သပိတ်မှောက်ကျောင်းသားအဖွဲ့များ မြင်းခြံမြို့ရှိ အစိုးရနည်းပညာကောလိပ်တွင် ဇန်န၀ါရီ ၂၆ ရက်က စုဝေးနေကြစဉ် (ဓာတ်ပုံ-ဌေးလှအောင်)
မန္တလေးမှ ရန်ကုန်သို့ သပိတ်မှောက် လမ်းလျှောက်မှုများ ပြုလုပ်နေခြင်းအပြင် ကျောင်းသားသမဂ္ဂများက အမျိုးသားပညာရေးဥပဒေကို ကန့်ကွက်သောလှုပ်ရှားမှုများကို နိုင်ငံအနှံ့တက္ကသိုလ်များတွင် ဆက်လက် ပြုလုပ်နေကြောင်း သိရသည်။
ဇန်နဝါရီ ၂၂ ရက်နှင့် ၂၆ ရက်များတွင် ဒဂုံတက္ကသိုလ်တွင် ဗကသကျောင်းသားများက အမျိုးသားပညာရေး ဥပဒေကို ဆန့်ကျင်သော သရုပ်ပြလှုပ်ရှားမှုများ၊ အခြားကျောင်းသား၊ ကျောင်းသူများကို ၎င်းတို့နှင့်အတူ အမျိုးသားပညာရေးဥပဒေကို ဆန့်ကျင်ရန် စည်းရုံးလှုံ့ဆော်မှုများ ပြုလုပ်ခဲ့သည်။
အမျိုးသားပညာရေးဥပဒေပါ အမျိုးသားပညာရေးကော်မရှင်၏ အခန်းကဏ္ဍသည် ဗဟိုဦးစီး ချုပ်ကိုင်မှုများ နေခြင်း၊ ပညာရေးဘတ်ဂျက်အတွက် ရာခိုင်နှုန်း ၂ဝ အသုံးပြုရန် တောင်းဆိုခြင်း၊ လက်ရှိတက္ကသိုလ် ပညာ ရေး စနစ်၏ လက်တွေ့ပြုလုပ်ရာတွင် အားနည်းမှုများ၊ ကျူရှင်စနစ်များ စသည်တို့ကို ဗကသ ကျောင်းသား ၁ဝ ဦးခန့်က ဒဂုံတက္ကသိုလ် စာသင်ဆောင်များရှေ့လမ်းမပေါ်၌ ထိုင်လျက် ဟောပြော ဆွေးနွေးသည့် ပုံစံဖြင့် ကျောင်းသား၊ ကျောင်းသူများကို ၎င်းတို့နှင့်အတူ ပါဝင်ရန် စည်းရုံးခဲ့ခြင်း ဖြစ်သည်။
အမျိုးသားပညာရေးဥပဒေအား ကန့်ကွက်ကြောင်း ဒဂုံတက္ကသိုလ်ကျောင်းဝန်းအတွင်း ကျောင်းသားများ ဆန္ဒထုတ်ဖော်နေစဉ်
ထို့ပြင် ဗကသ ကျောင်းသူများကလည်း အမျိုးသားပညာရေးဥပဒေကို ဆန့်ကျင်ကန့်ကွက်သော စာတမ်း များကို တက္ကသိုလ်ကျောင်းသား၊ ကျောင်းသူများထံသို့ ဝေငှခဲ့သည်။
“ကျွန်တော်က သတ္တဗေဒကျောင်းသားပါ။ ကျောင်းမှာ လက်တွေ့လုပ်တယ်။ အခန်းမှာ လူ ၆ဝ ရှိတယ်။ ငါးရံ့ကို ခွဲတယ်။ လူ ၆ဝ အတွက် လက်တွေ့လေ့လာဖို့က ငါးရံ့က နှစ်ကောင်ပဲရတယ်။ ကျောင်းသား တစ်ဦးကို ငါးရံ့တစ်ကောင်ခွဲဖို့တောင် မစီစဉ်ပေးနိုင်တဲ့ အခြေအနေ။ ဒါက ဥပမာလေးပဲ ရှိပါသေးတယ်။ သုတေသနတို့ လက်တွေ့တို့ မရှိရင် ကျွန်တော်တို့ပညာရေးက ဘာမှဖြစ်မလာဘူး” ဟု အမျိုးသား ပညာရေး ဥပဒေကို ဆန့်ကျင်နေသော ကျောင်းသားတစ်ဦးက ဆိုသည်။
ထိုကဲ့သို့ ရန်ကုန်ရှိတက္ကသိုလ်များတွင် လှုပ်ရှားနေမှုများအပါအဝင် မြင်းခြံ၊ ကလေး၊ ထားဝယ်မြို့နယ်ရှိ တက္ကသိုလ် များတွင်လည်း အမျိုးသားပညာရေးဥပဒေအပေါ် ဆန္ဒပြမှုများ၊ ကန့်ကွက်လှုပ်ရှားမှုများကို ကျောင်းသားသမဂ္ဂများက ပြုလုပ်ခဲ့ကြသည်။
Eleven Media Group
No comments:
Post a Comment