မြန်မာနိုင်ငံနဲ့ ဆက်ဆံရေး ပိုမိုကောင်းမွန်လိုတဲ့ ဆန္ဒရှိနေဆဲဖြစ်ကြောင်း ဘင်္ဂလားဒေ့ရှ် နိုင်ငံခြားရေးဝန်ကြီး က ပြောပါတယ်။
တနင်္ဂနွေနေ့က ကျင်းပခဲ့တဲ့ နိုင်ငံတကာ ကြက်ခြေနီ (ICRC) နှစ် (၁၅၀) ပြည့် အထိမ်းအမှတ် ဓါတ်ပုံပြပွဲရဲ့ ပြင်ပ၊ သတင်း မီဒီယာတွေနဲ့ တွေ့ဆုံရာမှာ ဘင်္ဂလားဒေ့ရှ် နိုင်ငံခြားရေးဝန်ကြီး အဘူ ဟာဆန် မာမွတ် အလီ က ပြောကြားခဲ့တာပါ။
မြန်မာ ဘင်္ဂလားဒေ့ရှ် နယ်စပ်မှာ နယ်ခြားစောင့်အဖွဲ့ချင်း ပစ်ခတ်မှု ဖြစ် ပွားခဲ့ရာက ဘင်္ဂလားဒေ့ရှ် နယ်ခြားစောင့်တပ်ဖွဲ့ဝင် တစ်ဦးသေဆုံးခဲ့ ပြီး နှစ်ရက်အကြာမှာ အခုလိုပြောကြားခဲ့တာဖြစ်ကြောင်း BD News က ဖေါ်ပြပါတယ်။ မြန်မာအစိုးရဘက်ကတော့ သေဆုံးသူဟာ ဘင်္ဂလားဒေ့ရှ် နယ်ခြားစောင့် တပ်ဖွဲ့ဝင်ဝတ်စုံ ၀င်ဆင်ထားသူမ ဟုတ်ကြောင်း၊ မြန်မာနယ်စပ်ကိုကျုးကျော်ဝင်ရောက်လာခဲ့ တာဖြစ်ကြောင်း ပြောပါတယ်။
အခုအခါ သေဆုံးသူရဲ့အလောင်းကို မြန်မာဘက်က လွှဲပြောင်းပေးအပ်ခဲ့ ပြီးဖြစ်သလို၊ နယ်စပ်အခြေအနေ လည်း ပြန်လည် တည်ငြိမ်အေးဆေး လာပြီဖြစ်ကြောင်း ဘင်္ဂလားဒေ့ရှ် နိုင်ငံခြားရေးဝန်ကြီး ကပြောပါတယ်။
The Daily Star သတင်းစာမှာတော့ သေဆုံးသူရဲ့ မိသားစုအတွက် ဘင်္ဂလားဒေ့ရှ် တာကာငွေ တစ်သိန်း ထောက်ပံ့မှာဖြစ်ပြီး၊ စည်းမျဉ်းဥပဒေ အရ တခြားအထောက်အပံ့တွေလည်း ပေးသွားမယ်လို့ ဘင်္ဂလားဒေ့ရှ် နယ်ခြားစောင့်တပ်မှူး က ပြောဆိုကြောင်းဖေါ်ပြပါတယ်။
ဒီအတွင်း ဘင်္ဂလားဒေ့ရှ် နယ်ခြားစောင့်တပ် ညွှန်ကြားရေးမှူးချုပ်ဟာ ဇွန်လ ၉ ရက်နေ့မှာ မြန်မာနိုင်ငံကို လာရောက်ဖို့ရှိပြီး၊ ဇွန်လ ၁၈ ရက်မှာတော့ နှစ်နိုင်ငံ နိုင်ငံခြားရေးဌာနက အဆင့်မြင့်အရာရှိတွေ ဒါကာမြို့မှာ လုံခြုံရေးကိစ္စတွေ ဆွေးနွေးကြမယ်လို့ သိရပါတယ်။
ဒါ့ပြင် စစ်တကောင်းမြို့ကနေ ကောက်စ်ဘဇားကိုဖြတ်ပြီး၊ မြန်မာ နယ်စပ်အထိ၊ အဲဒီကတဆင့် တရုတ်ပြည်နဲ့ ဆက်သွယ်မယ့် ရထား လမ်းဖေါက်လုပ်ဖို့ စီစဉ်နေတယ်လို့ ဘင်္ဂလားဒေ့ရှ် နိုင်ငံခြားရေးဝန်ကြီး က ပြော ပါတယ်။
RFA Burmese
No comments:
Post a Comment