ကချင်ဆရာမနှစ်ဦး အဓမ္မပြုကျင့် သတ်ဖြတ်ခံရမှုဖြစ်စဉ်၌ ကချင်တိုင်းရင်းသားများ သံသယဖြစ်သည့် အချက်သုံးချက်ကို မုံးပေါ်ဒေသ တပ်မတော်ဗျူဟာမှူး ဗိုလ်မှူးကြီး ထွန်းနိုင်ဦးက ရှင်းလင်းပြောဆိုမှု ရှိခဲ့ ကြောင်း သိရသည်။
အဆိုပါ ရှင်းလင်းပြောဆိုမှုကို အခင်းဖြစ်ပွားရာ ကောင်းခါးရွာ၌ ဇန်နဝါရီ ၂၅ ရက်က ပြုလုပ်သော အမှုမှန်ပေါ်ပေါက်ရေးအတွက် ကချင်တိုင်းရင်းသားရေးရာဝန်ကြီး အပါအဝင် ဘာသာရေးခေါင်းဆောင်များ၊ တပ်မတော်ပိုင်းနှင့် ရဲတပ်ဖွဲ့မှ တာဝန်ရှိသူများက ဒေသခံများနှင့် တွေ့ဆုံချိန်တွင် ပြုလုပ်ခဲ့ခြင်းဖြစ် ကြောင်း သိရသည်။
ကချင်ဆရာမနှစ်ဦး အဓမ္မပြုကျင့် သတ်ဖြတ်ခံရမှုနှင့်ပတ်သက်ပြီး ကချင်တိုင်းရင်းသားများပြောဆိုနေသည့် အရေးကြီးသည့် သံသယဖြစ်ဖွယ် အချက်သုံးချက်ဆိုသည်မှာ (၁) တပ်မတော်စစ်ကြောင်းက ဇန်နဝါရီ ၁၉ ရက် နံနက်ပိုင်းတွင် ကောင်းခါးရွာအတွင်းသို့ ခြေကျင်ဝင်ရောက်လာခြင်း၊ (၂) တပ်မတော် အငယ်တန်း အရာရှိ တစ်ဦးက နံနက် ၂ နာရီခန့်အချိန်တွင် အရေးကြီးပြီး ဖုန်းဆက်မရသဖြင့် ရွာခံလူငယ်တစ်ဦးအား ဆိုင်ကယ်ဖြင့် မြို့သို့ လိုက်ပို့ခိုင်းခြင်း၊ (၃) ဇန်နဝါရီ ၂ဝ ရက် နံနက်အစောပိုင်းတွင် ကားသုံးစီးဖြင့် တပ် မတော် သားများ ရွာမှ ထွက်ခွာသွားခြင်း အစရှိသည်တို့ ဖြစ်ကြပါသည်။
တရားခံပေါ်ပေါက်ရန် စုံစမ်းစစ်ဆေးနေစဉ်ကာလတွင် ထိုအချက်သုံးချက်ကို ကချင်တိုင်းရင်းသားများ အကြား အကျယ်တပြန့် ပြောဆိုမှုရှိနေချိန်၌ မုံးပေါ်ဒေသ တပ်မတော် ဗျူဟာမှူးက ဒေသခံများနှင့် တွေ့ဆုံချိန်၌ ရှင်းလင်းခဲ့ခြင်း ဖြစ်သည်။
“ဒီကရွာသားတွေ နည်းနည်း မရှင်းမလင်းဖြစ်နေတဲ့ ကားသုံးစီး ရောက်လာတယ်ပေါ့။ အဲ့ဒီမှာ လိုက်သွား တဲ့ သူတွေ ရှိလားဆိုတဲ့အချိန်မှာ။ ကျွန်တော်တို့က အဲ့ဒီကားကို မန်ဖန်က လာပြီးတော့ ဒီဘက်ကိုသွားတဲ့ အချိန်မှာ ဟိုဘက် ရင်ကွဲတောင်နားက လမ်းကနေ တင်ပေးရမယ့်ဝန်တွေကို တင်ပေးဖို့ကို ကျွန်တော် ကနေ ဒီမှာရှိတဲ့ စစ်ကြောင်းမှူးကို ဖုန်းဆက်ပြီးပြောတယ်။ ဒီက စစ်ကြောင်းမှူးက ဟိုဘက်စစ်ကြောင်း မှူးကို ဖုန်းနဲ့ရော၊ စက်နဲ့ရော ပြောလို့မရလို့ဆိုပြီးတော့ ဒီကနေပြီးတော့ အိမ်ရှင် ကိုစိုင်းနော်နဲ့ ကျွန်တော့် ဆီက ရဲဘော်တစ်ယောက်ကို ဆိုင်ကယ်နဲ့ လွှတ်လိုက်တဲ့ကိစ္စ ရှိပါတယ်”ဟု မုံးပေါ်ဒေသ တပ်မတော် ဗျူဟာမှူး ဗိုလ်မှူးကြီးထွန်းနိုင်ဦးက ပြောကြားခဲ့သည်။
အဆိုပါကိစ္စရပ်နှင့် ပတ်သက်ပြီး ဆက်နွှယ်သူများကိုလည်း ရဲတပ်ဖွဲ့အား စစ်ဆေးခိုင်းထားပြီးဖြစ်ကြောင်း တပ်မတော်ဗျူဟာမှူးက ဆိုသည်။
“တပ်က ဒီကို အခင်းဖြစ်တဲ့နေ့ မနက် ၈နာရီခွဲ ပတ်ဝန်းကျင်လောက် ရောက်တယ်။ အခင်းဖြစ်ပွားတဲ့ အချိန်က ၁၂ နာရီခွဲ ပတ်ဝန်းကျင်လောက်ဆိုတော့ အချိန်အနေနဲ့က ဘယ်လောက်ရှိလဲဆိုတော့ ၁၆ နာရီပေါ့။ ကျွန်တော်တို့တပ်တွေ ဒီကိုရောက်ပြီး ၁၆ နာရီလောက်မှာ ဖြစ်ခဲ့တယ်။ ကျွန်တော်တို့လည်း ဒါကို ပေါ်အောင် မြန်မာနိုင်ငံရဲတပ်ဖွဲ့နဲ့ရော ပြည်သူလူထုနဲ့ပါ ဝိုင်းဝန်းပူးပေါင်းပြီးတော့ ဖော်ထုတ်ချင်ပါတယ်”ဟု ၎င်းက ဆက်လက် ပြောကြားသည်။
ထို့နောက် အမှုမှန်ပေါ်ပေါက်ရန်အတွက် ပူးပေါင်းဆောင်ရွက်မည်ဖြစ်ပြီး စစ်ကြောင်းကိုလည်း နေရာရွှေ့ ထား ခြင်းမရှိကြောင်း ထပ်မံပြောကြားသည်။
“ကျွန်တော့် လူကြီးတွေ မှာကြားထားတာ ရှိပါတယ်။ မင်းတို့ ဒီကိစ္စဖြစ်ရပ်မှန် မပေါ်မချင်း ဘယ်မှမသွားနဲ့။ ဘယ်မှမရွှေ့နဲ့ ဆိုတဲ့အတွက် ကျွန်တော်တို့ကိုယ်တိုင် အဝတ်တစ်ထည် ကိုယ်တစ်ခုနဲ့ရောက်လာပြီး ဒီမှာ နေရပါတယ်”ဟု ဗိုလ်မှူးကြီး ထွန်းနိုင်ဦးက ဆိုသည်။
ထို့ပြင် အခင်းဖြစ်ပွားပြီး နာရီပိုင်းအတွင်း ခမရ ၅ဝ၃ စစ်ကြောင်းမှူး၏ ပြောစကားနှင့် ပတ်သက်၍လည်း ၎င်းက ရှင်းလင်းခဲ့ကြောင်း သိရသည်။
“အဲဒီထဲမှာ ကျွန်တော့်စစ်ကြောင်းမှူး စကြားတာက သုံးနာရီလောက် ၊လူငယ်ပီပီ ငါတို့ကို လာမစွပ်စွဲနဲ့ပေါ့။ အဲဒီ စစ်ကြောင်းမှူးကိုလည်း ကျွန်တော်ဆုံးမထားပါတယ်။ ဘယ်အရာမှ လျှောက်ပြောလို့မရဘူး ဆိုပြီးတော့။ နောက် အဲဒါနဲ့ပတ်သက်လို့ ရဲဘော်တွေနဲ့ ပတ်သက်လို့ တစ်စုံတစ်ခုခုဆိုရင် ကျွန်တော့်ကို လာပြီးတော့ ပြောပါ။ ကျွန်တော်ကတော့ ရဲဘော်တွေကို ဈေးဝယ်ခိုင်းတာတောင် ဒီဘက် မဆင်းခိုင်း ထားဘူး”ဟု ဗိုလ်မှူးကြီး ထွန်းနိုင်ဦးက ဆိုသည်။
“တကယ်လို့ အဖြစ်မှန်ပေါ်လာလို့ ကျွန် တော်တို့တပ်ကဆိုရင် တပ်က သူ့စည်းကမ်းအတိုင်း အရေးယူမယ်။ ပြီးရင် နယ်ဘက်ကို လွှဲမယ်။ တကယ်လို့ တပ်က မဟုတ်ဘဲ တခြားတစ်ယောက်ဆိုရင် သူ့နယ်ဘက် ဥပဒေအရ သွားမှာပါ”ဟု ၎င်းက ဆက်လက်ပြောကြားခဲ့သည်။
ကောင်းခါးရွာ၌ ကချင်ဆရာမနှစ်ဦးဖြစ်စဉ် ပေါ်ပေါက်ချိန်တွင် ခမရ ၅ဝ၃ နှင့်အတူ စစ်ကြောင်းမှူးရှိနေပြီး အခင်းဖြစ်ပွားခဲ့ပြီးနောက်ပိုင်းတွင် မုံးပေါ်ဒေသ တပ်မတော်ဗျူဟာမှူးက ကောင်းခါးရွာသို့ ရောက်ရှိပြီး ၎င်း၏ခွင့်ပြုချက်ဖြင့်ပင် တပ်မတော်သားများအား စစ်ဆေးမှုပြုလုပ်ခဲ့ခြင်းဖြစ်ကြောင်း သိရသည်။
ကချင်ခရစ်ယာန်သာသနာပြု ဆရာမနှစ်ဦး အဓမ္မပြုကျင့် သတ်ဖြတ်ခံရမှုမှာ ဇန်နဝါရီ ၁၉ ရက်က ပေါ် ပေါက်ခဲ့ခြင်းဖြစ်ပြီး ဇန်နဝါရီ ၂၉ ရက်အထိ စုံစမ်းစစ်ဆေးနေဆဲဖြစ်ကြောင်း သိရသည်။
ဇန်နဝါရီ ၂၉ ရက်က ထုတ်ဝေခဲ့သော အစိုးရသတင်းစာများတွင် တပ်မတော်ပိုင် မြဝတီသတင်းစာမှ ရေးသားသည့် “ကောင်းခါးကျေးရွာဖြစ်စဉ်တွင် အမှုမှန်ပေါ်ပေါက်စေရေး တပ်မတော်က သက်ဆိုင်ရာ အဖွဲ့အစည်းများအား ပံ့ပိုးကူညီဆောင်ရွက်လျက် ရှိ”သတင်းကို ဖော်ပြခဲ့သည်။
အဆိုပါ သတင်း၌ တပ်မတော်စစ်ကြောင်းသည် ကောင်းခါးရွာသို့ ဇန်နဝါရီ ၁၉ရက် ညနေတွင် ရောက်ရှိ အခြေပြုကြောင်း ဖော်ပြထားသော်လည်း အခင်းဖြစ်ပွားရာ ကောင်းခါးရွာသို့ ရောက်ရှိနေသော ဗျူဟာမှူး ၏ ပြောကြားချက်အရ တပ်မတော်စစ်ကြောင်းသည် ဇန်နဝါရီ ၁၉ ရက် နံနက် ၈ နာရီခွဲတွင် ကောင်းခါး ရွာသို့ ရောက်ရှိနေပြီးဖြစ်ကြောင်း သိရသည်။
အစိုးရသတင်းစာများတွင် ဖော်ပြထားသော သတင်း၌ “တရားခံဖော်ထုတ်ရာတွင် အထောက် အကူဖြစ် စေရန် စုံစမ်းစစ်ဆေးရေးအဖွဲ့များ သွားရောက်စစ်ဆေးမှုအား လုံခြုံရေးလိုက်ပါ ဆောင်ရွက်ပေးခြင်း၊ ပြစ်မှုကျူးလွန်သူ ဆံပင်မှ ရယူထားသော DNA နှင့် တိုက်ဆိုင်စစ်ဆေးနိုင်ရန် အဆိုပါစစ်ကြောင်း မှ တပ်မတော်သားများ၏ ဆံပင်နမူနာများအား ပေးပို့ခြင်းတို့ဖြင့် အမှုမှန်ပေါ်ပေါက်စေရေးအတွက် သက်ဆိုင်ရာအဖွဲ့အစည်းများအား ဝိုင်းဝန်းပံ့ပိုးကူညီပေးလျက် ရှိသည်”ဟု ဖော်ပြခဲ့သည်။
ထို့အပြင် “မြန်မာနိုင်ငံရဲတပ်ဖွဲ့၏ မှုခင်းပိုင်းဆိုင်ရာ မျက်မြင်တွေ့ရှိချက်များနှင့် ပူးပေါင်းစစ်ဆေးရေး အဖွဲ့၏ စစ်ဆေးဖော်ထုတ်ချက်များအရ တပ်မတော်သားများသည် တရားခံဖြစ်နိုင်ဖွယ်ရာမရှိကြောင်း သုံးသပ် သိရှိရသော်လည်း သက်ဆိုင်ရာမှ စုံစမ်းစစ်ဆေးမှု ပြုလုပ်နေစဉ် တပ်မတော်အပေါ် ပုတ်ခတ်စွပ်စွဲပြောဆိုမှုများ ပြုလုပ်လာကြောင်း တွေ့ရှိရသဖြင့် အမှုမှန်ပေါ်ပေါက်ချိန်တွင် တပ်မတော်အား မဟုတ်မမှန်ရေးသားပြောဆိုမှုများနှင့် ပတ်သက်၍ တရားဥပဒေနှင့်အညီ ဆက်လက်ဆောင်ရွက် သွားမည်ဖြစ်ကြောင်း သတင်းရရှိသည်”ဟု ဖော်ပြခဲ့သည်။
အဆိုပါ သတင်းကိုပင် တပ်မတော်က မြန်မာနိုင်ငံစာနယ်ဇင်းကောင်စီ (ယာယီ) မှတစ်ဆင့် မီဒီယာများထံ သို့ ပေးပို့သည့် သတင်း၏ နောက်ဆုံးစာကြောင်းတွင်မူ “စုံစမ်းစစ်ဆေးမှုများပြီးဆုံး၍ အမှုမှန်သိရှိရချိန်တွင် တပ်မတော်အား မဟုတ်မမှန် ရေးသားပြောဆိုမှုများနှင့် ပတ်သက်၍ ပေါ်ပေါက်ပါက တရားဥပဒေနှင့် အညီ အရေးယူဆောင်ရွက်သွားမည်ဖြစ်ကြောင်း သက်ဆိုင်ရာမှ သတင်းရရှိသည်”ဟူ၍ ဖော်ပြခဲ့သည်။
Eleven Media Group
No comments:
Post a Comment