တပ်စခန်းတခု ဆုတ်ခွာရန် SSA မြောက်ပိုင်းကို အစိုးရတပ် ဖိအားပေး

ရှမ်းပြည်မြောက်ပိုင်း ဒေသများသို့ အစိုးရတပ်များ အင်အားဖြည့် တင်းနေသလို တိုင်းရင်းသား တပ်ဖွဲ့များ၏ အခြေစိုက် စခန်းများအား ဆုတ်ခွာခိုင်းနေခြင်းသည် ငြိမ်းချမ်းရေးကို အဟန့်အတား ဖြစ်စေကြောင်း SSPP ကပြောသည်။

ရှမ်းပြည်တပ်မတော် မြောက်ပိုင်းခေါ် ရှမ်းပြည်တိုးတက်ရေးပါတီ SSA/ SSPP တပ်ဖွဲ့ ဌာနချုပ် ၀မ့်ဟိုင်း၏ အရှေ့တောင်ဖက်ရှိ တပ်စခန်း တခုအား ထပ်မံ ဆုတ်ခွာပေးရန် လွန်ခဲ့သည့် (၄) ရက်ခန့်က ပြောဆိုခဲ့ပြီး ယင်းနေရာတ၀ိုက်သို့ အစိုးရ တပ်ရင်း (၂) ရင်း အင်အား ဖြည့်တင်းထားကြောင်း SSPP တပ်ဖွဲ့ ပြောခွင့် ရပုဂ္ဂိုလ် ဗိုလ်မှူး စိုင်းလက ပြောသည်။

“မိုင်းရှူး မြို့နယ်ထဲက တာဆမ်ပူး ကတို့ဆိပ်မှာ နေရာယူထားတဲ့ ကျနော်တို့တပ်ကို အဲဒီမှာ မနေဖို့နဲ့ ဖယ်ပေးဖို့ ပြောလာတယ်။ သူတို့သာ အဲဒီလို စစ်ရေးနဲ့ ခြိမ်းခြောက် တာမျိုး လုပ်နေရင် ငြိမ်းချမ်းရေးအတွက် နည်းနည်းတော့ အဟန့်အတား ဖြစ်မှာပေ့ါ။”

လောလောဆယ် SSA ဖက်မှ ဆုတ်ခွာခြင်း မရှိသေးသလို မိုင်းရှူးမြို့နယ် အခြေစိုက် အစိုးရ၏ ခြေမြန်တပ်ရင်း ခမရ (၁၄၉) နှင့် (၁၅၀) မှ တပ်ဖွဲ့ဝင် အင်အား (၂၀၀) ခန့်အား  ယင်းတပ်စခန်း ၀န်းကျင်သို့ ပို့ဆောင်ထားသည့်အတွက် နှစ်ဖက် တပ်ဖွဲ့များ အလွန်နီးကပ် နေပြီး ရှေ့ဆက်တိုးလာပါက တိုက်ပွဲ ဖြစ်ပွားလာနိုင်ကြောင်း ၎င်းက ဆက်ပြောသည်။

ယင်းကိစ္စအား ပြည်ထောင်စု ငြိမ်းချမ်းရေး ဖော်ဆောင်ရေးအဖွဲ့ ဒုဥက္ကဌ ဦးသိန်းဇော်ထံ ကိုယ်စားလှယ် စေလွတ်၍ အကြောင်းကြားခဲ့သော်လည်း ယင်းဒေသသည် ယခင် ကတည်းက SSA တပ်ဖွဲ့များ၏ နေရာ မဟုတ်ဟု ဖြေကြားခဲ့ကြောင်း သိရသည်။

သို့သော် ယင်းဒေသသည် ၁၉၈၉ ခုနှစ် စစ်အစိုးရလက်ထက် အပစ်အခတ် ရပ်စဲစဉ် ကတည်းက မြောက်ပိုင်း SSA တပ်ဖွဲ့မှ ခနောက်စိမ်း သတ္တု စမ်းသပ်တူးဖော်သည့် လုပ်ငန်းကို တရားဝင် လုပ်ကိုင်နေခြင်း ဖြစ်သည်ဟု ဗိုလ်မှူးစိုင်းလ က ပြောသည်။  

ထို့အပြင် ပြဿနာများအား ငြိမ်းချမ်းစွာ အဖြေရှာသည့်နည်းဖြင့် ဖြေရှင်းသင့်ကြောင်းနှင့် “ဒီလို အကြမ်းဖက်နည်းနဲ့ဆိုရင် ကျနော်တို့ လိုချင်တဲ့ ငြိမ်းချမ်းရေး ပန်းတိုင်ကို ဘယ်တော့မှ ရောက်မှာ မဟုတ်ဖူး။” ဟု ၎င်းက ဆက်ပြောသည်။

သမ္မတ ဦးသိန်းစိန် အစိုးရလက်ထက် အပစ်အခတ်ရပ်စဲရေး ထပ်မံ လက်မှတ် ရေးထိုး ပြီးနောက် ဒေသ တွင်းရှိ SSA တပ်စခန်းများအား ပြောင်းရွှေ့ရန် အစိုးရတပ်က ဖိအား ပေးခဲ့သည့် အတွက် နှစ်ဖက် တိုက်ပွဲများ ပြန်လည်ဖြစ်ပွားခဲ့သည်။ ထိုစဉ်က SSA ဖက်မှ တပ်စခန်း (၂) ခု ဆုတ်ပေးခဲ့ပြီး ယခု တတိယမြောက် စခန်းအား ထပ်မံ ဆုတ်ခွာခိုင်းခြင်း ဖြစ်သည်။

အစိုးရနှင့် SSA တို့ အပစ်အခတ်ရပ်စဲရေး လက်မှတ်ရေးထိုးပြီးနောက် ဒေသတွင်း အကြိမ် (၂၀) ကျော် တိုက်ပွဲ ဖြစ်ပွားခဲ့သလို ယနေ့အချိန်ထိ နိုင်ငံရေးအရ ထပ်မံဆွေးနွေးမှု မပြုလုပ် နိုင်သေးကြောင်း ဗိုလ်မှူး စိုင်းလက ဆိုသည်။  

အပစ်အခတ်ရပ်စဲရေး သဘောတူ လက်မှတ်ရေးထိုးခဲ့စဉ်က ဌာနချုပ် ၀မ့်ဟိုင်းအနီး တပ်စွဲထားသည့် အစိုးရ တပ်များအား ပြန်လည် ဆုတ်ခွာပေးရန် SSA က တောင်းဆို ခဲ့သော်လည်း မဆုတ်သည့်အပြင် ထပ်မံတိုးမြင့်နေကြောင်း သိရသည်။