Friday 13 March 2015

နယ်စပ်ကုန်သွယ်ရေး လုပ်ငန်းတွင် မြန်မာ့ ထွက်ကုန်ဈေးကွက်အား နိုင်သားတို့ စီမံခန့်ခွဲမှုအောက်ထားရန် လွှတ်တော်အတည်ပြု

အိမ်နီးချင်း နိုင်ငံများနှင့် မြန်မာ့ ထွက်ကုန်ပစ္စည်းများ နယ်စပ်ကုန်သွယ်ရေး စခန်းတို့၌ ရောင်းချရာတွင် ကုန်ဈေးနှုန်းကို မြန်မာနိုင်ငံသားများကသာလျှင် စီမံခန့်ခွဲခွင့်ပြုနိုင်ရန် အစိုးရအား တိုက်တွန်းကြောင်း အဆိုတစ်ရပ်ကို တင်သွင်းရာ ပြည်သူ့လွှတ်တော်က ကန့်ကွက်သူမရှိ အတည်ပြုလိုက်သည်။
အဆိုရှင် ပြည်သူ့လွှတ်တော် ကိုယ်စားလှယ် သူရဦးအောင်ကိုက “နယ်စပ်ကုန်သွယ်ရေး စခန်းများတွင် မြန်မာ့ ကုန်ပစ္စည်းဈေးကွက် ကို မြန်မာနိုင်ငံသားများ၏ လက်ဝယ် ထိန်းချုပ်ထားရှိနိုင်အောင် အခြေအနေပေးသော နယ်စပ်ကုန်သွယ်ရေး စခန်းများကို ဦးစားပေးအဆင့်သတ်မှတ်လျက် အဆင့်ဆင့် စီမံဆောင်ရွက်ပေးပါရန် ပြည်ထောင်စု အစိုးရအား တိုက်တွန်းကြောင်း အဆိုတင်ပြပါတယ်” ဟု ပြောသည်။

ထို့အပြင် နယ်စပ်ကုန်သွယ်ရေး စခန်းများတွင် ကုန်ပစ္စည်း သိုလှောင်ရုံများနှင့် ရေထွက်ကုန်ပစ္စည်းများ သိုလှောင်နိုင်ရန် အအေးခန်းများ တည်ဆောက်ပေးရန်လည်း အဆိုရှင်က တစ်ဆက်တစ်စပ်တည်း တောင်းဆိုလိုက်သည်။
မြန်မာနိုင်ငံသည် ၁၉၉ဝ ပြည့်နှစ်နောက်ပိုင်း တပ်မတော်အစိုးရ လက်ထက်တွင် နိုင်ငံတကာ၏ စီးပွာရေးပိတ်ဆို့ ခံခဲ့ရခြင်းကြောင့် အိမ်နီးချင်းနိုင်ငံများနှင့်သာ နယ်စပ်ကုန်သွယ်ရေး (Border Trade) ကိုသာ အဓိက ဆောင်ရွက်ခဲ့ရကြောင်းလည်း ၎င်းက ဖြည့်စွက်ပြောသည်။
စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန ဒုတိယဝန်ကြီး ဒေါက်တာပွင့်ဆန်းက “နယ်စပ်အနီးမှာ တစ်ဖက်နိုင်ငံမှ ကုန်သည်များအား ဈေးပြိုင်စနစ်ဖြင့် ရောင်းချနိုင်ခြင်း၊ ဈေးကွက်အသာစီးရခြင်း တို့ကြောင့် ပို့ကုန်၊ သွင်းကုန်လုပ်ငန်း လုပ်ကိုင်နေသော ကုန်သည်လုပ်ငန်းရှင်များ အနေနဲ့ အကျိုးအမြတ်ပိုမိုရရှိကာ မိမိကုန်ပစ္စည်းကို ကြိုက်ဈေးနဲ့ ထိန်းချုပ်ရောင်းချနိုင်တာကို တွေ့ရှိရပါတယ်” ဟု ဆိုသည်။
ကုန်သွယ်ရေး ဇုန်များအား ပွဲရုံ၊ သိုလှောင်ရုံများ ဆောက်လုပ်နေသော်လည်း အအေးခန်းစက်ရုံ၊ သစ်သီးကုန် စည်ဒိုင်၊ ကုန်စည်ပြပွဲ ကျင်းပရေး အဆောက်အအုံများ ဆောက်လုပ်ရန် ကျန်ရှိနေသေးသဖြင့် ကုမ္ပဏီများနှင့် ပေါင်းစပ်ဆောင်ရွက်နေပါကြောင်းလည်း ၎င်းက ဖြည့်စွက်ပြောသည်။
သို့ရာတွင် သူရဦးအောင်ကိုကမူ “အိန္ဒိယကုန်သည်များထံ အပ်ကုန်စနစ်ဖြင့် အကြွေးရောင်းရခြင်းဖြစ်ပြီး နောက်တစ်ကြိမ် ကုန်ပစ္စည်းပေးအပ်ချိန်မှသာ ကြွေးဟောင်းပြန်ရတဲ့စနစ် ဖြစ်ပါတယ်” ဟု ထောက်ပြသည်။
ယင်းအပ်ကုန်များအပေါ် ဈေးခုနှိမ်ပြီး တန်ရာတန်ဖိုး အပြည့်အဝမရခြင်း၊ အချို့ကုန်သည်များက လိမ်လည် တိမ်းရှောင်သွားခြင်းများ ရှိနေခြင်းကြောင့် မြန်မာနိုင်ငံသား ကုန်သည်များ လုံးဝဆုံးရှုံးမှုများ မကြာခဏ ကြုံတွေ ရကြောင်းလည်း ၎င်းက ရှင်းပြသည်။
ဒုတိယဝန်ကြီးက လွှတ်တော် ကိုယ်စားလှယ်တင်သွင်းသည့် အဆိုကို “စိုက်ပျိုးထုတ်လုပ်သူ တောင်သူများ၊ စက်ရုံအလုပ်ရုံများ၊ ကုမ္ပဏီလုပ်ငန်းရှင်များ အပါအဝင် မြန်မာတိုင်းရင်းသား လုပ်ငန်းရှင်များရဲ့ ရေရှည်အကျိုးစီးပွားကို ရည်ရွယ်ထားခြင်းဖြစ်လို့ ဆောင်ရွက်သင့် တဲ့ လုပ်ငန်းများဖြစ်ပါတယ်” ဟု သုံးသပ်သည်။
ကန်ပက်လက်မဲဆန္ဒနယ် ပြည်သူ့လွှတ်တော် ကိုယ်စားလှယ် သူရဦးအောင်ကို တင်သွင်းခဲ့သော အဆိုအား တက်ရောက် ကိုယ်စားလှယ်များက ကန့်ကွက်သူမရှိ ထောက်ခံခဲ့သည့်အတွက် ပြည်သူ့လွှတ်တော် ဥက္ကဋ္ဌ သူရဦးရွှေမန်းက အဆိုကို အတည်ပြုလိုက်ပြီး ဆွေးနွေးလိုသူများအား ယခုလ ၁၆ ရက် နောက်ဆုံးထား စာရင်းပေး ရန်လည်းပြောသည်။
Mizzima - News in Burmese

No comments:

Post a Comment