တရားစီရင်ရေးတွင် အဂတိလိုက်စားမှု ရှိ မရှိနှင့် ဥပဒေနှင့် ညီညွတ်ခြင်း ရှိ မရှိ စောင့်ကြည့်နိုင်ရန် ဖွဲ့စည်းမည့် တရား ရုံး စောင့်ကြည့်ရေး ကော်မတီတွင် သတင်းမီဒီယာသမား တစ်ဦးကို အတွင်းရေးမှူးအဖြစ် ခန့်အပ်မည့် ပုဒ်မတစ်ခုကို တရားရုံးများ စောင့်ကြည့်ရေး ဥပဒေကြမ်းတွင် ထည့်သွင်း ရေးဆွဲထားကြောင်း ပြည်သူ့လွှတ်တော် တရားစီရင်ရေး ကော်မတီဥက္ကဋ္ဌ သူရဦးအောင်ကိုက ပြောကြားသည်။
တရားရေးမဏ္ဍိုင် ယိမ်းယိုင်နေမှု ပြန်လည် တည့်မတ်နိုင်ရန် ယင်းဥပဒေကို ရေးဆွဲရခြင်း ဖြစ်ကြောင်း သူရဦးအောင်ကိုက ထပ်လောင်း ပြော ကြားသည်။ “ဗဟိုအဆင့်ကနေ မြို့နယ်အဆင့်အထိ မီဒီယာတွေကို စောင့်ကြည့်ပြီး ပါစေချင်ပါတယ်။ စတုတ္ထမဏ္ဍိုင်ကိုလည်း အားပြုတဲ့ သဘောပါ” ဟု ပြည်သူ့လွှတ်တော် တရားစီရင်ရေး ကော်မတီ ဥက္ကဋ္ဌ သူရဦးအောင်ကိုက ရှင်းပြ သည်။
လက်ရှိတွင် စာနယ်ဇင်းကောင်စီ (ယာယီ) ၏ ရေးဆွဲထားသော အခြေခံမူ သဘောများတွင် ယင်းကဲ့သို့ ကိစ္စများနှင့် ပတ်သက်သော အချက် အလက်များ ထည့်သွင်းထားခြင်း မရှိကြောင်း၊ ကောင်စီ၏ ခွင့်ပြုချက် ဆိုသည်မှာလည်း အားလုံးကိုယ်စား ထုတ်ပြန်ပေးနိုင်သည့် အာဏာပိုင် အဖွဲ့အစည်း မဟုတ်သောကြောင့် ယင်းကိစ္စသည် လွဲချော်သည့် အချက်ဖြစ်ကြောင်း မြန်မာနိုင်ငံ စာနယ်ဇင်း ကောင်စီ (ယာယီ) အဖွဲ့ဝင် ဦးကိုကို (Yangon Media Group) က ထောက်ပြ ပြောဆို သည်။ “မီဒီယာသမားရဲ့ တာဝန်က ဒီအလုပ်လုပ်ရမှာ မဟုတ်ပါဘူး။ Police တို့၊ Inspector တို့မှ မဟုတ်တာ၊ ကျွန်တော်တို့က အဝေးကပဲ စောင့်ကြည့်ရမှာ။ အတွင်းကို ဝင်ကြည့်မယ့်သူတွေ မဟုတ်ပါဘူး” ဟု ၎င်းက မှတ်ချက်ပြုသည်။
လက်ရှိတွင် တရားရုံးများ စောင့်ကြည့်ရေး ဥပဒေကြမ်းကို နှစ်ပိုင်း ခွဲကာ ရေးဆွဲနေခြင်း ဖြစ်ပြီး ပထမပိုင်းမှာ ရေးဆွဲပြီး ဖြစ်၍ ဒုတိယပိုင်းကို ဆက်လက်လုပ်ဆောင်နေပြီ ဖြစ်ကြောင်း၊ ယင်းဥပဒေကြမ်းကို လွှတ်တော်သို့ မတင်မီ ပြည်သူအများ သိစေရန် ချပြသွားမည် ဖြစ်ကြောင်း သူရဦးအောင်ကို က ပြောကြားသည်။
ဥပဒေကြမ်း ရေးဆွဲခြင်း မပြီးပြတ်သေးသောကြောင့် ပုဒ်မနှင့် အချက်အလက်များ အားလုံး ပြောကြားနိုင်ခြင်း မရှိသေးကြောင်း ၎င်းကထပ်လောင်း ပြော ကြားသည်။
The Voice Weekly
No comments:
Post a Comment