Thursday 21 January 2016

မြွေကိုက်ခံရပါက စနစ်တကျရှေးဦးပြုစုခြင်း ပညာပေးနှိုးဆော်

မြွေဆိုးကိုက်သောအခါ မေးရိုးရှိကြွက်သားများက အဆိပ်အိတ်ကို ဖိနှိပ်သဖြင့် ဆေးထိုးအပ်ဖြင့်ထိုးသွင်းသကဲ့သို့ အဆိပ်များသည် ကိုက်သည့် နေရာအတွင်းသို့ ဝင်သွားပါသည်။ ကြွက်သားဖိအားဖြင့် ထိုးသွင်းခံရသော အဆိပ်ကို ပြန်ထုတ်ယူရန်မလွယ်ပါ။ မြွေဆိပ်သည် ကိုက်သောနေရာမှ ကိုယ်ခန္ခာတစ်ခုလုံးသို့ သွေးပြန်ကြောငယ်များ၊ သားငံရည်ကြောငယ်များမှ ပျံ့နှံ့ပါသည်။ ထိုအကြောများကို အနည်းငယ်ဖိရုံမျှဖြင့် သွေးစီးခြင်းကို ရပ်တန့်စေနိုင်သဖြင့် -
၁။ မြွေကိုက်ခံရသည့်နေရာကို သန့်ရှင်းသောအဝတ်ဖြင့် ခပ်ဖွဖွ သုတ်ပါ။ အားဖြင့်ဖိမပွတ်ရ။ အလွယ်တကူရနိုင်လျှင် ရေဖြင့်ဆေးပါ။
၂။ အလျား(၃) လက်မ၊ အနံ(၃)လက်မ၊ အထူ(၁) လက်မခွဲအရွယ် အဝတ် ခေါက်ထူထူ(သို့မဟုတ်) ပတ်တီးခေါက် (သို့မဟုတ်) ရော်ဘာရေမြှုပ်စ တစ်ခုကို ဒဏ်ရာပေါ်တွင်တင်ပါ။
၃။ လက်ဖမိုး၊ လက်ချောင်း၊ ခြေချောင်းများတွင်မြွေကိုက်ခံရပါက အဝတ်ခေါက်ကို သင့်တော်ရာအရွယ်ပြုလုပ်၍ ဒဏ်ရာပေါ်တင်ပါ။
၎။ အဝတ်ခေါက်၏ အပေါ်တွင် ပတ်တီး (သို့မဟုတ်) အဝတ်စ (သို့မဟုတ်)အားကစားပတ်တီးကို မြဲရုံ၊ တင်းရုံ (ခြေဆစ်၊ လက်ဆစ်များ နာကျင်သည့်အခါတွင် စည်းနှောင်သလောက်သာ)စည်းပါ။
၅။ ဒဏ်ရာကို ပတ်တီးစည်းပြီးပါက ဝါးခြမ်း၊ (သို့မဟုတ်) တုတ်ချောင်း ရှည်ဖြင့် မြွေကိုက်ခံရသော ခြေ (သို့မဟုတ်) လက်တစ်ချောင်းလုံးကို ကပ်၍စည်းပါ။ ခြေဆစ်၊လက်ဆစ်၏ အထက်နှင့်အောက်တို့တွင် ကြိုး (သို့မဟုတ်) ပတ်တီးဖြင့် ချည်နှောင်ရမည်။
၆။ ခြေတစ်ချောင်းလုံးကို မီသောတုတ်ချောင်းမရနိုင်ပါက ဝါးခြမ်းနှစ်ခုသုံးခုကိုသင့်လျော်သလို ဆက်၍သုံးပါ။
၇။ လူနာကို လှုပ်ရှားမှုလုံးဝမပြုစေဘဲ နီးစပ်ရာ ဆေးရုံ၊ ဆေးပေးခန်းသို့ အမြန်ဆုံးပို့ဆောင်ရမည်။
၈။ ဖြစ်နိုင်ပါက မြွေသေကိုတစ်ပါတည်းယူဆောင်လာပါ။ ကိုက်သော မြွေကိုသိရှိပါက မှန်ကန်တိကျသော မြွေဆိပ်ဖြေဆေးကို အချိန်မီထိုးနိုင်ရန် အထောက်အကူပြုသည်။
မြွေကိုက်ခံရပါက အောက်ပါတို့ကို ရှောင်ကြဉ်ရမည်။

---------------------------------------------------------------------------------------------------------------------------

၁။ ဒဏ်ရာကို ဓားဖြင့်ခွဲခြင်း၊ မီးစဖြင့်ထိုးခြင်း
၂။ လူနာကို အရက်တိုက်ခြင်း
၃။ ဆေးလိမ်းခြင်း၊ နှိပ်ခြင်း၊ ပွတ်ခြင်း
၎။ မြွေမြီးကိုဖြတ်၍မျိုခြင်း
၅။ မြွေကိုက်ဒဏ်ရာ၏ အထက်ဘက်တွင် ကြိုးဖြင့်တင်းကျပ်စွာ ချည်နှောင်ခြင်းသည် ခြေ၊ လက်များ ပုပ်တတ်ခြင်းအပြင် ကြိုးဖြတ် လိုက်ပါက အဆိပ်ပျံ့နှံ့မှုကို လျင်မြန်စေသည်။
၆။ လူနာကို လမ်းလျှောက်ခြင်း၊ လှုပ်ရှားစေခြင်းမပြုရပါ၊ လက်တွင် မြွေကိုက်ခံထားရသူပင်ဖြစ်စေ လှုပ်ရှားမှုကြောင့် အဆိပ်ကို ပိုမိုလျင်မြန်စွာ ပျံ့နှံ့စေသောကြောင့်ဖြစ်သည်။

ကျန်းမာရေးဝန်ကြီးဌာန

No comments:

Post a Comment