Friday, 18 March 2016

ညောင်ပင်သာကျေးရွာရှိ မီးဘေးသင့်ပြည်သူများအား တပ်မတော်(ကြည်း၊ ရေ၊ လေ) မိသားစုများမှ ပစ္စည်းများလှူဒါန်း

မကွေးတိုင်းဒေသကြီး၊ မကွေးမြို့နယ်၊ ကံသာကြီးကျေးရွာအုပ်စု၊ ညောင်ပင်သာကျေးရွာ၌ မတ် ၁၆ ရက် မွန်းလွဲပိုင်းတွင် မီးလောင်ကျွမ်းမှုဖြစ်ပွားခဲ့ပြီး မီးလောင်ကျွမ်းခဲ့သည့် အဆောက်အအုံများနှင့် အပျက်အစီး များကို တပ်မတော်သားများ၊ မြန်မာနိုင်ငံ ရဲတပ်ဖွဲ့ဝင်များ၊ မီးသတ်တပ်ဖွဲ့ဝင်များနှင့် ကျေးရွာပြည်သူများ ပူးပေါင်း၍ ရှင်းလင်းဖယ်ရှားခြင်း၊ မီးကြွင်းမီးကျန်များကို အပြီးသတ် မီးငြှိမ်းသတ်ခြင်းတို့အား ဆက်လက်ဆောင်ရွက်လျက်ရှိသည်။



ထို့နောက် ညောင်ပင်သာကျေးရွာရှိ မင်္ဂလာအေးဘုန်းတော်ကြီးကျောင်းတွင် မီးဘေးသင့်ပြည်သူများအတွက် ပစ္စည်းများပေးအပ် လှူဒါန်းပွဲကိုပြုလုပ်ရာ ၀န်ကြီးချုပ်နှင့်တိုင်းမှူးတို့က မီးဘေးသင့် ပြည်သူများအတွက် စားသောက်နေထိုင်ရေး၊ စိုက်ပျိုးရေး၊ မွေးမြူရေး၊ ကျန်းမာရေး၊ ပညာရေး အစရှိသည်တို့ကို တာဝန်ရှိသူများနှင့် ပေါင်းစပ်ညှိနှိုင်းဆောင်ရွက်ပေးသည်။
ယင်းနောက် ၀န်ကြီးချုပ်က ဌာနဆိုင်ရာနှင့်အလှူရှင်များမှ လှူဒါန်းသော ပစ္စည်းများကိုလည်းကောင်း၊ တိုင်းမှူးက တပ်မတော်(ကြည်း၊ ရေ၊ လေ) မိသားစုများမှ လှူဒါန်းသော ပစ္စည်းများကိုလည်းကောင်း အသီးသီး ပေးအပ်လှူဒါန်းကြရာ မီးဘေးသင့်ပြည်သူများကိုယ်စား ရပ်မိရပ်ဖများက လက်ခံရယူကြသည်။
ဆက်လက်၍ နယ်မြေခံတပ်မတော် ဆေးရုံမှဆေးကုသရေးအဖွဲ့က မီးဘေးသင့်ပြည်သူများအား ကျန်းမာရေး စောင့်ရှောက်မှုလုပ်ငန်းများ ဆောင်ရွက်ပေးနေမှုများကို ကြည့်ရှုအားပေးပြီး လိုအပ်ချက်များကို ဖြည့်ဆည်း ဆောင်ရွက်ပေးခဲ့ကြောင်း သတင်းရရှိသည်။
တပ်မတော်ကာကွယ်ရေးဦးစီးချုပ်ရုံး

No comments:

Post a comment