မြို့ပြဧရိယာတစ်ခုကို ရေလွှမ်းမိုးမှု လျှော့ချနိုင်ရန်အတွက် တမံတစ်ခုကို ဖောက်ချလိုက်ခြင်းကြောင့် ပါကစ္စတန်ရှိ ကျေးရွာနှစ်ခုကို ဆိုးဆိုးရွားရွား ရေလွှမ်းသွားခဲ့သည်။
တမံကို ဖောက်ချလိုက်သည့်အတွက် ရွာနှစ်ရွာတွင် နေအိမ်များရော၊ လမ်းများပါ ရေလွှမ်း သွားပြီး ဒေသခံ များက အိမ်ခေါင်မိုးများပေါ် တက်၍ ခိုလှုံနေရသည်။ ပါကစ္စတန်တွင် ဖြစ်ပေါ်နေသော ရေလွှမ်းမိုးမှု များ သည် (၂၀၁၀)နောက်ပိုင်း အဆိုးဆုံး အခြေအနေလည်း ဖြစ်သည်။ (၂၀၁၀)ပြည့်နှစ် ရေကြီးမှု သည် နိုင်ငံ သမိုင်းတွင် အဆိုးဆုံး မှတ်တမ်းဝင်ခဲ့ပြီး ထိုစဉ်က လူပေါင်း (၁၇၀၀)ကျော် သေဆုံးခဲ့သည်။
အာဏာပိုင်များက ပန်ဂျပ်ရှိ ဂျာဟန်းမြို့တွင် ရေကြီးမှု စိုးရိမ်အခြေအနေထိ ရောက်ရှိလာသည့်နောက် တမံ အတားအဆီးကို ဖောက်ချရန် ဆုံးဖြတ်ခဲ့ခြင်း ဖြစ်သည်။ “အခုလို တမံကို ဖောက်ချလိုက်တယ် ဆိုတာက ဂျာဟန်း မြို့ခံ ပြည်သူတွေရဲ့ အသက်အိုးအိမ် စည်းစိမ်ကို ကာကွယ်ဖို့ နောက်ဆုံး ရွေးချယ်ရာ အခြေ အနေပါ။ မြို့ကို ကယ်တင်ဖို့ မဖြစ်မနေ လုပ်ဆောင်ရတဲ့ ကိစ္စမျိုး ဖြစ်ပါတယ်”ဟု ဒေသဆိုင်ရာ အုပ်ချုပ်ရေး အဖွဲ့မှ အရေးပါသော အရာရှိ တစ်ဦးက AFP သို့ ပြောကြားခဲ့သည်။
ဂျာဟန်းတွင် လူပေါင်းလေးသိန်းကျော်မျှ နေထိုင်ပြီး အဆိုးရွားဆုံး အခြေအနေကို ရှောင်လွှဲရန်အတွက် တမံဖောက်ချလိုက်ခြင်းဟု ကာကွယ်ရေး၊ ရေအရင်းအမြစ်နှင့် စွမ်းအင်ဝန်ကြီး ခါဝါဂျအာဆစ်ဖ် ကလည်း ပြောကြားခဲ့သည်။ ပန်ဂျပ် ဒေသခံ တစ်ဦးဖြစ်သည့် မူဟာမက် ဇူလ်ဖီကာက “ရေတွေ အလုံး အရင်း စီးဝင်လာတာကို ကျွန်တော်တို့ မြင်ခဲ့ရတယ်။ တချို့ရွာတွေမှာဆိုရင် ရေထုက (၈)ပေလောက်ထိ တက်လာတယ်။ ဒီတော့ ရွာခံတွေက အိမ်တွေကို စွန့်ပစ်ပြီး ခေါင်မိုးပေါ်တက်ရင်း ရေဘေးခိုနေရတယ်”ဟု ဆိုသည်။
လတ်တလောတွင် ရေဘေးသင့် ကျေးရွာများသို့ လှေငယ်(၁၀၀)ကျော် စေလွှတ်ကာ လူပေါင်း (၄၀၀၀)ကျော် ကို ဘေးလွတ်ရာ ရွှေ့ပြောင်းပေးပြီးဖြစ်ကြောင်း သိရှိရသည်။
Ref: Channelnewsasia
7Day DAILY
No comments:
Post a Comment