Tuesday 21 April 2015

လုံခြုံရေး ခြိမ်းခြောက်မှုကြောင့် ဒုက္ခသည်တွေကို မလေးရှား ထပ်လက်မခံလို


မလေးရှားနိုင်ငံမှာ ပြည်ပက ခိုလှုံသူတွေ အထူးသဖြင့် မြန်မာနိုင်ငံက ရိုဟင်ဂျာ ဒုက္ခသည်တွေဟာ လုံခြုံရေးအရ ခြိမ်းခြောက်မှု ဖြစ်နေလို့ ဆက်လက် လက်ခံထားဖို့ မဖြစ်နိုင်တော့ဘူးလို့ မလေးရှား ဝန်ကြီးချုပ်ရုံး ဝန်ကြီး ဒါတု ဆရီ ရှာဟီဒန် ကပြောပါတယ်။
ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံးက ဒီလူတွေကို တာဝန်ယူပြီး တတိယ နိုင်ငံတွေကို ပို့ဆောင်တာကို အရှိန်မြှင့်ပေးပါလို့ ဝန်ကြီး ဒါတု ဆရီ ရှာဟီဒန်က ဆန်းဒေလီ သတင်းစာကို ပြောပါတယ်။
မလေးရှားနိုင်ငံမှာ ဒီဒုက္ခသည်တွေကို စာသင်ကြားခွင့်နဲ့ တခြား လူမှု ကူညီရေး အထောက်အပံ့တွေကို ချပေးမယ်ဆိုရင် တတိုင်းပြည်လုံး ဒီဒုက္ခသည်တွေနဲ့ ပြည့်သွားလိမ့်မယ်လို့ သူက ပြောခဲ့တာ ဖြစ်ပါတယ်။
မလေးရှား အတိုက်အခံ လွှတ်တော်အမတ် Teresa Kok Suh Sim ကတော့ မလေးရှား အစိုးရအနေနဲ့ ဒီရိုဟင်ဂျာ ဒုက္ခသည်တွေကို လက်ခံလာတာ အတော်ကြာခဲ့ပြီ ဖြစ်ပြီး တချို့ဆို မလေးရှားမှာ ဆယ်စုနှစ်တွေနဲ့ ချီနေခဲ့ကြတာ ဖြစ်တယ်လို့ ပြောပါတယ်။

အခု မြန်မာနိုင်ငံ အခြေအနေက ပိုကောင်းလာတာမို့ နောက်ထပ် ဒုက္ခသည် သစ်တွေကို လက်ခံတာ မရှိတော့ဘူးလို့လည်း သူက ပြောပါတယ်။
မြန်မာနိုင်ငံမှာ အရင် အနှစ် ၂ဝ- ၃ဝ ကထက်စာရင် အခြေအနေ ပြောင်းလဲ လာပေမယ့် မြန်မာပြည်က လူတွေဟာ မလေးရှားလို အိမ်နီးချင်း နိုင်ငံတွေကို အထောက်အထား စာရွက်မပါဘဲ ရွှေ့ပြောင်းဝင်လာနေကြတာတွေ ရှိနေသေးတယ်လို့ မစ္စ Teresa Sim က ဆိုပါတယ်။
ဒီဒုက္ခသည်တွေက မလေးရှားမှာ ဘယ်လောက် လုံခြုံရေးအရ စိုးရိမ်စရာ ဖြစ်နေတာလဲ ဆိုတာနဲ့ ပတ်သက်လို့တော့ ရွှေ့ပြောင်းဝင်လာသူတွေ ကြားမှာ အသေးအဖွဲ ခိုက်ရန် ဖြစ်ပွားတာ၊ ရာဇဝတ်မှု ကျူးလွန်တာတွေ ရှိတယ်လို့ သိရကြောင်းနဲ့ ဒါတွေက ဒုက္ခသည်တွေ လုပ်တာချည်း သက်သက်တော့ မဟုတ်ပါဘူးလို့ သူက ပြောပါတယ်။
မလေးရှား ဝန်ကြီးချုပ်ရုံး ဝန်ကြီး ပြောကြားချက်ဟာ လူ့အခွင့်အရေးကို မလေးစားရာကျတဲ့ ပြောဆိုမှု ဖြစ်တယ်လို့လည်း သူက ဝေဖန် ပြောကြားခဲ့ပါတယ်။
မြန်မာနိုင်ငံမှာ ရွေးကောက်ပွဲ လုပ်တဲ့အထိ အခြေအနေတွေ ကောင်းလာပြီ ဆိုရင် ဒီလူတွေကို နေရပ် ပြန်နိုင်အောင် ဖန်တီးပေးရမယ်၊ ဒါကို နိုင်ငံခြားရေး ဘက်က ညှိနှိုင်း ဆောင်ရွက်သင့်တယ်၊ ဒါမှမဟုတ်ရင် ဒီလူတွေကို မလေးရှားမှာ အမြဲတမ်း နေထိုင်ခွင့် ပေးသင့်တယ်လို့ မစ္စ Teresa Sim က ပြောပါတယ်။
ဒီနှစ် မလေးရှားက အာဆီယံမှာ အလှည့်ကျ ဥက္ကဋ္ဌ ဖြစ်လို့ ဒေသတွင်း ထိပ်သီး အစည်းအဝေးတွေမှာ ဒီကိစ္စကို ပြေလည်အောင် ဖြေရှင်းသင့်တယ်လို့ မလေးရှား လွှတ်တော်အမတ် Teresa Sim က သုံးသပ် ပြောခဲ့ပါတယ်။
BBC

No comments:

Post a Comment