အစဉ်အလာ ကောင်းခဲ့ကြသော ဆွေမျိုးပေါက်ဖော်တွေ

ပြည်သူ့လွှတ်တော်နဲ့ အမျိုးသားလွှတ်တော်တွေကို နိုင်ငံတော် သမ္မတကြီးမက မိမိတို့ အစိုးရ လက်ထက် မြစ်ဆုံဆည် တည်ဆောက် တာကို ရပ်ဆိုင်းထားမယ်လို့ သဝဏ်လွှာ ပေးပို့ခဲ့ရာ မြန်မာနိုင်ငံရှိ ပြည်သူပြည်သား တစ်ရပ်လုံး မျှော်လင့်တောင့်တ နေမှုတွေကို နိုင်ငံတော်အကြီးအကဲမှ ဖြည့်ဆည်း ပေးလိုက်တာဖြစ်လို့ ဝမ်းသာကြ၊ ကျေနပ်ကြနဲ့ နိုင်ငံတော် သမ္မတကြီး ဦးစီး အစိုးရအဖွဲကိုလည်း ကျေးဇူးတင်ကြတယ်လို့ သတင်းတွေမှာ အားလုံး ကြားသိ မြင်တွေ့ရမှာ ဖြစ်ပါတယ်။ ဒီသတင်းဟာ မထင်မှတ်ထားတဲ့ သတင်းဖြစ် လို့လည်း အသိပညာရှင်၊ အတတ်ပညာရှင်၊ စာပေနဲ့ စာနယ်ဇင်း၊ စီးပွားရေး ဆိုင်ရာအဝန်းအဝိုင်း၊ အလွှာအသီးသီးရှိ ပြည်သူပြည်သားတစ်ရပ်လုံး၏ မြစ်ဆုံဆည် တည်ဆောက် ခြင်းရပ်ဆိုင်းမှုအပေါ် လှိုက်လှဲစွာကြိုဆိုတဲ့ ချီးကျူးထောပနာ ပေးမှုများ မီဒီယာပေါင်းစုံတွင် တွေ့နေ၊ မြင်နေ၊ ကြားနေ ရတာ ဖြစ်ပါတယ်။

ယနေ့ ပြည်ထောင်စု သမ္မတ မြန်မာနိုင်ငံတော် အစိုးရသစ်ရဲ့ သက်တမ်းက နုနယ်သေးသော်လည်း ပြည်သူက ရွေးချယ် တင်မြှောက်ထားတဲ့ ပြည်သူ့အစိုးရပီပီ ပြည်သူလူထု အကျိုးကို ရှေ့တန်းတင် ကြိုးပမ်းဆောင်ရွက်နေမှု အရပ်ရပ်အနက် ကြီးကျယ်ထင်ရှားသော သာဓကတစ်ခုလို့ ကမ္မည်းတင်ရမှာ ဖြစ်ပါတယ်။ တစ်ဖက်တွင်လည်း မြစ်ဆုံဆည် တည်ဆောက် နေတာကို ရပ်ဆိုင်းလိုက်ရတဲ့ အခြေအနေမှာ မူလသဘောတူစာချုပ် ချုပ်ဆိုထားတဲ့ တရုတ်ပြည်သူ့ သမ္မတနိုင်ငံမှ ကုမ္ပဏီနဲ့ စည်းမျဉ်းစည်းကမ်းတွေအရ ဆက်လက် ဆွေးနွေးရန် ကိစ္စဟာ မလွဲမသွေ ပေါ်ပေါက် ရလာပြီဖြစ်ပါတယ်။

အစိုးရ သက်တမ်းဟာ (၆)လပြည့်မြောက်ခဲ့ပြီး ဖြစ်ပါတယ်။ အစိုးရသစ်ရဲ့ ရပ်တည်ချက်၊ သဘောထား၊ ရှေ့ဆက် သွားမယ့် လမ်းကြောင်းနဲ့ အစိုးရသစ်ရဲ့ ကြန်အင် လက္ခဏာတွေကို နိုင်ငံတော်သမ္မတကြီး၏ မိန့်ခွန်းတွေ အနည်ထိုင် မရင့်ကျက်နိုင်သေးတဲ့ နုနယ်သေးတဲ့ သက်တမ်းကာလအတွင်း အားသွန်ခွန်စိုက် ကြိုးပမ်းဆောင်ရွက်ခဲ့တဲ့ နိုင်ငံရေး၊ စီးပွားရေး၊ လူမှုရေး ပြုပြင်ပြောင်းလဲမှု အရပ်ရပ်အရ ပိုမိုပွင့်လင်းပြီး ထင်သာမြင်သာရှိမှုတို့ကို ထင်ထင်ရှားရှား မြင်တွေ့လာရပြီလို့ ပြောရမှာ ဖြစ်ပါတယ်။

''ပြည်သူ့အသံ လွှတ်တော်အသံ၊ ပြည်သူ့ဆန္ဒ လွှတ်တော်ဆန္ဒ၊ ပြည်သူတို့မျှော်လင့်ချက် လွှတ်တော်က ဖော်ဆောင်ရွက်'' ဆိုတဲ့ ဆောင်ပုဒ်နဲ့ အညီ မြန်မာနိုင်ငံ ပြည်သူပြည်သားတွေ အားလုံး တစ်ခဲနက်အတည်ပြု ထောက်ခံထားတဲ့ ဖွဲ့စည်းပုံ အခြေခံဥပဒေနဲ့အညီ ဆောင်ရွက်နေချိန်လို့ ဆိုရမှာ ဖြစ်ပါတယ်။

နိုင်ငံတကာ ဆက်ဆံရေးနဲ့ ပတ်သက်လို့ နိုင်ငံတော်ဟာ လွတ်လပ်ပြီး တက်ကြွတဲ့ ဘက်မလိုက်တဲ့ နိုင်ငံခြားရေးမူဝါဒကို ကျင့်သုံးနေပါတယ်။ ကမ္ဘာ့ငြိမ်းချမ်းရေးနဲ့ နိုင်ငံအချင်းချင်း မိတ်ဝတ်မပျက် ပေါင်းဖက်ဆက်ဆံရေးကို ရှေ့ရှုပါတယ်။ နိုင်ငံအချင်းချင်း ငြိမ်းချမ်းစွာအတူယှဉ်တွဲ နေထိုင်ရေးမူတွေကို စောင့်ထိန်းဆောင်ရွက်လျက်ရှိပါတယ်။ အထူးသဖြင့် အိမ်နီးချင်းနိုင်ငံတွေ အာဆီယံ အဖွဲ့ဝင် နိုင်ငံတွေနဲ့ ပတ်သက်ပြီး အထူးအလေးထား ဆောင်ရွက်နေတယ်လို့ ပြောရမှာ ဖြစ်ပါတယ်။ အစိုးရသစ် တက်ပြီးနောက်ပိုင်း နိုင်ငံတော်သမ္မတကြီးရဲ့ ပထမဆုံးချစ်ကြည်ရေး ခရီးစဉ်ဟာ အာဆီယံအလှည့်ကျဥက္ကဋ္ဌ နေရာတာဝန်ယူထားတဲ့ အင်ဒိုနီးရှားနိုင်ငံဖြစ်ပြီး ၂ဝ၁၄ ခုနှစ် အာဆီယံအလှည့်ကျ ဥက္ကဋ္ဌရာထူးကို မြန်မာနိုင်ငံမှ ရယူထမ်းဆောင်မည့် အဆိုပြု ချက်ကို တရားဝင် ထုတ်ပြန်နိုင်ခဲ့သလို ဒုတိယခရီးစဉ်အဖြစ် အိမ်နီးချင်းနိုင်ငံတွေအနက်မှ တရုတ်ပြည်သူ့သမ္မတနိုင်ငံသို့ သွားရောက်ခဲ့ရာတွင်လည်း မူလရှိရင်းစွဲ ချစ်ကြည် ရင်းနှီး မှုတွေအပြင် နှစ်နိုင်ငံဆက်ဆံရေး မဟာဗျူဟာမြောက် လက်တွဲပူးပေါင်းဆောင်ရွက်ရေး မိတ်ဖက်နိုင်ငံအဆင့်သို့ အဆင့်မြှင့်တင် ဆောင်ရွက်နိုင်ခဲ့တာကို တွေ့ရှိရမှာဖြစ်ပါတယ်။

အမှန်စင်စစ် တရုတ်ပြည်နဲ့ မြန်မာပြည်သည် ယခုမှ စတင်ပေါင်းဖက်တဲ့ မိတ်ဆွေမဟုတ်ပါ။ နှစ်ပေါင်း များစွာကပင် နယ်နိမိတ်ချင်း ရှည်လျားစွာ ထိစပ်ခဲ့တဲ့ အိမ်နီးချင်း နိုင်ငံတစ်နိုင်ငံ အဖြစ်သာမကဘဲ ခေတ်သမိုင်းအဆက် ဆက်တွင်လည်း ချစ်ကြည်ရင်းနှီးစွာ ဆက်ဆံခဲ့ကြတာ ဖြစ်လို့ နှစ်နိုင်ငံဆက်ဆံရေး အစဉ်အလာဟာ ဆွေမျိုး ပေါက်ဖော်ပမာ ချစ်ကြည်မှု၊ အပြန်အလှန် လေးစားယုံကြည်မှုတို့ ရှိခဲ့ပြီးဖြစ်ပါတယ်။ အစိုးရအဆက်ဆက် တရုတ်ပြည်နဲ့ ဆက်ဆံရေးကို အလေးအနက်ထားကာ ဆောင်ရွက်ခဲ့လို့ ယခုအစိုးရသစ် လက်ထက်မှာ အစိုးရဖွဲ့စည်းပြီး သက်တမ်းတို ကာလအတွင်းမှာပင် အိမ်နီးချင်းနိုင်ငံတွေအနက် တရုတ်ပြည်ကို သမ္မတကြီးရဲ့ ဒုတိယ ခရီးစဉ်အဖြစ် သွားရောက်နိုင်ခဲ့ပြီး နှစ်နိုင်ငံဆက်ဆံရေးကို မဟာဗျူဟာမြောက် ဘက်စုံပူးပေါင်းဆောင်ရွက်ရန်အထိ တက်လှမ်း နိုင်ခဲ့သည်ကို တွေ့ရမှာ ဖြစ်ပါတယ်။

မြစ်ဆုံဆည်စီမံကိန်းကို မြန်မာနိုင်ငံအနေနဲ့ ရပ်ဆိုင်းလိုက်တာကို နှစ်ဖက်နိုင်ငံရှိ ပြည်သူအမျိုးမျိုးက ထင်ကြေးအမျိုးမျိုး၊ ဝေဖန်သုံးသပ်မှုအမျိုးမျိုး ထုတ်ဖော်လာခဲ့ကြပါတယ်။ ပြည်သူလူထုကလည်း နိုင်ငံတော်အစိုးရအနေနဲ့ ပြည်သူ့ဆန္ဒကို လိုက်လျောပြီး ရပ်ဆိုင်းလိုက်ရတဲ့အပေါ် တစ်ဖက်မှ တုံ့ပြန်လာမယ့် အနေအထားကို စိုးရိမ်စိတ်နဲ့ ပြောကြားတာတွေ ရှိသလို နှစ်နိုင်ငံကြား ချစ်ကြည်ရေး ထိခိုက်မှုတွေကို ပူပန်မှုတွေ ရှိလာကြပါတယ်။ အားပေးသူ၊ ရှုတ်ချသူ၊ ထောက်ခံသူ၊ ကန့်ကွက်သူ၊ တွန်းအားပေးသူ၊ ဖိအားပေးသူ၊ လှုံ့ဆော်သူ စတဲ့ ထင်မြင်ယူဆချက် မျိုးစုံတွင် အဓိက အခြေခံအချက်မှာ နှစ်ခုသာဖြစ်ပြီး ပထမအချက်မှာ နှစ်နိုင်ငံပြည်သူလူထုရဲ့ စိုးရိမ်မှုဖြစ်သော နှစ်နိုင်ငံအကြား ချစ်ကြည်ရင်းနှီးမှုကို မပျက်စီး စေလိုတဲ့ဆန္ဒဖြစ်ပြီး ကျန်အချက်မှာ ဒီပြဿနာ ရပ်ကို အကြောင်းပြုလို့ နိုင်ငံရေးအမြတ်ထုတ်ကာ တရုတ်-မြန်မာ နှစ်နိုင်ငံကြား ချစ်ကြည်ရင်းနှီးမှုကို ပျက်ပြားစေဖို့ လှုံ့ဆော်လိုတဲ့ ဆန္ဒတွေလို့ ပြောရမှာ ဖြစ်ပါတယ်။

အမှန်စင်စစ် နှစ်နိုင်ငံ ပြည်သူပြည်သားတို့ စိုးရိမ်ပူပန်နေသလို မြစ်ဆုံဆည် စီမံကိန်း ရပ်ဆိုင်းလိုက်ရုံမျှနဲ့ နှစ်နိုင်ငံချစ်ကြည်ရေး ပျက်ယွင်းသွားဖို့ အကြောင်းမရှိပါဘူး။ ဒီမိုကရေစီ ကျင့်စဉ်အရ ပြည်သူ့ဆန္ဒကို ဖြည့်ဆည်းတဲ့ အနေနဲ့ ဒီစီမံကိန်းကို ရပ်ဆိုင်းလိုက်တာ ဖြစ်ပေမယ့် တစ်ဖက်က မူလချုပ်ဆိုထားတဲ့ စာချုပ်တွေနဲ့ ပတ်သက်လို့ ထိခိုက်နစ်နာမှုတွေ အပေါ် သက်ဆိုင်ရာ အစိုးရအနေနဲ့ ပြေလည်အောင် ညှိနှိုင်း အဖြေရှာ ဆောင်ရွက် သွားမှာ ဖြစ်တယ်လို့ သမ္မတကြီးရဲ့ သဝဏ်လွှာမှာ အတိအလင်း ဖော်ပြထားပြီး ဖြစ်ပါတယ်။ -

မြစ်ဆုံ ဆည်စီမံကိန်းကို ရပ်ဆိုင်းလိုက်တာဟာ မြန်မာနိုင်ငံတော် အစိုးရက ဒီမိုကရေစီကျင့်စဉ်တွေ အတိုင်း ပြည်သူ့ ဆန္ဒကို အလေးထားကာ အမျိုးသားအကျိုးစီးပွားကို ကာကွယ်စောင့်ရှောက်မှုသာ ဖြစ်လို့ မြန်မာတို့ရဲ့ အမျိုးသား အကျိုးစီးပွားကို ထိခိုက်စေလိုတဲ့ ဆန္ဒမရှိဘဲ တရုတ်ပြည်သူ့ သမ္မတနိုင်ငံအနေနဲ့ ဒီကိစ္စကို ပြဿနာ တစ်ရပ်အဖြစ် ရှုမြင်မှာ မဟုတ်ပါဘူး။

မူလစီမံကိန်း တည်ဆောက်ရန် သဘောတူညီပြီးဖြစ်တဲ့ တရုတ်ပြည်သူ့သမ္မတနိုင်ငံနဲ့ ချုပ်ဆိုထားတဲ့ အဆိုပါ စီမံကိန်းနဲ့ သက်ဆိုင်တဲ့ စာချုပ်စာတမ်းတွေကို မိတ်ဝတ်မပျက်စေဘဲ သဘောတူ လက်ခံ ညှိနှိုင်း ဆောင်ရွက်သွားမှာ ချစ်ကြည် ရင်းနှီးမှု အခြေခံကာ ယခုကိစ္စရပ်ကို အဆင်ပြေ ချောမွေ့စွာ ဖြေရှင်းသွားနိုင်ပါတယ်။

တရုတ်နိုင်ငံအနေနဲ့ လျှပ်စစ်ဓါတ်အား ရရှိရေးအတွက် အဆိုပါစီမံကိန်းကို အကောင်အထည်ဖော် ဆောင်ရွက်ရတာ ဖြစ်လို့ ဒီစီမံကိန်း အစား မြန်မာနိုင်ငံမှပင် အခြားသင့်လျော်တဲ့ နည်းလမ်းတွေနဲ့ လျှပ်စစ်ဓါတ်အား ရရှိနိုင်လို့ သူတို့ရဲ့ အမျိုးသား အကျိုးစီးပွားကို ထိခိုက်မှုမရှိနိုင်ပါဘူး။

နှစ်နိုင်ငံကြားရှိရင်းစွဲ ချစ်ကြည်ရေးကို အမေရိကန်ဒေါ်လာ ၃.၆ ဘီလီယံမျှလောက်သော ကိစ္စတစ်ခု အတွက်နဲ့ ဘယ်နိုင်ငံကမှ ပျက်ပြားစေလိုမှု မရှိတာ ထင်ရှားပါတယ်။

ဒီကိစ္စမှာ နစ်နာတယ်လို့ ဆိုနိုင်တဲ့ တရုတ်ပြည်သူ့သမ္မတနိုင်ငံမှ ကုမ္ပဏီအနေနဲ့ စာချုပ် ချုပ်ဆိုထားတဲ့ စီမံကိန်း(၈)ခု အနက် ယခုမြစ်ဆုံ စီမံကိန်းတစ်ခုတည်းက ယခုလိုရပ်ဆိုင်းရတာ ဖြစ်လို့ စီးပွားရေးဆိုင်ရာ ပြဿနာတစ်ခု ဖြစ်သော်လည်း လုပ်ငန်းပမာဏအစိတ်အပိုင်းတစ်ခုသာ ဖြစ်လိုပ တရုတ် မြန်မာဆက်ဆံရေး ထိခိုက်နိုင်တဲ့ အဆင့်မျိုးအထိ မရောက်ရှိနိုင် ဘူးလို့ ဆိုရမှာ ဖြစ်ပါတယ်။

မြစ်ဆုံစီမံကိန်း ရပ်ဆိုင်းလိုက်မှုဟာ သာမန်ဖြစ်လေ့ဖြစ်ထရှိတဲ့ ဖြစ်စဉ်မျိုး မဟုတ်ဘဲ ကြုံတောင့်ကြုံခဲ ဖြစ်ပွားတဲ့ ကိစ္စရပ် တစ်ခုလို့ ဆိုနိုင်သော်လည်း ခြေအနေ၊ အချိန်အခါနဲ့ အစဉ်အလာတွေအပေါ် သုံးသပ်ချက်များအရ တရုတ်နဲ့ မြန်မာ၊ မြန်မာနဲ့ တရုတ်အကြား ချစ်ကြည်ရင်းနှီးမှုကို ထိခိုက်စေနိုင်တဲ့ Issue တစ်ခုမဟုတ်ဘူး ဆိုတာ ပေါ်လွင်ထင်ရှား နေပြီဖြစ်ပါတယ်။

၁၉၅ဝပြည့်နှစ်မှ စပြီး နှစ်နိုင်ငံသံတမန် ဆက်ဆံရေးထူထောင် လာခဲ့တဲ့ နိုင်ငံနှစ်ခုအကြား စီမံကိန်းပေါင်း၊ လုပ်ငန်းစဉ် ပေါင်းများစွာထဲမှ တစ်ခုသာပျက်ပြယ်မှု ဖြစ်လို့ စာချုပ်စာတမ်းအရ ပြေလည်အောင်ဖြေရှင်းနိုင်မည်ဖြစ်ပြီး ဒီImpact ဟာ နှစ်နိုင်ငံကြား ချစ်ကြည်ရေးကို လုံးဝမထိခိုက်နိုင်ပေ။

ရုတ်နိုင်ငံရဲ့ စွမ်းအင်လိုအပ်ချက်အရ မြန်မာနိုင်ငံရဲ့ မဟာဗျူဟာ အရေးပါမှုအရ နှစ်နိုင်ငံ ဆက်ဆံရေး မဟာဗျူဟာမြောက် ဘက်စုံ ပူးပေါင်းဆောင်ရွက်ရေး မိတ်ဘက်နိုင်ငံ အဆင့်အထိ တက်လှမ်းနိုင်ခဲ့ပြီး ဖြစ်ရာ သာမန်စီးပွားရေးဆိုင်ရာ စီမံကိန်း တစ်ရပ် ရပ်ဆိုင်းမှုကြောင့် ဆုံးရှုံးရမယ့် ပမာဏဟာ နှစ်ဖက်ပြေလည်အောင် ညှိနှိုင်းဆွေးနွေး အဖြေရှာမည့် အတိုင်းအတာအတွင်းတွင် ရှိလို့ နှစ်နိုင်ငံကြား ချစ်ကြည်ရေးကို လုံးဝမထိခိုက် နိုင်ပေ။

ယနေ့မျက်မှောက်ကာလတွင် ယခင်က မြန်မာနိုင်ငံကို သူစိမ်းပြင်ပြင် ဆက်ဆံခဲ့ပြီး အပြုသဘောမဆောင်တဲ့ အနောက်နိုင်ငံများ၊ EU နိုင်ငံများမှ တစ်ဆင့်ပြီးတစ်ဆင့် တိုးမြှင့်ဆက်ဆံလို့ အကောင်းရှုမြင်ကာ အပြန်အလှန်ပူးပေါင်း ဆောင်ရွက် နိုင်ရေးလမ်းဖွင့်၊ တံတားခင်း ဆောင်ရွက်နေချိန်မှာ မူလကပင် ဆွေမျိုးပေါက်ဖော် ချစ်ကြည်ရေးရှိခဲ့ပြီး သမိုင်းစဉ် တစ်လျှောက် နိုင်ငံအမျိုးသား အကျိုးစီးပွားအပေါ် အပြန်အလှန် ရပ်တည်နိုင်အောင် တည်ဆောက်လာခဲ့တဲ့ ချစ်ကြည်ရေး အစဉ်အလာကို မြစ်ဆုံဆည်ကိစ္စ တစ်ခုတည်းနဲ့ ထိခိုက်ပျက်စီးခံမှာ မဟုတ်ပေ။

တရုတ်-မြန်မာချစ်ကြည်ရေးဟာ မြစ်ဆုံဆည်စီမံကိန်း ရပ်ဆိုင်းလိုက်ရုံနဲ့ ဘာမှ ထိခိုက်စေမှာ မဟုတ်သည်ကို နိုင်ငံတော်သမ္မတကြီးရဲ့ တရုတ်ပြည်သူ့ သမ္မတနိုင်ငံခရီးစဉ်အတွင်း နှစ်နိုင်ငံအကြီးအကဲများ ပြောကြားခဲ့တဲ့ အောက်ပါမိန့်ခွန်းကောက်နှုတ်ချက်တွေက သက်သေပြနေတယ်လို့ အလေးအနက် ယုံကြည်မိပါတယ်-

''သမိုင်းအစဉ်အလာရှိသည့် ဆွေမျိုးပေါက်ဖော်ဆက်ဆံရေး မဟာဗျူဟာမြောက်အဆင့်သို့ရောက်ရှိ မြန်မာနှင့် တရုတ် ဆက်ဆံရေးကို ဆထက်ထမ်းပိုး ဖြစ်ထွန်းသွားစေရေး ကြိုးပမ်းသွားမည်''

(ပြည်ထောင်စုသမ္မတမြန်မာနိုင်ငံတော် နိုင်ငံတော်သမ္မတ ဦးသိန်းစိန်)

''မြန်မာနှင့်တရုတ်နိုင်ငံတို့မှာ ဖွံ့ဖြိုးဆဲနိုင်ငံများဖြစ်ပြီး နိုင်ငံတကာနှင့်ဒေသတွင်း တူညီသည့် ကိစ္စရပ်များရှိ တရုတ်နိုင်ငံအနေဖြင့် မြန်မာနိုင်ငံ၏ တရားမျှတသည့် အကျိုးစီးပွားကို ကာကွယ်စောင့်ရှောက်သွားမည်''

(တရုတ်ပြည်သူ့သမ္မတနိုင်ငံ သမ္မတ မစ္စတာ ဟူကျင်တောင်း)

သက်မင်းဝေယံ

(http://kyeesaytaman.blogspot.com/)မှကူးယူဖော်ပြသည်။