မြစ်ဆုံစီမံကိန်းကြောင့် ပြောင်းရွှေ့ခဲ့ရသည့် တန်ဖဲရွာကို တွေ့ရစဉ်
မြစ်ဆုံစီမံကိန်းကြောင့် ပြောင်းရွှေ့ခံ ဒေသခံများ တစ်နှစ်ထက်တစ်နှစ် စားဝတ်နေရေး၊ လူမှုရေးဘဝများ ခက်ခဲလာပြီး မြစ်ဆုံစီမံကိန်း အပြီးတိုင် ရပ်ဆိုင်းရေးကို ၈၈ ငြိမ်းချမ်းရေးနှင့် ပွင့်လင်းလူ့အဖွဲ့အစည်းတို့နှင့် တွေ့ဆုံစဉ် ပြောကြားခဲ့သည်။
၈၈ ပွင့်လင်းလူ့အဖွဲ့အစည်းမှ ဦးမြအေးခေါင်းဆောင်သော အဖွဲ့ဝင်ခြောက်ဦးသည် ဒေသခံများ၏ စားဝတ် နေရေး၊ ပညာရေး၊ ကျန်းမာရေး စသည့်လက်ရှိအခြေအနေများကို လာရောက်တွေ့ဆုံစဉ် ဆွေးနွေး ခဲ့ကြခြင်း ဖြစ်သည်။ ယင်းတွေ့ဆုံမှုသို့ ပြောင်းရွှေ့ခံကျေးရွာများမှ လူ ၂ဝ ကျော် တက်ရောက်ခဲ့ပြီး ရွှေ့ပြောင်းကျေးရွာများတွင် နေအိမ်၊ လမ်း၊ မီးတို့တွင် အဆင်ပြေသော်လည်း စိုက်ပျိုးမြေ မရှိခြင်း၊ တစ်နိုင် တစ်ပိုင် မွေးမြုရေးလုပ်ငန်းများ မလုပ်ဆောင်နိုင်ခြင်း၊ လျော်ကြေးငွေများ ပြည့်စုံအောင်မရရှိခြင်း၊ ၁ဝ မိုင်ခန့် ကွာဝေးသော ကျေးရွာဟောင်းများမြေတွင် သွားရောက်လုပ်ကိုင် စားသောက်ရခြင်း၊ ပြောင်းရွှေ့ ကျေးရွာ အားလုံးတွင် သင်္ချိုင်းမြေများ မရှိခြင်း၊ ကျေးရွာစားကျက်မြေများ မရှိခြင်း၊ ရပ်ဝေးဒေသများ တွင်သာ စီးပွားရှာဖွေရေး သွားရောက်လုပ်ကိုင်ကြသောကြောင့် လူမနေသောအိမ်များ တစ်နှစ်ထက် တစ်နှစ် များလာခြင်း၊ ဝင်ငွေရှိသော အလုပ်အကိုင် အခွင့်အလမ်းမရှိခြင်း စသည်တို့ကြောင့် မြစ်ဆုံစီမံ ကိန်း ရပ်ဆိုင်းစေလိုကြောင်း ဆွေးနွေးခဲ့ကြသည်။
၈၈ ပွင့်လင်းလူ့အဖွဲ့အစည်းမှ ငြိမ်းချမ်းရေးနှင့် တိုင်းရင်းသားရေးရာမှ ဦးမြအေးက “ ကျွန်တော်တို့ ၈၈ အဖွဲ့ အစည်းအနေနဲ့ ပြတ်သားတဲ့မူဝါဒ ချမှတ်ထားတာ ရှိပါတယ်။ ဘယ်နည်းနဲ့မှ မြစ်ဆုံရေကာတာ စီမံကိန်းကိုဆက်ပြီး လုပ်ခွင့်မပေးနိုင်ဘူး။ အပြီးတိုင်ဖျက်သိမ်းရေးဟာ ကျွန်တော်တို့မူပါ။ ယနေ့အထိ ပြောင်းလဲခြင်း မရှိသေးပါဘူး။ CPI ကုမ္ပဏီက သက်ဆိုင်ရာတွေနဲ့တွေ့ပြီး ကျွန်တော်တို့ရပ်တည်ချက်ကို ပြတ်ပြတ်သားပြောခဲ့ပါပြီ။ တိုင်းရင်းသားတွေရဲ့ အခွင့်အရေးတွေ၊ မြန်မာနိုင်ငံရဲ့ ယဉ်ကျေးမှု ပေါ်ထွန်းရာ ပင်မမြစ်ဖြစ်သလို မြစ်ဆုံဒေသဟာ ကချင်လူမျိုးများ၏ အမွေအနှစ်ဖြစ်တယ်။ ဒါကြောင့် ရေကာတာကြီးဆောက်ပြီး ဘယ်လောက်ဝင်ငွေရရ ကျွန်တော်တို့ လက်မခံနိုင်ဘူးဆိုတာကို ပြောပြပါတယ်” ဟု ပြောကြားသည်။
ပြောင်းရွှေ့ခံ မလိယန်ကျေးရွာမှ ရွာသားများက “ကျွန်တော်တို့ မီး၊ လမ်း၊ နေအိမ် အဆင်ပြေတယ်။ ငွေရတဲ့ အလုပ်တစ်ခုမှ ဒီရွာမှာမရှိဘူး။ ရွှေ့ပြောင်းရွာတိုင်း သင်္ချိုင်း၊ အားကစားကွင်း မရှိဘူး။ စိုက်ပျိုးရေး သွားလုပ်ရတာ ရွာနဲ့ ၁ဝ မိုင်ကျော်မှာရှိတယ်။ ဖော်ပေးတဲ့ လယ်မြေတွေကလည်း စိုက်ပျိုးလို့မကောင်းတဲ့ သူများပိုင်မြေတွေပါ။ ကျွန်တော်တို့ ပြောင်းလာခဲ့တဲ့ နေရာဆိုရင် လုပ်ငန်းဖော်ဆောင်တဲ့ နေရာဖြစ်လို့ ပြန်ပြီး လုပ်စားလို့ မရတော့ပါဘူး။ လျော်ကြေးလည်း ဝါးတစ်ရုံလုံးမှ ကျပ် ၅ဝဝဝ ပဲပေးတယ်။ နှစ်ရှည် ပင်တွေ အများစုအတွက်လည်း လျော်ကြေးမရဘူး။ အခုတော့ စီမံကိန်းဒုက္ခသည်တွေ ဖြစ်နေကြပါပြီ။ ကျွန်တော်တို့ အခုပြောနေတာ ဆန့်ကျင်နေတာ မဟုတ်ပါဘူး။ အသနားခံနေတာပါ” ဟုဆိုသည်။
၈၈ ပွင့်လင်းလူ့အဖွဲ့အစည်းမှ ဦးမြအေးက “ကျွန်တော်တို့ ဒီကိုရောက်လာရ တဲ့ အကြောင်းက မြန်မာ နိုင်ငံမှာ ဖြစ်ပေါ်နေတဲ့ ပြည်တွင်းစစ်တွေကို ရပ်ဆိုင်းအောင် လုပ်ဆောင်တဲ့နေရာမှာ တိုင်းရင်းသားတွေ အားလုံး လွတ်လွတ်လပ်လပ် ပါဝင်နိုင်ပြီး ကိုယ့်ကြမ္မာကိုယ်စီရင်နိုင်တဲ့ ကိုယ်ပိုင်ပြဋ္ဌာန်းခွင့်တွေကို အာမခံချက်ရှိတဲ့ ဖက်ဒရယ်ပြည်ထောင်စုစနစ်ကြီး ပေါ်ပေါက်ရေးကို ဆောင်ရွက်ဖို့ဖြစ်ပါတယ်။ တိုင်းရင်း သားတွေနှင့် အစိုးရတို့ အပစ်အခတ်ရပ်စဲရေး စာချုပ်ချုပ်ဆိုနေတဲ့ ကိစ္စမှာ နှစ်ဖက်စလုံးက တစ်ဖက်ကို တစ်ဖက် စီးပိုးမှုမရှိအောင် မျှမျှတတဖြစ်ပေါ်ပြီး တိုင်းရင်းသား အခွင့်အရေးတွေကို တကယ်ဖော်ဆောင် နိုင်တဲ့၊ နိုင်ငံရေးအရ အနှစ်သာရပြည်ဝတဲ့ ဖြစ်ပေါ်နိုင်ရေးအတွက် ဒေသခံများ၊ သက်ဆိုင်ရာ အဖွဲ့ အစည်းများနှင့် လာရောက်တွေ့ဆုံခြင်း ဖြစ်ပါတယ်” ဟုဆိုသည်။
မြစ်ဆုံစီမံကိန်းကြောင့် ပြောင်းရွှေ့ရမည့် ရွာပေါင်း ၄၇ ရွာ၊ အိမ်ထောင်စု ၁၉ဝ၄ စု၊ လူဦးရေ ၁ဝ၅ဝ၅ ဦးရှိပြီး လက်ရှိတွင် မြစ်ဆုံ (မလိဇွပ်)၊ တန်ဖဲ့၊ ရွေပါး၊ ကဒန်ပါ၊ ဒွန်ဘန်၊ လဖျဲ့ စသည့် ကျေးရွာများမှာ အောင်မြင်သာကျေးရွာနှင့် မလိယန်ကျေးရွာသို့ ရွှေ့ပြောင်းနေကြရသည်။ အောင်မြင်သာ ကျေးရွာတွင် အိမ်ထောင်စု ၃၁၇ စု၊ လူဦးရေ ၂ဝ၇၅ ဦး၊ မလိယန်ကျေးရွာတွင် အိမ်ထောင်စု ၁၂ဝ စု လူဦးရေ ၅ဝဝ ကျော်ရှိပြီး အများစုမှာ ဝမ်းစာရှာဖွေရန် အခက်အခဲတွေ့လျက် ရှိသည်။
CPI ကုမ္ပဏီသည် ဧရာဝတီ မြစ်ညာမြစ်ဝှမ်း ရေအားလျှပ်စစ် တည်ဆောက်ရန် မြစ်ဆုံ၊ ချီဖွေ၊ ဝူဆောက်၊ ဖီဆော၊ ခေါင်လံဖူး၊ ယဲ့နန်။ လာဆာတို့တွင် စီမံကိန်းခုနစ်ခုရှိပြီး စုစုပေါင်းစက်တပ်ဆင် အင်အားမှာ မဂ္ဂါဝပ် ၂ဝဝဝဝ ခန့်ရှိပြီး တစ်နှစ်လျှင် လျှပ်စစ်ဓာတ်အား ထုတ်လုပ်မှုနှုန်း ဘီလျံ ၁ဝဝ ယူနစ်ခန့် ရှိမည်ဟု ယင်းကုမ္ပဏီ၏ မှတ်တမ်းစာအုပ်တွင် ဖော်ပြထားသည်။ ၂ဝ၁ဝ ပြည့်နှစ် မေလ ၂၈ ရက်တွင် နိုင်ငံတော် အစိုးရမှ မေခ-မလိခ နှင့် ဧရာဝတီမြစ်ဆုံ ရေအားလျှပ်စစ်စီမံကိန်းများ အကောင်အထည်ဖော်ခြင်း၊ မောင်းနှင်ဓာတ်အား ထုတ်လုပ်ခြင်း၊ ပြန်လည်လွှဲပြောင်းခြင်းတို့ ဆောင်ရွက်ရန် ရင်းနှီးမြှုပ်နှံခွင့်လိုင်စင် ထုတ်ပေးခဲ့သည်။
မြစ်ဆုံဆည်ရေကာတာ စီမံကိန်းကို နိုင်ငံတော်သမ္မတ ဦးသိန်းစိန်က ၂ဝ၁၁ ခုနှစ် စက်တင်ဘာ ၃ဝ ရက် တွင် ရပ်ဆိုင်းလိုက်ကြောင်း ကြေညာခဲ့သည်မှာ ယခု စက်တင်ဘာ ၃ဝ ရက်တွင် သုံးနှစ်ပြည့်ခဲ့ပြီ ဖြစ် ကြောင်း သိရသည်။
Eleven Media Group
No comments:
Post a Comment