မြန်မာနိုင်ငံက ကျောက်မျက်ရတနာတွေ တင်သွင်းခွင့် ပိတ်ပင်တားမြစ်ချက်ကို အမေရိကန် ပြည်ထောင် စုက ဆက်လက် သက်တမ်းတိုးဖို့ ဆုံးဖြတ်လိုက်ပါတယ်။ ဇူလိုင်လနှောင်းပိုင်းက သက်တမ်းကုန်ဆုံး သွားတဲ့ မြန်မာနိုင်ငံက ပတ္တမြားနဲ့ ကျောက်စိမ်း လို၊ ကျောက်မျက် ရတနာတွေ အမေရိကန် နိုင်ငံထဲ တင်သွင်းခွင့် တားမြစ်ချက်ကို သမ္မတ ဘရက်ခ် အိုဘားမား (Barack Obama) က လက်မှတ်ရေးထိုး သက်တမ်းတိုးလိုက်တဲ့အကြောင်း အိမ်ဖြူတော်က ဗုဒ္ဓဟူးနေ့မှာပဲ ကြေညာခဲ့တာပါ။
၂၀၀၃ ခုနှစ် ကတည်းက ချမှတ်ထားတဲ့ မြန်မာပြည် လွတ်မြောက်ရေးနဲ့ ဒီမိုကရေစီ အက်ဥပဒေ အရ မြန်မာနိုင်ငံ ထွက်ကုန်တွေကို တင်သွင်းခွင့် တားမြစ်ချက် အများစုကိုတော့ မကြာသေးခင် နှစ်တွေက စလို့ မြန်မာနိုင်ငံနဲ့ ဆက်ဆံရေးတွေ တိုးမြှင့်လာနေတဲ့ အမေရိကန် ပြည်ထောင်စုက ဖယ်ရှားပေးထား တာပါ။
ဒါပေမဲ့လည်း မြန်မာနိုင်ငံက လက်နက်ကိုင် ပဋိပပက္ခတွေ ဖြစ်ပွား ရာ ဒေသတွေ မှာ စစ်တပ်က ပါဝင် ပတ်သက်နေ တယ်လို့ ယုံကြည်နေကြတဲ့ ကျောက်မျက် လုပ်ငန်းကို ပိတ်ပင်ဖို့ အမေရိကန်က ဆက်လက် သက်တမ်းတိုးခဲ့တာ ဖြစ်ပါ တယ်။
ကျောက်မျက်တင်သွင်းခွင့် တားမြစ်တဲ့ ဥပဒေကို စတင်အဆိုပြုခဲ့သူ တဦးဖြစ်တဲ့ အမေရိကန် ရီပတ်ဘလစ်ကန် ပါတီ အထက်လွှတ်တော်အမတ် မစ်ခ်ျ မက်ကောနဲလ် (Mitch McConnell) ကတော့ ဒီနှစ်မှာ နောက်ထပ် သက်တမ်းတိုးဖို့ ကြိုးစားတာမျိုးတော့ မရှိခဲ့ပါဘူး။
ဗွီအိုအေ (မြန်မာပိုင်း)
No comments:
Post a Comment