ကချင်ပြည်နယ် ဖားကန့်မြို့နယ် နန့်ယားကျေးရွာရှိ မနော့ရွှေမှော်တွင် အင်ဝိုင်းဖြင့် ရွှေကျင်လုပ်ငန်း လုပ်ကိုင် နေကြသော ဒေသခံရွာသား(၈)ဦးအား KIA အဖွဲ့ တစ်ဖွဲ့က လွန်ခဲ့သော တစ်ပတ်ခန့်က ဖမ်းဆီးခေါ်ဆောင်သွားခဲ့ရာ ဇူလိုင် ၁၃ ရက်နေ့တွင် ဒေသခံရွာသား(၂)ဦး ပြန်လည်ထွက်ပြေးလွတ်မြောက် လာခဲ့ကြောင်း သိရသည်။
“ ကျွန်တော်တို့က မြစ်ကြီးနားမြို့နယ် မော်ဖောင်းအထက်ကျေးရွာ မှာ နေ ပါတယ်၊ ကျွန်တော် ဦးစီး အဖွဲ့ဝင်(၈) ဦးနဲ့ မနော့ ရွှေမှော်ထဲမှာ အင်ဝိုင်းနဲ့ ရွှေကျင်ကြတာပါ၊ လွန်ခဲ့တဲ့တစ်ပတ်လောက်က ည ၁၀ နာရီလောက်မှာ ကချင်လွတ်လပ်ရေး တပ်ဖွဲ့တစ်ဖွဲ့ရောက်လာပြီး ကျွန်တော်အပါအ၀င် (၈)ဦးလုံး ကို ရွှေမှော်တောင်ဘက် တောထဲကို ခေါ်သွားပါတယ်၊ နောက် တစ်နေ့မှာ ကျွန်တော်တို့ ၂ ယောက် ထွက်ပြေးခဲ့ကြပါတယ်၊ ဇူလိုင် ၁၃ ရက်နေ့မှာတော့ မိုးကောင်းမြို့နယ်၊ ပင်ဘော ကျေးရွာကို တောတိုး ရင်း ရောက်လာခဲ့ပါတယ်၊ ကျေးရွာ အုပ်ချုပ်ရေးမှူးကို သတင်းပို့လိုက်တော့ ဟိုပင်မြို့နယ်ရဲစခန်းမှာ ကျွန်တော်တို့ကို လိုက်အပ်ပေးပါတယ်” ဟု ထွက်ပြေးလွတ်မြောက်လာသူ မော်ဖောင်းအထက် ရွာသား တစ်ဦး က ပြောပြ သွားသည်။
အဆိုပါ ဖြစ်စဉ်နှင့် ပတ်သက်၍ ဖမ်းဆီးခံရသော ဒေသခံရွာသား(၆)ဦင်္းအား ပြန်လည်လွတ်မြောက်ရေး ဟိုပင် မြို့နယ် ရဲစခန်းမှ အမှုဖွင့်အရေးယူထားကြောင်း သိရှိရပါသည်။
နော်ထူးဇော်
Kachin Daily News
No comments:
Post a Comment