တိုင်းရင်းသား လက်နက်ကိုင်များက နိုင်ငံရေးပါတီများနှင့် အရပ်ဘက် လူ့အဖွဲ့အစည်းတို့ကို ဆက်တိုက်တွေ့ဆုံ

ငြိမ်းချမ်းရေး တည်ဆောက်မှု ဖြစ်စဉ်၊ နိုင်ငံရေး ဆွေးနွေးပွဲများနှင့် ပတ်သက်၍ ပြည်တွင်းရှိ နိုင်ငံရေးပါတီများနှင့် အရပ်ဘက် လူမှုအဖွဲ့အစည်း များကို တိုင်းရင်းသား လက်နက်ကိုင် အဖွဲ့များက မတ်လ ၁၁ ရက်နှင့် ၁၂ ရက်နေ့များတွင် ဆက်တိုက် တွေ့ဆုံခဲ့ကြောင်း အဆိုပါ အဖွဲ့များထံမှ သိရသည်။

တိုင်းရင်းသား လက်နက်ကိုင်များ ကိုယ်စားပြု တစ်နိုင်ငံလုံး အပစ်အခတ် ရပ်စဲရေးဆိုင်ရာ ညှိနှိုင်းရေးအဖွဲ့ (NCCT) နှင့် ညီနောင် တိုင်းရင်းသားများ ဖက်ဒရေးရှင်း (NBF)၊ ရှစ်လေးလုံး ငွေရတု ဆုံးဖြတ်ချက် အကောင်အထည် ဖော်ရေး ကော်မတီတို့ မတ်လ ၁၁ ရက်နေ့တွင် သီးခြား တွေ့ဆုံပြီး တစ်နိုင်ငံလုံး အပစ်ရပ် စာချုပ်အတွက် အစိုးရနှင့် ဆွေးနွေးနေမှုများ၊ ပြည်ထောင်စု ညီလာခံ ဆိုင်ရာများကို အဓိက ဆွေးနွေးခဲ့ကြောင်း NCCT ထံမှ သိရသည်။

မတ်လ ၁၂ ရက်နေ့တွင် ဖက်ဒရယ် ဒီမိုကရေစီ မဟာမိတ်အဖွဲ့ (FDA)၊ အရပ်ဘက် လူမှုအဖွဲ့အစည်း ဖိုရမ်၊ စည်းလုံး ညီညွတ်သော တိုင်းရင်းသား လူမျိုးများ မဟာမိတ်အဖွဲ့ (UNA) နှင့် NCCT တို့ သီးခြားစီ တွေ့ဆုံပြီး ဘားအံ ဆွေးနွေးပွဲနှင့် နိုင်ငံရေး ဆွေးနွေးပွဲ အတွက် ပြင်ဆင်နေမှု များကို ဆွေးနွေးခဲ့ကြောင်း FDA နှင့် NCCT ထံမှ သိရသည်။

“တိုင်းရင်းသား အဖွဲ့တွေက အပစ်အခတ် ရပ်စဲရေးကို ဧပြီလထဲမှာ လက်မှတ်ထိုးဖို့ ရည်ရွယ်တယ်လို့ ပြောပါတယ်” ဟု FDA အဖွဲ့ဝင် အမျိုးသား ဒီမိုကရေစီ အင်အားစု ပါတီ ဥက္ကဋ္ဌ ဦးခင်မောင်ဆွေက ဆိုသည်။

သို့သော် တစ်နိုင်ငံလုံး အပစ်အခတ် ရပ်စဲရေး ပြုလုပ်ရာတွင် တိုင်းရင်းသား လက်နက်ကိုင် အဖွဲ့အားလုံး ပါဝင်စေလိုကြောင်း၊ အပစ်ရပ်ပြီး နိုင်ငံရေး ဆွေးနွေးပွဲများ စတင်ပါက နိုင်ငံရေးပါတီများ၊ အရပ်ဘက် အဖွဲ့အစည်းများ စတင် ပါဝင်စေလိုသည်ဟု NCCT က ဆိုကြောင်း ၎င်းက ထပ်လောင်း ပြောဆိုသည်။

အစိုးရနှင့် တိုင်းရင်းသား လက်နက်ကိုင်များ ငြိမ်းချမ်းရေး ဆွေးနွေးမှု နောက်ဆုံး အဆင့်အဖြစ် တစ်နိုင်ငံလုံး အပစ်အခတ် ရပ်စဲရေး စာချုပ်ကို နှစ်ဖက် ပူးတွဲ ရေးဆွဲရန် သဘောတူထားကြောင်း၊ ဧပြီလဆန်းတွင် နှစ်ဖက် ပြန်လည် ဆွေးနွေးကာ ဘားအံ ဆွေးနွေးပွဲရက်နှင့် အပစ်ရပ်စာချုပ် လက်မှတ်ထိုးမည့် နေ့ရက်ကို သတ်မှတ်မည် ဖြစ်ကြောင်း အစိုးရနှင့် NCCT အဖွဲ့များက ပြောဆိုထားသည်။

The Voice Weekly