ဒုတိယအကြိမ်သက်တမ်းလွှတ်တော်များခေါ်ယူနိုင်ရန် ဖွဲ့စည်းပုံအခြေခံဥပဒေအရ ၂၀၁၅ ခုနှစ် အထွေေ ထွရွေးကောက်ပွဲအား အောက်တိုဘာလကုန်နှင့် နိုဝင်ဘာလဆန်းတွင် ကျင်းပမည်ဖြစ်ကြောင်း ပြည်ထောင် စုရွေးကောက်ပွဲကော်မရှင် ဥက္ကဋ္ဌ ဦးတင်အေးက ပြောကြားသည်။
ပြည်ထောင်စုရွေးကောက်ပွဲကော်မရှင်နှင့် အရပ်ဘက်အဖွဲ့အစည်းများ၊ မဲဆန္ဒရှင် စာရင်းပြုစုခြင်းနှင့် စပ်လျဉ်း၍ ရန်ကုန်မြို့ မီကာဆာဟိုတယ်၌ အောက်တိုဘာ ၂၀ ရက်ကပြုလုပ်သည့် တွေ့ဆုံပွဲအပြီး သတင်း မီဒီယာများ၏ ၂၀၁၅ ခုနှစ်၌ ရွေးကောက်ပွဲကျင်းပပေးခြင်း ရှိ မရှိ မေးမြန်းမှုအား ဦးတင်အေးက ထိုသို့ပြော ကြားခြင်းဖြစ်သည်။
၂၀၁၅ ခုနှစ် ရွေးကောက်ပွဲအား ရွှေ့ဆိုင်းရန်မရှိကြောင်း၊ ဖွဲ့စည်းပုံအခြေခံဥပဒေအရ လွှတ်တော် သက်တမ်းသည် ငါးနှစ်သာရှိကြောင်း၊ ပထမအကြိမ် ပြည်သူ့လွှတ်တော်သည် ၂၀၁၁ ခုနှစ် ဇန်န၀ါရီ ၃၁ ရက်တွင် ကျင်းပခဲ့သဖြင့် ပြည်သူ့လွှတ်တော်ပထမသက်တမ်းသည် ၂၀၁၆ ခုနှစ် ဇန်န၀ါရီ ၃၁ ရက်တွင် ကုန်ဆုံးမည်ဖြစ်ပြီး ပြည်သူ့လွှတ်တော် ဒုတိယသက်တမ်းအား ခေါ်ပေးရမည်ဖြစ်ကြောင်း ကော်မရှင်ဥက္ကဋ္ဌ ဦးတင်အေးက ပြောကြားသည်။
"ဒီလိုခေါ်ပေးနိုင်အောင် ကျွန်တော်တို့က ရွေးကောက်ပွဲကျင်းပပေးရပါမယ်။ ရွေးကောက်ပွဲကျင်းပပြီး ရက်ပေါင်း ၉၀ ကြာ လွှတ်တော်ခေါ်ရတာဖြစ်တဲ့အတွက် ဇန်န၀ါ ရီ ၃၁ ရက်မှာ ကျွန်တော်တို့က နောက် အကျဆုံးထား လွှတ်တော်ခေါ်နိုင်အောင်အတွက် အောက်တိုဘာနောက်ဆုံးပတ်နဲ့ နိုဝင်ဘာပထမပတ်မှာ ကျင်းကိုကျင်းပပေးရမယ်။ အဲဒါကြောင့် ကျွန်တော့်ဘက်ကတော့ ဘာမှ ရွှေ့စရာ၊ ပြောင်းလဲစရာမရှိပါဘူး။ ဖွဲ့စည်းပုံအခြေခံဥပဒေကလည်းဆိုထားတာက ဒီလွှတ်တော်သက်တမ်းကလည်း ငါးနှစ်ပဲရှိရပါမယ်လို့ ဆိုထား တာ" ဟု ကော်မရှင်ဥက္ကဋ္ဌ ဦးတင်အေးက ပြောကြားသည်။
ထို့ပြင် အောက်တိုဘာ ၁ ရက်က နိုင်ငံတော်သမ္မတဦးသိန်းစိန်၏ လစဉ်ရေဒီယိုမှတစ်ဆင့် ပြောကြားသည့် မိန့်ခွန်းတွင် တစ်နိုင်ငံလုံးအတိုင်းအတာအပစ်အခတ်ရပ်စဲပြီး နိုင်ငံရေးဆွေးနွေးပွဲများ စတင်နိုင်မှသာ ၂၀၁၅ ရွေးကောက်ပွဲအောင်မြင်စွာကျင်းပနိုင်မှုနှင့် ငြင်သာသည့် နိုင်ငံရေးအသွင်ကူးပြောင်းမှုများကို သေချာစေ မည် ကို သတိပြုစေလိုသည်ဟုပြောကြားခဲ့သဖြင့် ၂၀၁၅ ခုနှစ်ရွေးကောက်ပွဲကျင်းပနိုင်ခြင်း ရှိ မရှိ အပေါ် မေးခွန်းထုတ်မှုများပေါ်ထွက်လာခဲ့ပြီး သမ္မတ၏မိန့်ခွန်းအပေါ် ကော်မရှင်အနေဖြင့် မှတ်ချက် တစ်စုံ တစ်ရာပေးရန် သတင်းထောက်တစ်ဦး၏ မေးခွန်းမေးမြန်းမှုအား ကော်မရှင်ဥက္ကဋ္ဌ ဦးတင်အေးက "ရွေးကောက်ပွဲက ကော်မရှင်ပဲလုပ်ပါတယ်။ ကော်မရှင်ရဲ့အဆုံးအဖြတ်က အတည်ပါပဲ။ ..... ဖွဲ့စည်းပုံအခြေခံဥပဒေအရကိုက ဆိုင်းလို့မရပါဘူး။ ကော်မရှင်ကလည်းဆိုင်းလို့မရပါဘူး" ဟု ပြန်လည်ဖြေကြားခဲ့သည်။
ပြည်သူ့လွှတ်တော်အစည်းအဝေးကျင်းပခြင်းနှင့်စပ်လျဉ်း၍ ဖွဲ့စည်းပုံအခြေခံ ဥပဒေပုဒ်မ ၁၂၃ တွင် "ပြည်သူ့လွှတ်တော်၏ သက်တမ်းတစ်ရပ်စတင်သော ပထမအကြိမ်ပုံမှန်အစည်းအဝေးကို အထွေထွေေ ရွးကောက်ပွဲ စတင်ကျင်းပသည့်နေ့ရက်မှ ရက်ပေါင်း ၉၀ အတွင်း ကျင်းပရမည်" ဟုပြဋ္ဌာန်းထားသည်။
Eleven Media Group
No comments:
Post a Comment