Friday 13 March 2015

ထိကရိမြို့သိမ်းပွဲ အီရတ်အစိုးရ ပူးပေါင်းတပ် အသာစီးရ


အီရတ်နိုင်ငံ ထိကရိ မြို့ တိုက်ပွဲမှာ အစ္စလာမ်မစ် လက်နက်ကိုင် IS တွေကို တိုက်နေကြတဲ့ အီရတ်အစိုးရတပ်နဲ့ ပူးပေါင်း ရှီအာတပ်တွေဟာ အသာစီး ရနေပါတယ်။
ဒီ ထိကရိ မြို့သိမ်းတိုက်ပွဲဟာ အီရတ်နိုင်ငံအတွင်း IS တွေအပေါ် အကြီးမားဆုံး စစ်ရေး ထိုးစစ်ဆင်မှု ဖြစ်ပါတယ်။

အခုဆိုရင် ထိကရိရဲ့ နေရာအများစုဟာ အစိုးရတပ် နဲ့ ပူးပေါင်းအဖွဲ့တွေရဲ့ ထိန်းချုပ်မှုအောက် ရောက်ရှိသွားပြီ ဖြစ်ပေမယ့် တိုက်ပွဲတွေတော့ ဆက်လက် ဖြစ်နေဆဲ ဖြစ်ပါတယ်။
IS တွေဟာ မြို့လယ်အပါအဝင် အနည်းဆုံး ရပ်ကွက် ၄ ခု လောက်ကို ဆက်လက် ထိန်းချုပ်ထားဆဲ ဖြစ်ပြီး မြို့လယ် ဦးတည် ထိုးဖောက်လာနေတဲ့ အစိုးရတပ်တွေ ဟာ IS တွေ ထောင်ထားတဲ့ လမ်းဘေးတလျှောက် ဗုံးတွေကြောင့် နှောင့်နှေးနေရပါတယ်။
အခုဆိုရင် ထိကရိမြို့ထဲမှာ IS တိုက်ခိုက်ရေးသမား ၁၀၀ လောက်ပဲ ကျန်တော့မယ်ဆိုပြီး ပြောနေတဲ့ သတင်းတွေလည်း ရရှိထားပါတယ်။
တခါ၊ ဆီးရီးယားက ကာ့ဒ် တပ်ဖွဲ့ဝင်တွေနဲ့ သွားရောက် ပူးပေါင်းပြီး IS တွေကို တိုက်ခိုက်နေကြတဲ့ ဗြိတိသျှ နိုင်ငံသားတချို့နဲ့ ဘီဘီစီ စကားပြောခဲ့ပါတယ်။
အဲဒီ့ထဲက ၂ ဦး ကတော့ တစ်ဦးက စစ်သားဟောင်း ဖြစ်ပြီး တစ်ဦးကတော့ မြို့ပေါ်မှာ အရောင်းအဝယ်လုပ်သူပါ။
သူတို့နဲ့အတူ လက်တွဲ တိုက်ခိုက်ခဲ့တဲ့ တော်ဝင် ရေတပ်မတော်မှာ အမှုထမ်းခဲ့ဖူးသူ Konstandinos Erik Scurfield ကတော့ ပြီးခဲ့တဲ့ သီတင်းပတ်ကပဲ ကျဆုံးသွားပြီလို့ ဆိုပါတယ်။
ကာ့ဒ် တပ်ဖွဲ့ဝင်တွေနဲ့ လာရောက် ပူးပေါင်း တိုက်နေကြတဲ့ အမေရိကန်နဲ့ ဩစတြေးလျ နိုင်ငံသားတွေလည်း ရှိနေပါတယ်။
အဲဒီလို မိမိတို့ ဆန္ဒအလျောက် လာရောက် ပူးပေါင်းကြသူတွေထဲက အများစုဟာ စစ်ရေးအတွေ့အကြုံ မရှိကြသူတွေ များပါတယ်။
ဆီးရီးယား ရောက်စ အခြေခံစစ်သင်တန်း ၁၀ ရက်လောက် တက်ပြီးတဲ့နောက် တိုက်ပွဲတွေမှာ ပါဝင်ခဲ့ကြတာပါ။
အခုဆိုရင် အကျအဆုံးတွေ များလာနေတယ် ဆိုပြီး ဘီဘီစီ သတင်းထောက်က ဆိုပါတယ်။
ဒီ အချိန်မှာပဲ၊ နိုင်ဂျီးရီးယားက အစ္စလာမ်မစ် စစ်သွေးကြွ ဘိုကိုဟာရမ်တွေရဲ့ သစ္စာခံမှုကို IS တွေက လက်ခံလိုက်ပုံရပါတယ်။
IS ခေါင်းဆောင် Abu Bakr al-Baghdadi ရဲ့ ကိုယ်စားဆိုပြီး ထုတ်ပြန်ခဲ့တဲ့ အသံသွင်းပြောဆိုချက်ထဲမှာ ကျွန်ုပ်တို့ရဲ့ ညီအစ်ကိုတော်တွေကို ကြိုဆိုပါတယ် ဆိုပြီး ပါဝင်ပါတယ်။
ဒါ့အပြင် IS တွေ တည်ဆောက်ဖို့ ရည်ရွယ်ထားတဲ့ ခါလီဖိတ်ဆိုတဲ့ အစ္စလာမ်မစ် နိုင်ငံတော်ကြီးဟာ အနောက် အာဖရိက ဒေသထိ ပြန့်နှံ့ခဲ့တဲ့အတွက် ဒါဟာ သတင်းကောင်း ဖြစ်တယ်လို့လည်း ဆိုထားပါတယ်။
ဒီ အသံသွင်း ထုတ်ပြန်ချက်ဟာ IS တွေရဲ့ ထုတ်ပြန်ချက် တကယ် ဟုတ်မဟုတ် သီးခြား အတည်ပြုမှုတော့ မရသေးပါဘူး။
BBC Burmese

No comments:

Post a Comment