ထိုင်းတောင်ပိုင်း လိပ်ကျွန်းမှာ ဗြိတိန်နိုင်ငံသား ၂ ဦး အသတ်ခံရတဲ့ ကိစ္စနဲ့ ပတ်သက်ပြီး ဖမ်းဆီးခံထားရတဲ့ မြန်မာလူငယ် ၂ ဦး အာမခံနဲ့ ပြန် လွတ် လာနိုင်ဖို့ မြန်မာသံရုံးအထူးအဖွဲ့က ထပ်မံအာမခံလျောက်မယ်လို့ သံရုံးအထူးအဖွဲ့ဝင် ဦးမင်းဦးက ဒီဗွီဘီကို ပြောပါတယ်။
“မနက်ဖြန် သူတိ်ု့ ရမန်ရက်ပြည့်မှာ ဖြစ်တယ်လေ။ အဲဒါကြောင့် ကျနော်တို့အဖွဲ့က တရားရုံးသွားကြမှာပါ။ နောက်ထပ် ရမန်ရက်တိုးမယ်ဆိုလို့ရှိရင် ကျနော်တို့က ကန့်ကွက်မယ်။ ပြီးတော့ အရင်တပတ်က ငြင်းပယ် ခံထားရတဲ့ အာမခံရရေး နောက်ထပ်ပြန်တင်မှာ ဖြစ်ပါတယ်။ သံရုံးအထူးအဖွဲ့ကရော၊ ရှေ့နေများကောင်စီ အဖွဲ့ဝင်တွေရော ပါပါတယ်။ တချို့က သွားနေကြပါပြီ။”
ထိုင်းတောင်ပိုင်း ကော့ဆမွီခရိုင် အကျဉ်းထောင်မှာ အချုပ်ကျနေရတဲ့ ကိုဝင်းဇော်ထွန်းနဲ့ ကိုဇော်လင်းတို့ ၂ ဦး အာမခံရရှိရေး မြန်မာအစိုးရဘက်က နိုဝင်ဘာ ၂၆ ရက်နေ့က ကော့ဆမွီတရားရုံးမှာ သွားရောက် လျောက်ထားပေမယ့် မရတဲ့အတွက် ပဉ္စမအကြိမ် ချုပ်ရက်စေ့မယ့် မနက်ဖြန်မှာ ထပ်လျှောက်မှာ ဖြစ်ပါ တယ်။
စွပ်စွဲခံထားရသူ ၂ ဦး အချုပ်ထဲကနေ လွတ်ပြီး တရားခွင်ကို အပြင်ကနေဘဲ လာရောက်နာကြားနိုင်ဖို့ တဦးကို ထိုင်းဘတ်ငွေ ၅ သိန်းစီ ပေးဆောင်ရမယ်လို့ ရှေ့နေများကောင်စီက အကြံပြုထားပေမယ့် မြန်မာ သံရုံး ဘက်ကတော့ သံရုံးအနေနဲ့ အာမခံပြီး တောင်းဆိုခဲ့ပါတယ်။
ဒီတကြိမ်တော့ ငွေအာမခံရော၊ လူအာမခံပါ ၂ ရပ်လုံး သုံးစွဲသွားမယ်လို့ ရှေ့နေ ဦးအောင်မျိုးသန့်က ဒီဗွီဘီ ကို ပြောထားဖူးပါတယ်။
ထိုင်းအစိုးရရှေ့နေများဘက်ကတော့ အမှုတွဲ ပြီးပြည့်စုံပြီဖြစ်လို့ နိုဝင်ဘာလအတွင်း တရားရုံးတင်နိုင်မယ် လို့ ပြီးခဲ့တဲ့ အပတ်က ရှင်းလင်းပြောဆိုခဲ့ပေမယ့် ဒီနေ့အထိ မတင်နိုင်သေးပါဘူး။
ထိုင်းဥပဒေအရ စွပ်စွဲခံထားရသူတွေကို တကြိမ်လျှင် ၁၂ ရက်နဲ့ ၇ ကြိမ်အထိ တရားရုံးက စွဲချက်မတင် မချင်း ချုပ်နှောင်ထားခွင့်ရှိပြီး ချုပ်ရက် ၈၄ ရက် ပြည့်လို့မှ တရားရုံးမတင်နိုင်ရင် တရားရှင်လွှတ်ရဖို့ ရှိပါတယ်။
ဖမ်းဆီးခံထားရတဲ့ လူငယ် ၂ ဦးဟာ အချုပ်အတွင်းမှာ သမံတလင်းပေါ် အိပ်နေရတဲ့အတွက် သူတို့အတွက် ကုတင်၊ စောင်နဲ့ မွေ့ယာတွေ ၀ယ်ဖို့ ဒီဇင်ဘာလ ၁ ရက် ဒီကနေ့ မနက်ပိုင်းမှာ သွားရောက်ကူညီပံ့ပိုး ပေးခဲ့တယ်လို့ လူ့အခွင့်အရေးနဲ့ ဖွံ့ဖြိုးတိုးတက်ရေး ဖောင်ဒေးရှင်း အတိုင်ပင်ခံ မစ္စတာ အဲန်ဒီဟောလ်က ဒီဗွီဘီကို ပြောပါတယ်။
“သူတို့က အာမခံရမယ်လို့ ထင်ပြီး သမံတလင်းပေါ်ဘဲ အိပ်တာ၊ အနီးနားကလူတွေက အဲလိုအိပ်ရင် ကျန်းမာရေးနဲ့ မညီဘူးလို့ ပြောလို့လေ။ အကျဉ်းထောင်က ဘာမှမပေးဘူး။ တတ်နိုင်တဲ့လူက ကိုယ့်ဖာ ကိုယ် ၀ယ်ရတယ်။ ကလေး ၂ ယောက်လုံး ကျန်းမာရေးတော့ ကောင်းပါတယ်။ ဒါပေမယ့် မိဘတွေကို သတိရတယ်လို့ ပြောပြီး ငိုတယ်ခင်ဗျ ၊ ဒီကနေ့ သူတို့နဲ့ မိနစ် ၃၀ လောက် တွေ့ခွင့်ရခဲ့ပါတယ်။”
သူတို့ ၂ ဦး အာမခံ ရရေး မရရေး နဲ့ ချုပ်ရက် ထပ်တိုးခြင်းရှိမရှိ မနက်ဖန်အဖြေသိရမှာ ဖြစ်တဲ့အတွက် ထိုင်းရှေ့နေများကောင်စီက သွားဖို့ ပြင်နေတယ်လို့ အဲန်ဒီဟောလ်က ဆက်ပြောပါတယ်။
ဗြိတိန်နိုင်ငံသား လူငယ် ၂ ဦးဖြစ်တဲ့ ဒေးဗစ် နဲ့ ဟန်နာ တို့ ၂ ဦးဟာ အောက်တိုဘာလတွင်းက ထိုင်း တောင်ပိုင်း ကော်ဖငန်းခရိုင် လိပ်ကျွန်းမှာ လာရောက်လည်ပတ်ရင်း အသတ်ခံခဲ့ရတာ ဖြစ်ပါတယ်။ ဒီအမှု နဲ့ ပတ်သက်ပြီး မြန်မာလူငယ် အလုပ်သမား ၂ ဦးဖြစ်တဲ့ ကိုဇော်လင်းနဲ့ ကိုဝင်းဇော်ထွန်းတို့ ၂ ဦးကို ထိုင်းရဲ တပ်ဖွဲ့က တရားခံအဖြစ် စွပ်စွဲဖမ်းဆီးထားပေမယ့် ပြင်တွင်းပြည်ပ လူမှုကွန်ရက်အများစုက ယုံကြည်မှု မရှိဘဲ ကျွန်းသူကြီးရဲ့ သားဖြစ်သူကိုသာ အဓိက တရားခံအဖြစ် ထင်ကြေးပေးနေကြပါတယ်။
ကျွန်းသူကြီးရဲ့ သားဖြစ်သူကတော့ ဒီလ ၂၃ ရက်နေ့မှာ ဒုလဘ ရဟန်းခံဖို့ ဖိတ်စာတွေ ကြိုတင်ဝေငှ ထားပြီး ဖြစ်ပါတယ်။
DVB
No comments:
Post a Comment