Friday 13 March 2015

တစ်ကျော့ပြန် ဖုန်ကြားရှင်နဲ့ တရားခံ စိုင်းလင်း

ရှမ်းပြည်နယ်မြောက်ပိုင်း၊ ကိုးကန့်ကိုယ်ပိုင်အုပ်ချုပ်ခွင့်ရဒေသအား တစ်ကျော့ပြန်တိုက်ခိုက်လာသော ဖုန်ကြားရှင် ကိစ္စနှင့် ပတ်သက်၍ နောက် ကွယ်ကနေ ကူညီထောက်ပံ့ပေးသူရှိနေသည်ဟု အားလုံးက ယူဆနေကြပါ သည်။ မှန်ပါသည်။ ဖုန်ကြားရှင်သည် လွန်ခဲ့သော ၂၀၀၉ ခုနှစ်က ကိုးကန့်ဒေသမှ ပျောက်ကွယ်သွားပြီး ယခု ၂၀၁၅ ခုနှစ် အစောပိုင်းတွင် ဗြုန်းစားကြီး ပြန်လည်ပေါ်ပေါက်လာခြင်းမှာ သမရိုးကျတော့ မဟုတ်ပေ။ ဖုန်ကြားရှင်အား အစစ အရာရာ ပံ့ပိုးကူညီခဲ့သူကတော့ သမက်ဖြစ်သူ NDAA ဥက္ကဌ ဦးစိုင်းလင်း သာဖြစ်ပါသည်။

ဖုန်ကြားရှင်အား မူးယစ်ဆေးဝါးကိစ္စ၊ လက်နက်စက်ရုံကိစ္စတို့ဖြင့် အစိုးရမှ ဥပဒေနှင့်အညီ စစ်ဆေးအရေးယူနိုင်ရေး အတွက် ဆင့်ခေါ်ရာ လာရောက်ခြင်း မရှိဘဲ ထွက်ပြေးသွားပြီး မိုင်းလားနယ်မြေ၌ ခိုလှုံခဲ့သည်ဟု သိရပါသည်။ ဤသို့ဖြင့် မိုင်းလားရောက်လာသော တရားခံပြေး ဖုန်ကြားရှင်အား သမက်ဖြစ် သူ ဦးစိုင်းလင်းက နေရာထိုင်ခင်း စီစဉ်ပေးကာ ခိုလှုံခွင့်ပေးခဲ့သည်။ ဖုန်ကြားရှင်အတွက် လူသူအရောက်အပေါက်နည်းတဲ့ အစွန်အဖျားက မိုင်းယောင်း ကွင်း အထက်ပိုင်းလောက်မှာ ရွာကြီးတစ်ရွာတည်ပြီး နေရာ ချထားပေးခဲ့သည်ဟု သိရသည်။ ဖုန်ကြားရှင်ထွက်ပြေးပြီး နောက်ပိုင်း မိုင်းလားတွင် နေထိုင်ခဲ့သလို တရုတ်နိုင်ငံမှာလည်း ဘဏ်လုပ်ငန်း၊ ဟိုတယ်လုပ်ငန်းများဖြင့် ရင်းနှီးမြှုပ်နှံ ကာ နေထိုင်ခဲ့ပါသည်။
ဦးသိန်းစိန် ဦးဆောင်သော အစိုးရတက်လာချိန်တွင် ဦးစိုင်းလင်းက အခွင့် အကောင်းယူကာ ဖုန်ကြားရှင်အတွက် တောင်းဆိုမှုများ ပြုလုပ်ပေးခဲ့ပါသည်။ ၂၀၁၁ ခုနှစ် နိုဝင်ဘာ ၁၄ ရက်တွင် ဦးစိုင်းလင်းမှ ဖုန်ကြားရှင်အား ဖမ်းဝရမ်း ရုတ်သိမ်း၍ တိုင်းရင်းသားလူမျိုးပေါင်းစုံထံ ပြန်လည်ဝင်ရောက်နိုင်ရန်အတွက် နိုင်ငံတော်မှ လက်ခံပေးပါရန် နိုင်ငံတော် သမ္မတထံ အသနားခံစာ တင်ပြ လာခဲ့သည်။ နိုင်ငံတော်သမ္မတကလည်း တိုင်းရင်းသားစည်းလုံးညီညွတ်ရေး ကို ရှေ့ရှုပြီး လွတ်ငြိမ်းချမ်းသာခွင့်ပေးခဲ့ပါသည်။
ထိုကဲ့သို့ ဦးစိုင်းလင်းတို့အပေါ် စေတနာထားခဲ့သော နိုင်ငံတော်သမ္မတကြီး၏ မျက်နှာကိုမှမထောက် လောက်ကိုင် နယ်မြေကို ဖုန်ကြားရှင်အဖွဲ့ ၀င်တိုက် တာကတော့ နိုင်ငံတော်အပေါ် သစ္စာဖောက်ရာရောက်ပါသည်။ အစိုးရနှင့် NDAA (မိုင်းလား) အဖွဲ့တို့၏ ငြိမ်းချမ်းရေးလမ်းစဉ်တွေကို လိုက်နာခဲ့သည်ဆို လျှင် ဖုန်ကြားရှင်အား ယခုကဲ့သို့ လုပ်ခွင့်မပြု သင့်ပေ။ ဖုန်ကြားရှင်အဖွဲ့ ယခုလိုလုပ်နိုင်အောင် ကူညီပေးခဲ့ခြင်းဟာ သစ္စာမဲ့ခြင်းဖြစ်ပြီး သစ္စာရှိရင် ဦးစိုင်းလင်းအနေနဲ့ မလုပ်သင့်ဘူးလို့သာ မြင်ပါသည်။ နိုင်ငံတော် သမ္မတ၏ စေတနာကို စော်ကားလိုက်သည်နှင့် အတူတူပင်ဖြစ်ပါသည်။
ဖုန်ကြားရှင်ကို ဦးစိုင်းလင်း ကူညီခဲ့တာ ဟုတ်မဟုတ် လောက်ကိုင်ကို ၀င်တိုက်သော ကိုးကန့်သောင်းကျန်းသူအဖွဲ့၏ အခြေအနေကို ကြည့်ခြင်း အားဖြင့် သိနိုင်ပါသည်။ ထွက်ပြေးသွားခဲ့သော ဖုန်ကြားရှင်တွင် အဖွဲ့ဝင် အင်အား ၁၀၀ ခန့် လောက်သာ ပါသွားခဲ့ပါသည်။ ယခုအင်အား ၁၀၀၀ လောက်အထိ အဆမတန် များပြားလာပါသည်။ ထိုကဲ့သို့ အင်အားထောင်ချီ ရှိလာသော ကိုးကန့်သောင်းကျန်းသူအဖွဲ့ဝင်များ ကိုင်ဆောင်အသုံးပြုသည့် လက်နက်များစွာ၏ ကုန်ကျစရိတ်တန်ဖိုးမှာ နည်းလှသည်မဟုတ်ပေ။ ယင်းလက်နက်များအတွက် ကုန်ကျစရိတ်ကို ဖုန်ကြားရှင် ဘယ်ကရ ပါသလဲ မေးစရာ ဖြစ်လာသည်။
မိုင်းလားနယ်မြေထဲကရသည်ဟု ဆိုရပါမည်။ ဖုန်ကြားရှင်သည် မူးယစ်ဆေးဝါးနှင့် အခြားနည်းလမ်းများမှ ရရှိသော ငွေကြေးပိုင်ဆိုင်မှုများကို မိုင်းလားတွင် ရင်းနှီးမြှုပ်နှံမှုပြုလုပ်ထားခဲ့သည်။ ဖြစ်နိုင်ပါသည်။ အဘယ့်ကြောင့်ဆိုသော် မိုင်းလားနယ်မြေတွင် ကာစီနိုလောင်းကစားရုံများနှင့် မူးယစ်ဆေးဝါး ရောင်းဝယ်ဖောက်ကားရာ နေရာအဖြစ်ရှိနေသော ကြောင့် ဖြစ်ပါသည်။ မိုင်းလားမြို့နှင့် အနည်းငယ်လှမ်းသော ၀မ်သျှိုးရွာမှာ ဦးစိုင်းလင်း ပိုင် ကာစီနိုလောင်းကစားရုံများ ရှိပါသည်။ ထိုလောင်းကစားရုံများနှင့် တွဲလျက် အနှိပ်ခန်း၊ KTV တို့ ဖွင့်လှစ်ထားပြီး မူးယစ်ဆေးဝါး ရောင်းဝယ် ဖောက်ကား ရာ ဈေးကွက်တစ်ခုလို ဖြစ်နေပါသည်။ မိုင်းလားနယ်မြေကို မူးယစ်ဆေးဝါး ကင်းစင်သောဒေသအဖြစ် ကြေညာထားသော်လည်း ကြိုက်သည့်အိမ်ကို ၀င်ရှာကြည့်ပါက မူးယစ်ဆေးဝါးများကို ဖမ်းဆီးရမိမည်သာဖြစ်သည်။ ထိုကဲ့သို့ နေရာမျိုးတွင် ဖုန်ကြားရှင်က ငွေကြေးရင်းနှီးမြှုပ်နှံကာ လက်နက်များစွာကို ဖြည့်တင်းခဲ့ခြင်း ဖြစ်ပါသည်။
ဦးစိုင်းလင်းအနေနှင့် ရှေ့တွင် အစိုးရအဖွဲ့နှင့် လက်ဆွဲနှုတ်ဆက် ပြုံးပြနေပေ မယ့် နောက်ကွယ်မှာတော့ အခြားလက် တစ်ဖက်ဖြင့် ဖုန်ကြားရှင်အား ကူညီထောက်ပံ့ပေးနေသည်ကို တွေ့ရှိရပါသည်။ အစိုးရနှင့် ရရှိထားသော ငြိမ်းချမ်းရေး အပါအ၀င် စီးပွားရေးလုပ်ငန်းများ၊ ရေရှည်အကျိုးစီးပွား တည်မြဲရေးတို့အတွက် ပြေလည်ချင်ရင် ဦးစိုင်းလင်းအနေနဲ့ ဖုန်ကြားရှင်ကို အစိုးရလက်ထဲအပ်ဖို့ကောင်းပါသည်။ သို့ဆိုလျှင် ဦးစိုင်းလင်းအပေါ် သံသယဖြစ်နေသည့် ဖုန်ကြားရှင် ကိစ္စများသည်လည်း ပြေလည်သွားနိုင်သလို အစိုးရနှင့် ဆက်လက် လက်တွဲသွားနိုင်မည် ဖြစ်ပါသည်။
ထိုကဲ့သို့ ယုံကြည်မှုများအတွက် အကြပ်အတည်းဆိုက်နေချိန်တွင် ဦးစိုင်းလင်း အနေဖြင့် ဖုန်ကြားရှင်ကို အစိုးရလက်ထဲ မအပ်ခဲ့လျှင် နောက်ထပ်ပြဿနာများ ပေါ်လာနိုင်ပါသည်။ အတွင်းသတင်းများအရ ဦးစိုင်းလင်းသည် တရုတ်ပတ်စ်ပို့ နှင့် ဟောင်ကောင်ပတ်စ်ပို့ နှစ်ခုလုံးကိုင်ထားသည်ဟု သိရပါသည်။ အခြေအနေမဟန်ပါက မိုင်းလားကနေ တစ်ဖက်နိုင်ငံ များဆီ ထွက်ပြေးခုံလှုံရန် ကြိုတင်ကြံစည်ထားသလား စဉ်းစားစရာဖြစ်လာပါသည်။ ဦးစိုင်းလင်းအနေနဲ့ ဖုန်ကြားရှင်ကို အစိုးရလက်ထဲအပ်မလား ဒါမှမဟုတ် တရုတ်နိုင်ငံသားလိုလို ဟောင်ကောင်နိုင်ငံသားလိုလိုနဲ့ ရှာဖွေစုဆောင်း ပိုင်ဆိုင် ထားတဲ့ ပစ္စည်း ဥစ္စာတွေ ကို စွန့်လွှတ်ပြီး တစ်ဖက်နိုင်ငံ ပြေးဝင်မလား တစ်ခုခုကိုသာရွေးချယ် ရပါမည်။ လက်ရှိအခြေ အနေအရ ဖုန်ကြားရှင်ကိစ္စ တရားခံဘယ်သူလဲဆိုပြီး လက်သယ်ရှာနေတဲ့အချိန် ဦးစိုင်းလင်း၏ လုပ်ရပ်များကြောင့် တရားခံဟု သတ်မှတ်လိုက်ရင် ဆုံးရှုံးမှုကြီးမားသွားမည်ဟူ၍သာ ဆိုချင်ပါသည်။
လင်းသန့်
နေ့စဉ်သတင်း

No comments:

Post a Comment