တောင့်တခြင်းနှင့် ကြောင့်ကြခြင်း

စစ်အောင်

( (ကို) စစ်အောင်ရဲ့ FB မှာတင်ထားတဲ့ ပို့စ်ဖြစ်ပါတယ်။ )

ငယ်ငယ်တုံး ဆရာ တစ်ယောက်က ရှင်းပြခဲ့ဖူး ပါတယ်။ မင်းတို့ လူငယ်တွေက တောင့်တကြတယ်။ ဘာလို့လည်း ဆိုတော့ မင်းတို့မှာ လိုချင်တာ၊ လုပ်ချင်တာတွေ၊ အိမ်မက်တွေ ရှိတယ်၊ အခု နေရထိုင်ရ လုပ်နေရတာ တွေကို အားမရဘူး၊ မကြိုက်ဘူး။ ဒီတော့ အပြောင်းအလဲကို တောင့်တတယ်။ အသစ်အဆန်းကို တောင့်တတယ် တဲ့။

ငါတို့ လူကြီးတွေ ကတော့ ကြောင့်ကြတယ်။ ဘာလို့လည်း ဆိုတော့ အတွေ့အကြုံ ကနေ ရထားတဲ့ သင်ခန်းစာ တွေကြောင့် အမှားတွေ၊ ပြဿနာ တွေကို ရှောင်ချင်တဲ့စိတ်က များနေလို့ ပဲတဲ့။ ဒါ့ကြောင့် အသစ်အဆန်း တစ်ခုခု လုပ်ရ တော့မယ် ဆိုရင် ဘာများ ဖြစ်မလဲဟဲ့ ဆိုပြီး အရင် တွေးတယ်တဲ့။

ဒီတော့ မိဘတွေ၊ ဆရာတွေက ကြောင့်ကြတယ်။ သားသမီးတွေ၊ တပည့်တွေက တောင့်တတယ်။ နှစ်ဘက်လုံး ကတော့ မှန်နေတာပဲ၊ ဒါပေမယ့် ကြောင့်ကြလွန်း ရင်လည်း ဘယ်လိုမှ ခရီးမပေါက် နိုင်တော့ဘူး၊ တောင့်တ လွန်းရင်လည်း မှားတတ်၊ လမ်းလွဲ တတ်တယ်။ ဒီနှစ်ခုကို ဟန်ချက်ညီညီ ကျင့်သုံးနိုင်ရင် မိဘ၊ ဆရာနဲ့ သားသမီး၊ တပည့်ကြားမှာ ဆက်ဆံရေး ကောင်းမယ်၊ လူ့အဖွဲ့အစည်းလည်း တိုးတက်မယ်တဲ့။

ဆရာ ပြောခဲ့စကားဟာ အခု အခြေအနေ မှာလည်း မှန်နေတုန်း ပါပဲ။ ဖိနှိပ်မှုတွေ အောက်မှာ အကြာကြီး နေခဲ့ရတဲ့ ကျွန်တော်တို့ လွတ်လပ်မှု၊ ဒီမိုကရေစီ ကျင့်သုံး နိုင်မှုကို တောင့်တခဲ့ရတဲ့ ရက်တွေ ကြာခဲ့ပါပြီ။ ပေးဆပ်ခဲ့ရတာ တွေလည်း များလှပါပြီ။ အခု အစိုးရသစ် လက်ထက်မှာ နည်းနည်းလေး ပွင့်လင်းလာတော့ ဒါတွေ အားလုံးကို များများနဲ့ မြန်မြန်လေး ဖြစ်စေချင်တယ်။ ဒါဟာ သဘာဝကျတဲ့ ခံစားမှုပါပဲ။

တဖက်က သမ္မတကြီး ဦးသိန်းစိန် ခေါင်းဆောင်တဲ့ အစိုးရ မှာလည်း လုပ်သာ လုပ်ပေးနေရတယ်၊ ကြောင့်ကြမှုတွေ ရှိမှာ အမှန်ပဲ။ အထူးသဖြင့် အတွင်းရန် တွေပေါ့။ အခု နိုင်ငံရေး အကျဉ်းသားတွေ လွှတ်တဲ့ ကိစ္စမျိုးမှာ အကုန် လွှတ်ပေးရင်တော့ အကောင်းဆုံးပေါ့။ ဒါပေမယ့် ဘာတွေ ကြောင့်ကြ စိုးရိမ် နေရသလဲ ဆိုတာတော့ သူတို့ပဲ သိနိုင်မှာ ဖြစ်ပါတယ်။

ဘာပဲပြောပြော ဆရာ ပြောပြသလိုပဲ တောင့်တသူတွေ ဘက်ကလည်း ကြောင့်ကြမှုတွေကို နားလည်ပြီး စိုးရိမ်ဖို့ မလိုဘူး ဆိုတာက ပြနိုင်ရင်၊ ကြောင့်ကြသူတွေ ဘက်ကလည်း တောင့်တသူ တွေရဲ့ ခံစားချက်ကို နားလည်ပြီး လုပ်သင့်တာကို လုပ်ပေးနိုင်မယ် ဆိုရင်တော့ အကောင်းဆုံး ပါပဲ။(http://padaukmyay.blogspot.com/2011/10/blog-post_14.html)မှကူးယူဖော်ပြပါသည်။