နိုင်ငံခြားဘဏ် ကိုးခုအား ရုံးခွဲဖွင့်ခွင့်ပြု

အမေရိကန်နိုင်ငံမှ စီးပွားရေးပိတ်ဆို့ထားခဲ့သော ဆယ်စုနှစ်တစ်ခုကျော် ကာလအတွင်း ပြည်ပနိုင်ငံများနှင့် ငွေကြေးဝန်ဆောင်မှု အဆက်မပြတ် ဆောင်ရွက်ပေးခဲ့သော စင်ကာပူအခြေစိုက် ဘဏ်နှစ်ခု အပါအ၀င် နိုင်ငံခြားဘဏ် ကိုးခုကို ပြည်တွင်း၌ ဘဏ်ခွဲဖွင့်လှစ်ခွင့်ပြုကြောင်း မြန်မာနိုင်ငံဗဟိုဘဏ်မှ အောက်တိုဘာ ၁ ရက်တွင် သတင်းထုတ်ပြန်သည်။

အဆိုပါဘဏ်ကိုးခုမှာ သြစတြေးလျနှင့် နယူးဇီလန်ဘဏ်အုပ်စုလီမိတက် (ANZ)၊ တရုတ် ပင်လယ်ရပ်ခြားဘဏ် ကော်ပိုရေးရှင်း (OCBC) ၊ ဘန်ကောက်ဘဏ်၊ ဂျပန်နိုင်ငံမှ တိုကျိုမစ်ဆူဘဏ် (Bank of Tokyo-mitsubishi BTMU) ၊ တရုတ်နိုင်ငံမှ စက်မှုလက်မှုနှင့်ကုန်သွယ်ရေးဘဏ် (ICBC)၊ မလေးရှားနိုင်ငံမှ မေဘဏ်၊ မစ်ဇူဟိုဘဏ်၊ ဂျပန်နိုင်ငံမှ ဆူမီတိုမိုမစ်ဆူရီဘဏ်ကော်ပိုရေးရှင်းနှင့် ယူနိုက်တက်အိုဗာဆီးဘဏ် (UOB) တို့ဖြစ်ကြောင်း ထုတ်ပြန်ကြေညာသည်။

နိုင်ငံခြားဘဏ်များ ပြည်တွင်း၌ ဘဏ်ခွဲဖွင့်လှစ်ပါက ပူးပေါင်းလုပ်ဆောင်ခြင်း (Cooperate Banking) ခွင့်ပြုခြင်းဖြစ်ပြီး ပြည်တွင်းလုပ်ငန်းရှင်များအား တိုက်ရိုက်ငွေချေးပေးခွင့်ရမည်မဟုတ်ဘဲ ပြည်တွင်း ဘဏ်များမှတစ်ဆင့်သာ ငွေချေးနိုင်မည်ဖြစ်ကြောင်း ဒုတိယဥက္ကဋ္ဌ ဦးဆက်အောင်က ပြောကြားထားသည်။

7Day DAILY