တရုတ်ဗဟို အစိုးရ ထံမှ လွတ်လပ်ခွင့် ပိုရရန် တောင်းဆို နေကြသော ဟောင်ကောင် ဒီမိုကရေစီ အရေး လှုပ်ရှားသူ ခေါင်းဆောင် နှစ်ဦးနှင့် ဗြိတိန် ဒုတိယ ဝန်ကြီးချုပ် နစ်ကလက် (Nick Clegg)တို့ တွေ့ဆုံခဲ့ကြရာ ဗြိတိန်သည် တရုတ် ပြည်တွင်းရေးကို ဝင်ရောက် စွက်ဖက် နေကြောင်း တရုတ် နိုင်ငံက ဗုဒ္ဓဟူးနေ့က စွပ်စွဲခဲ့သည်။
ဟောင်ကောင်၏ အတိုက်အခံ ဒီမိုကရက်တစ် ပါတီ ကို တည်ထောင် ခဲ့သူ မာတင်လီး (Martin Lee) နှင့် ဟောင်ကောင် မြို့တော် အစိုးရ အဖွဲ့၏ နံပါတ်နှစ် ခေါင်းဆောင်ဟောင်း အန်ဆွန်ချမ်း (Anson Chan) တို့အား ဗြိတိန် ဒုဝန်ကြီးချုပ်မှ အင်္ဂါနေ့က တွေ့ဆုံ ခဲ့သဖြင့် ဗြိတိန်အား တရုတ် နိုင်ငံက လေးလေး နက်နက် ဆန့်ကျင် ကန့်ကွက် လိုက်ကြောင်း တရုတ် အစိုးရပိုင် ရှင်ဟွာ (Xinhua) သတင်း ဌာနတွင် ဖော်ပြ ထားသည်။
“ဗြိတိန် လုပ်သွား ခဲ့တာက တရုတ်ရဲ့ ပြည်တွင်းရေးကို ဝင်ရောက် စွက်ဖက် သွားတာပါ။ တရုတ်နိုင်ငံ အနေနဲ့ အဲဒါကို အပြင်းအထန် ဆန့်ကျင် ကန့်ကွက် ပါတယ်” ဟု တရုတ် နိုင်ငံခြားရေး ဝန်ကြီး ဌာနမှ ပြောရေး ဆိုခွင့်ရှိသူ ဟွန်လေး (Hong Lei) က ဆိုသည်။
“ဟောင်ကောင် ကိစ္စတွေဟာ တရုတ် ပြည်တွင်းရေး ဆိုတဲ့ ခေါင်းစဉ် အောက်မှာ ရှိပါတယ်။ ဘယ်နိုင်ငံက ဘာအကြောင်း ပြချက်နဲ့ပဲ ဖြစ်ဖြစ် ဟောင်ကောင် ကိစ္စတွေမှာ ဝင်ရောက် စွက်ဖက် လာမှု မှန်သမျှကို တရုတ်နိုင်ငံ အနေနဲ့ ပြတ်ပြတ် သားသား ဆန့်ကျင် ပါတယ်” ဟု ဟွန်က ဆိုသည်။
၁၉၉၇ ခုနှစ်တွင် တရုတ် အစိုးရ လက်အောက်သို့ ပြန်လည် လွှဲပြောင်း ပေးခြင်း ခံခဲ့ရသည့် ဗြိတိန် ကိုလိုနီဟောင်း ဟောင်ကောင်တွင် တရုတ် ဗဟို အစိုးရ အပေါ် မကျေနပ် မှုများ နှစ်ပေါင်းများစွာ အတွင်း အမြင့်ဆုံး အဆင့်သို့ ရောက်ရှိ လာခဲ့သည်။ ၂ဝ၁၇ ခုနှစ် ဟောင်ကောင် ခေါင်းဆောင် ရွေးကောက်ပွဲ အတွက် ကိုယ်စားလှယ် လောင်းများအား တရုတ် အစိုးရ ကသာ စိစစ် ရွေးချယ်မည် ဆိုခြင်းကို ဟောင်ကောင် သားများ မကျေနပ် ကြခြင်း ဖြစ်သည်။
ဟောင်ကောင်ကို တရုတ် နိုင်ငံမှ လွှဲပြောင်း ရယူခဲ့စဉ်က သဘော တူညီချက် ဖြစ်သော “တစ်နိုင်ငံ စနစ်နှစ်မျိုး” မူဝါဒအရ ဟောင်ကောင် သားများ အနေဖြင့် လွတ်လပ်စွာ ထုတ်ဖော် ပြောဆိုခွင့် နှင့် စုဝေး ဆန္ဒပြခွင့်များ အပါအဝင် တရုတ် ပြည်မကြီးတွင် မရရှိသော လွတ်လပ်ခွင့် များကို ရရှိကြသည်။ သို့ရာတွင် ထိုလွတ်လပ်ခွင့် များ ဆုတ်ယုတ် လျော့ပါး လာခြင်းကြောင့် ဟောင်ကောင်သား များ၏ စိုးရိမ်မှုများ မြင့်တက် လာခဲ့ ကြသည်။
Mizzima - News in Burmese
No comments:
Post a Comment