖိတ်ကြားခြင်း များ ပြုလုပ်ခဲ့ပါသည်။ “၀”ကိုယ်ပိုင်အုပ်ချုပ်ခွင့်ရတိုင်း ၏လုပ်ဆောင်ချက်များကို လေ့လာကြည့်လျှင် လက် ရှိအခြေအနေအရအစိုးရ၏ထိန်းချုပ်မှုအောက်မှကင်း  လွတ်နေပြီး စစ်အင်အားကြီးထွားလာသည်နှင့်အမျှ ပြည်ထောင်စုအစိုးရကို ဆန့်ကျင်ဆောင်ရွက်နေသည့် အပြုအမူလက်္ခဏာများဖြစ်နေကြောင်း တွေ့မြင်နေ ရသဖြင့် မည်သို့ပင်ပြည်ထောင်စုမှခွဲမထွက်ပါဟုပြော ဆိုနေစေကာမူ၎င်းင်းတို့၏လုပ်ရပ်များသည်ခွဲထွက်ရေး  လမ်းကြောင်းကိုသာ ဦးတည်နေကြောင်း တွေ့ရှိနေ ရပါသည်။

ယခုဆိုလျှင် “၀”ကိုယ်ပိုင်အုပ်ချုပ်ခွင့်ရတိုင်း၏ မြို့တော် ပန်ဆန်းမြို့သည်ကာစီနိုလောင်းကစားရုံ များ၊ အနှိပ်ခန်းများ၊ ဟိုတယ်များဖြင့်စည်ကားလျက် ရှိနေပြီး ပြည်ထောင်စုအစိုးရ၏အုပ်ချုပ်မှုမှ ကင်း လွတ်လျက်ရှိနေပါသည်။ အုပ်ချုပ်ရေးပိုင်းတွင် တရုတ်လူမျိုးများဝင်ရောက်နေရာယူထားကာဒေသ  တွင်းလူနေမှုစရိုက်တွင် တရုတ်ယဉ်ကျေးမှုလွှမ်းမိုး လျက်ရှိပါသည်။ အုပ်ချုပ်ရေးအဖွဲ့၏ရုံးသုံးစာကို တရုတ်စာပေဘာသာစကားစသည်ဖြင့် တရုတ်ယဉ် ကျေးမှုလွှမ်းမိုးနေသည်။“၀”ဒေသမှာရှိသည့်လူတွေမှာ “၀”တိုင်းရင်းသားအစစ်လား၊ “၀”တိုင်းရင်းသားတွေ ကို အသုံးချနေတဲ့ “၀”အမည်ခံကိုယ်ကျိုးရှာသူတွေ လားဆိုတာ သေချာဆန်းစစ်စောင့်ကြည့်ဖို့လိုမည် ဖြစ်ပါသည်။ “၀”ပြည်သွေစည်းညီညွတ်ရေး တပ်မတော်အနေဖြင့် လက်နက်ငယ်စက်ရုံများ၊ မြေ ပြင်မှဝေဟင်ပစ်ဒုံးလက်နက်များပိုင်ဆိုင်ထားသည်ဟု သတင်းဖြစ်ပေါ်နေပြီး တစ်ဘက်နိုင်ငံ၏ အကူအညီ ဖြင့် စစ်သုံးရဟတ်ယာဉ်များ၊ တင့်ကားများပိုင်ဆိုင် ထားသည်ဟုလည်း သတင်းများထွက်ပေါ်လျက်ရှိပါ သည်။ လက်နက်ကိုင်တပ်ဖွဲ့မှာ အင်အား ၃၀၀၀၀ ကျော်ရှိပြီး အရန်အင်အား ၁၀၀၀၀ကျော်ခန့်ရှိသည် ဟု သိရှိရပါသည်။ နိုင်ငံတော်အစိုးရမှဖွဲ့စည်းပုံအခြေ ခံဥပဒေနှင့် အညီ လူဦးရေကိုအခြေခံလျက် ကိုယ်ပိုင် အုပ်ချုပ်ခွင့်ရတိုင်းသတ်မှတ်ပေးထားသော်လည်း စစ်လက်နက်အင်အားတောင့်တင်းလာသည့် “၀”အဖွဲ့သည် နိုင်ငံတော်အစိုးရကိုဆန့်ကျင်၍ ယခုပန် ဆန်းကြေညာချက်တွင် ကိုယ်ပိုင်ပြဋ္ဌာန်းခွင့်နှင့် “၀”ပြည်နယ်အဖြစ်  တောင်းဆိုလာခဲ့ပါသည်။ ယင်း ဆောင်ရွက်ချက်များကို ကြည့်ခြင်းအားဖြင့် “၀”အဖွဲ့ အနေဖြင့် ပြည်ထောင်စုသမ်္မတမြန်မာနိုင်ငံတော်နှင့် စစ်မက်ပြိုင်ဆိုင်လိုသည့်အသွင်ကိုဆောင်နေသည့် အလားဟုပင် ထင်မြင်ယူဆနိုင်ပါသည်။

တစ်ဆက်တည်းပင်လောက်ကိုင်စစ်မြေပြင်တွင် ဖုန်ကြားရှင်ဦးဆောင်သော ကိုးကန့်တပ်ဖွဲ့များအား တပ်မတော်၏ထိုးစစ်ဆင်မှုများကြောင့်UWSA- MNDAA-NDAA  တို့၏ အကျိုးတူစီးပွားဘက်ဖြစ် ကြသည့်အလျောက်ကိုးကန့်နယ်မြေတွင်ပိတ်မိနေ သော မူးယစ်ဆေးဝါးတန်ချိန်ထောင်ပေါင်းများစွာ ရှိနေသည်ဟု သတင်းများသည်ထွက်ပေါ်လျက်ရှိပါ သည်။ ခဏခြင်းဖြင့် တိုက်၍ရမည်ဟုထင်မှတ် ထားသည့်ဖုန်ကြားရှင်၏လောက်ကိုင်စစ်ပွဲသည် အချိန်ကြာလာသည်နှင့်အမျှစစ်သုံးစရိတ်မြင့်တက်၍ လာခဲ့ပြီး လက်ရှိတွင်ပင်အမေရိကန်ဒေါ်လာ ၁.၅ ဘီလီယံကျော်ကုန်ကျနေကြောင်း သိရသည်။ ထို့ အပြင်တရုတ်နိုင်ငံနယ်စပ်ရှိနန်ဆန်ဆေးရုံတွင် တက် ရောက်ကုသနေကြသော ကြေးစားစစ်သားတို့၏ ဆေးကုသစရိတ်များပေးရန်နှင့် သေဆုံးသူကြေးစား များအတွက် လျော်ကြေးပေးရန်အတွက် တန်ထောင် နှင့် ချီသောမူးယစ်ဆေးဝါးများကို ရောင်းချရန် အရေးတစ်ကြီးလိုအပ်လာကြောင်း၊ ထိုမူးယစ်ဆေး ၀ါးများကို “၀”အဖွဲ့ကတာဝန်ယူဖြန့်ခွဲပေးမည်ဖြစ် ကြောင်း သတင်းများလည်းထွက်ပေါ်လာနေသည် မှာ ၀မရှိဘဲ ၀ိ မဖြစ်နိုင်သကဲ့သို့ဇစ်မြစ်မှန်မရှိဘဲ သတင်းဖြစ်မလာနိုင်ဟုသာ နိုင်ငံသားအားလုံး သဘောပေါက်နေကြပါသည်။ ထိုကိစ်္စအတွက် အရေးတကြီးခေါင်းချင်းဆိုင်ဆွေးနွေးကြရန် လိုအပ် ခဲ့သောကြောင့် “တိုင်းရင်းသားလက်နက်ကိုင်အဖွဲ့ အစည်းများ၏ ခေါင်းဆောင်များ ပန်ဆန်းမြို့တွင် တွေ့ဆုံဆွေးနွေးပွဲ”ခေါင်းစဉ်လှလှတပ်ကာတွေ့ဆုံ ခြင်းသာဖြစ်သည်ဟုယူဆရပါလိမ့်မည်။

နိုင်ငံတော်အစိုးရ၏ပြည်ထောင်စုငြိမ်းချမ်းရေး ဖော်ဆောင်ရေးလုပ်ငန်းကော်မတီနှင့် တိုင်းရင်းသား  လက်နက်ကိုင်အဖွဲ့အစည်းများ၏ တစ်နိုင်ငံလုံးပစ် ခတ်တိုက်ခိုက်မှုရပ်စဲရေးညှိနှိုင်းရေးအဖွဲ့တို့အကြား တစ်ခုတည်းသောNCA  မူကြမ်းရရှိရေးအတွက် ညှိ နှိုင်းခဲ့ကြပြီးနောက် ၂၀၁၅ ခုနှစ် မတ်လ ၃၁ ရက် နေ့တွင် NCA  မူကြမ်းပဏာမအဆင့်သဘောတူစာ ချုပ်ကို နှစ်ဖက်ချုပ်ဆိုနိုင်ခဲ့သဖြင့် တစ်နိုင်ငံလုံးဝမ်း မြောက်ဝမ်းသာရှိနေချိန်တွင် “၀”ပြည်သွေးစည်းညီ ညွတ်ရေးတပ်မတော် (UWSA)  က ပန်ဆန်းညီလာ ခံအမည်ခံပြီး ယခုကဲ့သို့ဆောင်ရွက်ချက်များသည် နိုင်ငံတော်အစိုးရ၏ငြိမ်းချမ်းရေးလမ်းစဉ်ကို ဆန့်ကျင်  သော အပျက်သဘောဆောင်သည့်ကိစ်္စရပ်သာဖြစ် သည်ဟုသုံးသပ်လျက် အောက်ပါအတိုင်းသာဆိုလိုက်  ချင်ပါတော့သည်။

ပန်ဆန်းအဖြေ
ပန်ဆန်းက ကြေညာချက်အဆို ... ပြည်မြန်မာ တည်ငြိမ်ရေး
စုံညီစွာကတိပေးတဲ့ ... ဒီငြိမ်းချမ်းရေးစာချုပ်မှာ
ပြန်လည်ကာသုံးသပ်ပါတဲ့ ...NCCT အနေကျုံ့ တယ်
NCA  ဘယ်သူညာထိုးတာလဲ ... မင်းတို့မှာ တာဝန် ရှိမယ်လို့ ... ကြုံးဝါးသလိုမျိုး။
ဘိန်းမှောင်ခိုကုန်ကူးလို့ ... ကိုယ်ကျိုးရှာသူတို့ကို
ခွင့်လွတ်ပါငြိမ်းချမ်းရေးသမားတွေမို့ ... သည်းခံ ကာမျက်ကွယ်ပြုခဲ့တာ
အဖန်ဖန်များလှပြီမို့ ... စည်းစိမ်ခံဘ၀မြင့်ကာ
နိုင်ငံကိုရန်လုပ်ပြီး ... လွတ်လပ်မှုလိုချင်ပါသတဲ့ ...၀လိုက်တဲ့လူပါး (“၀”) ။
ငြိမ်းချမ်းရေးကိုအကြောင်းပြု ... အခွင့်ထူးခံ တောင်းဆို
ကိုယ်ပိုင်ပြဋ္ဌာန်းခွင့်နဲ့ ... ဖက်ဒရယ်အမည်တပ်  လို့ ... လွတ်လပ်ခွင့်ရချင်တယ်ဆိုပဲ
အမေ့အိမ် အဖီဆွယ်မှာ ..ခဏဆိုမှီခိုရာက ... ဒီဘက်ခြမ်းငါပိုင်တယ်ဆိုပြီး
မဆိုင်သူအနားမကပ်နဲ့လို့ ...အိမ်ပိုင်သူ့အမည် ဖောက်မယ့် သားမိုက်လိုမျိုး။
ဒေသတွင်း ဘာသာစကားနဲ့ ... ရေဒီယိုအသံ လှိုင်းလွှင့်လို့
အစိုးရအံတုဖို့ ... တင့်လေယာဉ်စုံလင်စွာပြင်ပြီး ကြောင်း
အော်ဟစ်ကာအသိပေးနေတာ ... ဘာသာပြန်Intersect Man  တို့
ကြားမိရင်တင်ပြပါတော့ ... သစ်္စာမဲ့သကောင့် သားကို ... လမ်းခွဲဖို့အကြောင်း။
ညီညာမှပြည်သာမယ် ... ဘယ်လိုပင်ဆိုသော်လည်း
သစ္စာဖောက် “၀”ငမိုက်သားကို  ... နေရာပေး အခွင့်ထူးခံစေတာ
အချိန်ကြာရင် စကားပုံအဆိုအတိုင်း ... တစ်လှေ လုံးပုပ်ရတော့မယ်
ပြည်ပျက်မှနောင်တမရအောင် ... အမြန်ပင်ဖယ် ရှားသင့်ပြီလို့ ... သိစေလိုကြောင်း။
အောင်ဇေယျ
www.hotnewsweekly.com

No comments:

Post a comment