အမျိုးသား ဒီမိုကရေစီအဖွဲ့ချုပ် ဥက္ကဌဒေါ်အောင်ဆန်းစုကြည်သည် ၂၀၁၄ ခုနှစ် ဒီဇင်ဘာ ၁၉ ရက်နေ့ နံနက်ပိုင်းက ကော့မှူးမြို့နယ် အထွေထွေ အုပ်ချုပ် ရေး ဦးစီးဌာန၊ မြို့နယ် အုပ်ချုပ်ရေးမှူးရုံးတွင် ကော့မှူးမြို့နယ် မဲဆန္ဒရှင်များ၊ ကော့မှူး အုပ်ချုပ်ရေး အဖွဲ့အစည်းများနှင့် ဒေသဖွံ့ဖြိုးရေး ကိစ္စများအတွက် သွားရောက်တွေ့ဆုံစဉ်။ (ဓာတ်ပုံ - ငြိမ်သစ်ညီ၊ မဇ္ဈိမ)
လက်ပံတောင်း ပဋိပက္ခသည် လက်ပံတောင်းတောင် ကြေးနီစီမံကိန်း စုံစမ်း စစ်ဆေးရေး ကော်မရှင်၏ အကြံပြုချက်များကို အကောင်အထည် ဖော်ရေး ကော်မတီက လိုက်နာဆောင်ရွက်ခြင်း မရှိသောကြောင့် ဖြစ်ရသည် ဟူသော ဒေါ်အောင်ဆန်းစုကြည် ပြောကြားမှုနှင့် ပတ်သက်ပြီး ထိုသို့မဟုတ်ကြောင်း အကောင်အထည်ဖော်ရေး ကော်မတီ အတွင်းရေးမှူး ဦးတင်မြင့်က မီဒီယာကို ပြောသည်။
“ကော်မရှင်ရဲ့ အကြံပြုချက်တွေကို အလေးထား လိုက်နာဆောင်ရွက်နေတဲ့ အပြင် အကြံပြုချက်ထဲမှာ မပါတာတွေကိုပါ ဒေသခံ ပြည်သူတွေ အတွက် လုပ် ဆောင်ပေးနေပါတယ်” ဟု သမ္မတရုံးဝန်ကြီးဌာန အမှတ်(၆) က ယနေ့ပြုလုပ် သည့် သတင်းစာရှင်းလင်းပွဲတွင် ၎င်းက ဖြေကြားခဲ့ခြင်း ဖြစ်သည်။
ဒေါ်အောင်ဆန်းစုကြည် ဥက္ကဋ္ဌဖြစ်သည့် လက်ပံတောင်းတောင် ကြေးနီစီမံကိန်း စုံစမ်းစစ်ဆေးရေးကော် မရှင်တွင် ကော်မရှင်အစီရင်ခံစာ၊ အကြံပြုချက်တို့ကို အကောင်အထည်ဖော်ရသည့် လုပ်ငန်းကော်မတီ အတွင်းရေးမှူး ဦးတင်မြင့် လည်း အဖွဲ့ဝင်ဖြစ်ခဲ့သည်။ ကော်မရှင်၏ အကြံပြုချက် ၄၂ ချက် အနက် ၂၉ ချက် တို့ကို အကောင်အထည်ဖော်ရေး ကော်မတီက အလေးထားဆောင်ရွက် ခဲ့ပြီး ဖြစ်ကြောင်းနှင့် ဆောင်ရွက်နေဆဲ အချက် ၁၃ ချက်သာ ကျန်တော့ ကြောင်း လည်း ၎င်းကော်မတီ၏ နှစ်ပတ်လည် အစီရင်ခံစာ တွင် ဖော်ပြ ထားသည်။
လက်ပံတောင်းတောင် ကြေးနီစီမံကိန်းက မြေယာသိမ်းဆည်းမှုများအတွက် ခေတ်ကာလနှင့်ညီသော လျော်ကြေးများ တိုးပေးရေး၊ အစားထိုးမြေယာများ ချထားပေးရေး၊ စီမံကိန်းအတွက် မလိုသည့်မြေယာများကို ဒေသခံတို့အား ပြန်ချပေးရေး စသည်တို့ အပါအ၀င် မြေယာဆိုင်ရာ အကြံပြုချက် ရှစ်ချက်၊ သဘာဝပတ်ဝန်းကျင် မထိခိုက်ရေးဆိုင်ရာ ၂၃ ချက်၊ ဒေသခံတို့၏ လူမှုစီးပွား ဆိုင်ရာ ကိုးချက်နှင့် သာသနိက အဆောက်အအုံများနှင့် ပတ်သက်သည့် နှစ်ချက်ဟူ၍ အကြံပြုချက်ပေါင်း ၄၂ ချက်တို့တွင် မြေယာဆိုင်ရာ အကြံပြုချက် တစ်ချက်၊ သဘာဝပတ်ဝန်းကျင်ဆိုင်ရာ ၁၁ ချက်နှင့် လူမှုစီးပွားဆိုင်ရာ အချက်တစ်ချက် ပေါင်း ၁၃ ချက်သာ ဆောင်ရွက်ရန် ကျန်ရှိဟုလည်း ပြောသည်။
“မြေယာအကြံပြုချက်အရ လျော်ကြေးနဲ့ ထောက်ပံ့ကြေးတွေ ဆက်လက်ထုတ် ပေး နေပါတယ်။ သဘာဝ ပတ်ဝန်းကျင်အတွက်က ESIA အစီရင်ခံစာမူကြမ်းကို ဒုတိယအကြိမ် ပြင်ဆင်ဖြည့်စွက်နိုင်ဖို့ ဆောင်ရွက်နေပါတယ်။ တချို့လုပ်ငန်း တွေ က စီမံကိန်း စလည်တော့မှ ဆောင်ရွက်ရမယ့် လုပ်ငန်းတွေပါ” ဟုလည်း ၎င်းက ပြောသည်။
လူမှုစီးပွားအကြံပြုချက်တွင် ဆောင်ရွက်ရန် ကျန်နေသည့် တစ်ချက်ဖြစ်သော ဒေသခံတို့အား အလုပ်အကိုင်ခန့်ထားရေးနှင့် ပတ်သက်ပြီး “လူငယ် ၂၀၀ ကို လခပေးပြီး လုပ်ငန်းခွင်သင်တန်း တက်စေခဲ့ပေမယ့် ပြင်ပသွေးထိုးမှုတွေ ကြောင့် အကုန်လုံး ပြန်ထွက်သွားကြတယ်။ အလုပ်ခန့်ဖို့ကျတော့ စီမံကိန်းက မစသေးလို့ပါ။ အသေးစား အလတ်စားစက်မှု လုပ်ငန်းတွေအတွက်လည်း ဆောင်ရွက်နေပါတယ်” ဟု ဦးတင်မြင့်က ဖြည့်စွက်ပြောသည်။
ထို့အပြင် စုံစမ်းစစ်ဆေးရေးကော်မရှင်၏ အကြံပြုချက်များတွင် မပါဝင်သည့် ဒေသခံတို့ အလုပ်မရမီ စောင့်ဆိုင်းဆဲကာလအတွင်း စားဝတ်နေရေးအတွက် နှစ်စဉ် ထောက်ပံ့ကြေးများကို ခြောက်လ တစ်ကြိမ် ကြိုတင်ထုတ်ပေး လျက်ရှိသည်ဆို၏။
“ထောက်ပံ့ကြေးကို သိမ်းတဲ့လယ်ဧကအလိုက် ထုတ်ပေးထားပါတယ်။ ထောက်ပံ့ ကြေး အစီအစဉ်ကို ထောက်ခံတဲ့ ရွာသားတွေကို သူတို့ဆန္ဒအရ တချို့ကို ဘဏ်စာရင်းဖွင့်ထားပေးပြီး တချို့က ငွေလာထုတ် ကြပါတယ်” ဟုလည်း ၎င်းက ရှင်းပြသည်။
တောင်သူတို့အတွက် အချိုးကျ ရာနှုန်းလစာ (discount salary) အဖြစ် လယ်တစ်ဧကမှ ၁၀ ဧကအထိ အသိမ်းခံရသည့် တောင်သူအား တစ်လလျှင် အမေရိကန် ဒေါ်လာ ၇၀၊ ၁၀ ဧက မှ ၂၀ ဧကအထိကို ဒေါ်လာ ၁၂၀၊ ၂၀ ဧကနှင့် အထက်ကို ဒေါ်လာ ၁၆၀ နှုန်းဖြင့် ၂၀၁၄ သြဂုတ်လ ၆ ရက်မှ စတင်ထုတ် ပေးခဲ့ရာ စီမံကိန်း ဧရိယာကျေးရွာ ၃၃ ရွာမှ တောင်သူတစ်ထောင် ခန့်တို့ကို ထုတ်ပေးခဲ့ပြီး ၎င်းတို့ အနက် ၅၅၆ ဦးတို့ကို ဘဏ်စာရင်းဖွင့် ပေးထားကြောင်း၊ ၄၂၁ ဦးကိုမူ မြန်မာကျပ် ငွေသိန်း ခြောက်ထောင်ကျော် (၆၀၂၂ ဒသမ ၅၂ သိန်း)ထုတ်ပေးထားပြီးဖြစ်ကြောင်း သိရသည်။
“လက်ပံတောင်း စီမံကိန်းစုံစမ်းစစ်ဆေးရေးကော်မရှင်ရဲ့ အကြံပြုချက်တွေကို အလေးထား ဆောင်ရွက်နေတဲ့အပြင် အကြံပြုချက်မှာ မပါတဲ့ အခုလို ထောက်ပံ့မှုတွေကိုလည်း ဆောင်ရွက်နေပါတယ်။အခု ထပ်ဖြစ် တဲ့ ပဋိပက္ခ တွေက ကိုဟန်ဝင်းအောင်တို့လို ပြင်ပပယောဂတွေ လှုံဆော်သွေးထိုးမှုတွေ ကြောင့်သာ ဖြစ်ရတာပါ၊ စုံစမ်းရေးကော်မရှင်ဥက္ကဋ္ဌ ပြောသလို မဟုတ်ပါဘူး” ဟုလည်း ၎င်းက အတည်ပြု ပြောကြားခဲ့ သည်။
ဒေသခံတောင်သူများသည် မိမိတို့လိုလားချက်များကို လက်နက်စွဲကိုင်ခြင်း မရှိဘဲ ငြိမ်းချမ်းစွာ ဆန္ဒဖော် ထုတ်နိုင်သကဲ့သို့ လာရောက်ဆွေးနွေးညှိနှိုင်းပါက လည်း လက်ခံတွေ့ဆုံပြီး ပြေလည်သည်အထိ ဆောင်ရွက်ပေးသွားမည်ဟုလည်း ၎င်းက ဖိတ်ခေါ်ပြောကြားခဲ့သည်။
Mizzima - News in Burmese
No comments:
Post a Comment