၈၀ ကျော်မှ ဘွဲ့ရတဲ့အဘိုး

အသက် ၈၀ ရှိပြီဖြစ်သော အဘိုး ရောဘတ် တီးတပ်စ်သည်ဈေးကွက် စီမံခန့်ခွဲရေးဘာသာရပ်ဆိုင်ရာ ဘွဲ့တစ်ခုကို ရရှိပြီဖြစ်ကြောင်း သိရ သည်။ အဘိုး တီးတပ်စ်က “ကျွန်တော် ဒီဘွဲ့ကို ငယ်ငယ်လေးကတည်း က လိုချင်နေတာပါ။ ဒါကြောင့် တောက်လျှောက် ကြိုးစားလာခဲ့တာ” ဟုပြောကြားခဲ့သည်။ သူသည် အလုပ်မှအငြိမ်းစား ယူခဲ့သည်မှာ ကြာခဲ့ ပြီဖြစ်သော်လည်း ယခုရရှိသည့်ဘွဲ့နှင့် ပတ်သက်ပြီး အလုပ်တာဝန် တစ်ခုခုကိ်ု ထမ်းဆောင် ချင်စိတ် ရှိသေးသည်ဟုဆိုသည်။

ထို့ပြင် သူက “ကျွန်တော့် အမေကို ကျွန်တော် တစ်နေ့ ဒီဘွဲ့ ရကို ရ,ရမယ်လို့ ကတိပေးခဲ့တယ်” ဟုပြောခဲ့ သည်။ မစ္စတာတီးတပ်စ်သည် ယခင်က အရောင်းသမားတစ်ယောက်အဖြစ် တာဝန်ထမ်းဆောင်ခဲ့ ဖူးပြီး ဟော့စ်တန်မြို့တွင် နေထိုင်ခဲ့သူဖြစ်သည်။ “ကျွန်တော့်အတွက်တော့ ဒီဘွဲ့ဟာ ကြီးမားတဲ့ ဆုလာဘ် တစ်ခုပါ” ဆိုသည်။

မစ္စတာ တီးတပ်စ်သည် တက္ကဆက်ပြည်နယ်ရှိ NGO အဖွဲ့အစည်းတစ်ခုမှ ဖွင့်လှစ်ထားသော အွန်လိုင်း တက္ကသိုလ် W.G.U.Texas တွင် အသက်အကြီးဆုံး ကျောင်းသားတစ်ယောက်အဖြစ် ၀င်ရောက်စာရင်း သွင်းခဲ့သူလည်းဖြစ်သည်။ ထို အွန်လိုင်းတက္ကသိုလ်တွင် တက်ရောက်နေကြသည့် ပျမ်းမျှ ကျောင်းသား များ၏အသက်မှာ ၃၉ နှစ်ဖြစ်သဖြင့် မစ္စတာတီးတပ်စ်သည် စံချိန်တင်အသက် အကြီး ဆုံးကျောင်းသားကြီးဖြစ်သွားခဲ့ရသည်။ ထိုကျောင်းမှ ဘွဲ့တစ်ခုရရန် အွန်လိုင်းအနေဖြင့် ၃ နှစ်ခွဲ တက်ရောက်လေ့လာသင်ယူရမည်ဖြစ်သည်။

မစ္စတာ တီးတပ်စ်သည် ထိုကျောင်းတွင် ၂၀၀၆ ခုနှစ်ကတည်းကကျောင်းဝင်ခွင့်လျှောက်လွှာတင်ပြီး တက်ရောက်သင်ကြားခဲ့သူဖြစ်သည်။ တီးတပ်စ်က သူ့အနေဖြင့် ကွန်ပျူတာကို ကျွမ်းကျင်စွာ ကိုင်တွယ် အသုံးပြုတတ်သူလည်း မဟုတ်ကြောင်း၊ စာရိုက်လျှင်လည်း လက်ညှိုးတစ်ချောင်းတည်းဖြင့်သာ ရိုက်တတ်ပြီး ကျောင်းစာများကို အွန်လိုင်းမှတင်သည့်အခါ လွန်စွာမှ အားထုတ်ခဲ့ရကြောင်း၊ သူသည် အထက်တန်းကျောင်း သားဘ၀တွင် အမေရိကန်ရေတပ်တွင် ၀င်ရောက်အမှုထမ်းကာ ကိုရီးယား စစ်မြေပြင်သို့ရောက်ခဲ့ရကြောင်း၊ စစ်ပွဲမှ ပြန်လာသည့်အခါတွင်လည်း ရာဘာကုမ္ပစီတစ်ခု၏ အရောင်း သမား ဘ၀တွင် နှစ်ပေါင်းများစွာ ရပ်တည်နေရပြီး ပညာမသင်နိုင်ခဲ့ကြောင်း၊ ယခင်က အနီးနားရှိ ကောလိပ်တစ်ခုတွင်ကျောင်းတက်ရန် စာရင်း သွားသွင်းဖူးသော်လည်း မတက်ဖြစ်ခဲ့ကြောင်း၊ အဓိကမှာ ငွေကြေးမတတ်နိုင်သောကြောင့်ဖြစ်ကြောင်း၊ ယခု ၈၀ နားနီးမှ သူ့အမေဖြစ်စေချင်သော ဘွဲ့ရကြီးတစ်ယောက်ဖြစ်ခဲ့ရသည့်အတွက် ဂုဏ်ယူဝမ်းမြောက်မိကြောင်း ပြောကြားခဲ့သည်။

မောက္ခ ပညာရေးမဂ္ဂဇင်း