သွေးလွန်တုပ်ကွေး ဖြစ်ပွားနှုန်း အများဆုံး တိုင်းဒေသကြီး စာရင်းဝင် ရန်ကုန်တိုင်းဒေသကြီးတွင် ယခုနှစ် ဇန်နဝါရီလဆန်းမှ မေလ တတိယပတ်အထိ သွေးလွန်တုပ်ကွေး ဖြစ်ပွားသူ ၃၇၇ ဦးရှိပြီး အသက် ၅ နှစ်မှ ၉ နှစ်ကြားရှိ ကလေးသုံးဦး သေဆုံးခဲ့ကြောင်း ရန်ကုန်တိုင်းဒေသကြီး ကျန်းမာရေး ဦးစီးဌာနထံမှ စုံစမ်းသိရှိရသည်။
၂၀၁၃ ခုနှစ်က သွေးလွန်တုပ်ကွေး ဖြစ်ပွားမှုနှုန်း မြင့်တက်ခဲ့သော်လည်း ယခုနှစ်တွင် ဖြစ်ပွားသူ သိသိသာသာ လျော့နည်း သွားခဲ့ကြောင်း၊ သွေးလွန်တုပ်ကွေး ဖြစ်ပွားနှုန်းများသော ဧပြီလနှင့် မေလတွင် ဖြစ်ပွားသူ ၁၇၀ နီးပါးသာ ဖြစ်ပွားကြောင်း အဆိုပါ ဦးစီးဌာနက ထုတ်ပြန်ထားသည်။
“တစ်နှစ်ဖြစ်ပြီးရင် နောက်တစ်နှစ်က ကျသွားတတ်တယ်။ ဆေးရုံကို အဖျားရှိတဲ့ လူနာတွေ လာပေမယ့် သွေးလွန်တုပ်ကွေးတော့ မဟုတ်ဘူး။ မနှစ်နဲ့ယှဉ်ရင် ဖြစ်ပွားနှုန်းက သာမန်ပဲ” ဟု ရန်ကင်း ကလေးဆေးရုံ ဆေးရုံအုပ်ကြီး ဒေါက်တာ အောင်မြင့်လွင်က The Voice သို့ ရှင်းပြသည်။
ကျန်းမာရေး အသိုက်အဝန်းကလည်း ၂၀၁၄ ခုနှစ်တွင် သွေးလွန်တုပ်ကွေး ဖြစ်ပွားနှုန်း လျော့ကျနိုင်ကြောင်း သုံးသပ်ကြသည်။
ရန်ကင်း ကလေးဆေးရုံကြီးတွင် ၂၀၁၃ ခုနှစ်က သွေးလွန်တုပ်ကွေး ဖြစ်ပွားသူ ၂၄၀၀ ကျော်ကို ကုသခဲ့ပြီး သေဆုံးသူ ၁၇ ဦးထိ ရှိခဲ့သော်လည်း ယခုနှစ် ဇန်နဝါရီလမှ ဧပြီလကုန်အထိ သွေးလွန်တုပ်ကွေး ဖြစ်ပွားသူ ၁၄၀ ဦးသာ ရှိခဲ့ကြောင်း ဒေါက်တာအောင်မြင့်လွင်က ပြောကြားသည်။
ယင်းအပြင် ရန်ကုန်တိုင်းဒေသကြီးအတွင်း သွေးလွန် တုပ်ကွေး ဖြစ်ပွားနှုန်းသည် ဇန်နဝါရီလတွင် ၁၀၆ ဦး၊ ဖေဖော်ဝါရီလတွင် ၅၁ ဦး၊ မတ်လတွင် ၅၀ ဦး၊ ဧပြီတွင် ၅၉ ဦးနှင့် မေလ တတိယ သီတင်းပတ်အထိ ၁၁၁ ဦး ရှိခဲ့ကြောင်း တိုင်းဒေသကြီး ကျန်းမာရေး ဦးစီးဌာနက ထုတ်ပြန်ထားသည်။
ရန်ကုန်တိုင်းဒေသကြီးတွင် ၂၀၁၃ ခုနှစ် အတွင်းက သွေးလွန်တုပ်ကွေး ဖြစ်ပွားသူ ၄၇၃၀ ဦးရှိခဲ့ပြီး သေဆုံးသူ ၃၂ ဦးထိ ဖြစ်ပွားခဲ့၍ ခြောက်နှစ်အတွင်း ဆိုးရွားသော သွေးလွန်တုပ်ကွေး ဖြစ်ပွားသောနှစ်ဟု သတ်မှတ်ထားခဲ့သည်။
The Voice Weekly
No comments:
Post a Comment