နိုင်ငံ့ ဝန်ထမ်းများ၏ စွမ်းအားမှန်ဖြင့် တိုင်းကျိုးပြည်ပြု လုပ်ငန်းများ ဆောင်ရွက် နိုင်ကြပါစေ

နိုင်ငံတစ်ခု ပြည့်စုံရမည့် အင်္ဂါရပ်များမှာ နိုင်ငံပိုင်နက် နယ်မြေ၊ သင့်တင့်သည့် လူဦးရေ၊ အုပ်ချုပ်သည့် အစိုးရ၊ အချုပ်အခြာ အာဏာတို့ ဖြစ်သည်ဟု ဆိုကြပါသည်။

အမိမြန်မာနိုင်ငံ အနေအထားအရ သုံးသပ်မည် ဆိုပါက နယ်မြေ အကျယ်အဝန်းအရ သင့်တင့်သည့် လူဦးရေရှိပြီး ပထဝီနိုင်ငံရေး (Geopolitic) အနေအထားအရ နိုင်ငံဖွံ့ဖြိုး တိုးတက်ဖို့ အခြေအနေကောင်းများ ပိုင်ဆိုင်လျက် ရှိပါသည်။ အနောက်ဘက်နှင့် အရှေ့ မြောက်ဘက်ရှိ ကမ္ဘာ့လူဦးရေ သန်းပေါင်းထောင်ကျော် ရှိနေမှုနှင့် ၄င်း၏ စက်မှုစီးပွားဖွံ့ဖြိုး တိုးတက်မှုတို့အရ စီးပွားရေးနယ်ပယ် ချဲ့ထွင်လာကြသည်ကို ကြည့်ပါက နိုင်ငံအတွက် အခွင့် အလမ်းကောင်းများစွာ ဖြစ်ထွန်းလာနေပြီး ဖြစ်ပါသည်။ အိန္ဒိယနိုင်ငံ၏ အရှေ့မျှော် မူဝါဒအရ အရှေ့ဘက်ကို စီးပွားရေး ခရီးထွက်သည့်အခါ အမိနိုင်ငံကနေ ဖြတ်သန်းရမှာ ဖြစ်ပါသည်။ တရုတ်နိုင်ငံက အာဖရိက၊ အရှေ့ပင်လယ်ကွေ့၊ ဥရောပ ဒေသတို့နှင့် ဆက်သွယ် ဆောင်ရွက်လျက်ရှိသည့် စီးပွားရေး ခရီးလမ်းအတွက် အမိနိုင်ငံ၏ တည်ရှိမှု အနေအထား သည် အလားတူ အခွင့်အလမ်းများလည်း ရှိနေပါသည်။ နိုင်ငံရေး အရရော၊ စီးပွားရေး အရပါ အစိုးရသစ် ကာလတွင် တံခါးဖွင့်မှု၊ ပွင့်လင်းလာမှုတို့နှင့်အတူ ပြုပြင်ပြောင်းလဲရေး ခရီးစဉ်ကြောင့် အမိနိုင်ငံကို နိုင်ငံတကာကပါ အာရုံစူးစိုက် လာခဲ့ကြပြီး အပြန်အလှန် ဆက်ဆံမှု၊ ထိတွေ့မှု၊ ညှိနှိုင်းမှု၊ ပူးပေါင်း ဆောင်ရွက်မှုများစွာ တိုးတက် ဖြစ်ထွန်းလာနေပြီ ဖြစ်ပါသည်။ ယင်းသို့သော အခွင့်အလမ်း ကောင်းများကို အမိအရဖမ်းယူ အသုံးချနိုင်မှသာ၊ အကောင်အထည် ဖော်နိုင်မှသာ နိုင်ငံနှင့် လူမျိုးတို့ ကြီးပွားတိုးတက်မှုများ ရရှိလာနိုင်မည် ဖြစ်ပါသည်။ ယင်းသို့သော တွက်ချက်မှုဖြင့် ဆောင်းပါးရှင် တစ်ဦးက ဂျာနယ်တစ်ခုမှာ ''ပြိုင်တူတွန်းလျှင် ရွေ့သည်ဟု ဆိုပါလျှင်'' ဆောင်းပါးတစ်ခု ရေးသား ဖော်ပြခဲ့ပါသည်။ ဆောင်းပါး အနှစ်ချုပ်ကတော့ နိုင်ငံနှင့် လူမျိုးကြီးပွား တိုးတက်ဖို့အတွက် အစိုးရနှင့် ပြည်သူ စိတ်သဘောထား တူညီလက်တွဲညီညီ ဦးရွက်ပြုသူကပြု၊ ပဲ့က ထမ်းသူကထမ်း တက်ညီလက်ညီ ကြိုးပမ်းစေချင်သည့် သဘောတရားတစ်ခု ဖော်ပြခြင်း ဖြစ်ပါမည်။ အစိုးရနှင့် လွှတ်တော် အသီးသီး၊ ပါတီအသီးသီး၊ ပြည်သူ အသီးသီးက သူ့တာဝန်၊ ကိုယ့်တာဝန် မခွဲခြားဘဲ ပြိုင်တူတွန်းအားပေး ကြိုးပမ်း ဆောင်ရွက်လိုခြင်း ဖြစ်ပါမည်။ နိုင်ငံ၏ ကုန်းကြောင်း၊ ကုန်းတွင်းပိုင်း ရေကြောင်းလမ်း၊ ပင်လယ်ကမ်းရိုးတန်း ရှည်လျားမှု၊ ပင်လယ် ဆိပ်ကမ်းများ၊ ပင်လယ်ရေ လမ်းကြောင်း၊ ကုန်းတွင်းပိုင်းနှင့် ပင်လယ်ပြင် သဘာဝ အရင်းအမြစ် မြောက်မြားစွာ တည်ရှိနေမှုတို့ကို အကျိုးရှိရှိ အသုံးချပြီး နိုင်ငံ၏ ဓနဥစ္စာ ကြွယ်ဝအောင် လုပ်ကြရပါမည်။ သဘာဝ အရင်းအမြစ် မရှိသလောက် ရှားပါးသည့် စင်ကာပူနိုင်ငံ အနေနှင့် ပင်လယ်ရေ လမ်းကြောင်း အချက်အချာကျမှုကို အကျိုးရှိစွာ အသုံးချနိုင်သည့် အတွက် ကြွယ်ဝချမ်းသာ နေမှုနှင့် အာရှနှင့် အရှေ့တောင်အာရှ ဒေသအတွက် နိုင်ငံတကာ လေဆိပ် ဝင်ပေါက်ရှိခဲ့သည့် ထိုင်းနိုင်ငံ အနေနှင့် ပြင်ပခရီးသည်ဦးရေ နှစ်စဉ်သန်းပေါင်း ဆယ်ဂဏန်း ကျော် ဝင်ထွက်သည့်အတွက် ဒေါ်လာသန်းပေါင်းများစွာ ရရှိခံစားနေလျက် ရှိပါသည်။ အမိနိုင်ငံ အနေနှင့် ပင်လယ်ရေ လမ်းကြောင်း၊ ကုန်းတွင်းပိုင်း လမ်းကြောင်းများအရ မျက်နှာစာ နှစ်ခုမှာ အားသာချက်များ ရှိနေသည့်အတွက် ယင်းသို့သော အခွင့်အလမ်းများကို အမိအရ ဆုပ်ကိုင်ပြီး တန်ဖိုးရှိရှိ အသုံးချနိုင်မည် ဆိုပါက နိုင်ငံနှင့် လူမျိုးတို့အတွက် ကြီးပွားမှု အခွင့်အလမ်းများစွာ ဖြစ်ထွန်း ပေါ်ပေါက်နေပြီး ဖြစ်ပါသည်။ ပြည်တွင်းပြည်ပမှ ရရှိနိုင်သည့် ခေတ်မီစက်မှု နည်းပညာ၊ အရင်းအနှီးတို့ကို ပြည်သူတို့၏ ခွန်အားစွမ်းအားတို့နှင့် ပေါင်းစပ်ပြီး အကောင်အထည်ဖော်ဖို့သာ လိုအပ်နေပြီ ဖြစ်ပါသည်။

နိုင်ငံတော်ကို ဥပဒေပြုအာဏာ၊ အုပ်ချုပ်ရေး အာဏာ၊ တရားစီရင်ရေး အာဏာစသည့် နယ်ပယ်သုံးရပ်ကို လွှတ်တော်၊ အစိုးရနှင့် တရားစီရင်မှု နယ်ပယ်တို့မှာ ရှိသည့် ပြည်သူ့ ကိုယ်စားလှယ်၊ ပြည်သူ့ဝန်ထမ်း (နိုင်ငံ့ဝန်ထမ်း) တို့က မှန်ကန်စွာကျင့်သုံး အကောင်အထည် ဖော်ရမည် ဖြစ်ပါသည်။ နိုင်ငံ၏ နိုင်ငံရေး၊ အုပ်ချုပ်ရေး၊ တရားစီရင်ရေး ယန္တရားတို့ မှန်မှန် ကန်ကန် လည်ပတ်ဖို့ နိုင်ငံ့ဝန်ထမ်းများသည် အရေးပါသည့် နေရာမှ ဦးစီးဦးဆောင် ကြရမည့် သူများ ဖြစ်ကြပါသည်။

နိုင်ငံ့ဝန်ထမ်းများသည် ပြည်သူတို့၏ အခွန်အခကနေ ရလာသည့် ဝန်ထမ်းလစာ၊ ဝန်ထမ်း အိမ်ရာအပါအဝင် ပြည်သူ့ ဝန်ထမ်းများအတွက် လိုအပ်သည်များ ရရှိခံစားနေကြရသူများ ဖြစ်ကြပါသည်။ ပြည်သူတို့၏ အထောက်အပံ့များဖြင့် ပြည်သူ့ဝန်၊ ပြည်သူ့အရေး ကိစ္စတို့ကို အကျိုးပြုဖော်ဆောင် ကြရသူများ ဖြစ်ကြရန် လိုအပ်ပါသည်ဟု ဆိုချင်ပါသည်။ အစိုးရက ပြဋ္ဌာန်းသည့် ဥပဒေ၊ နည်းဥပဒေ၊ စည်းမျဉ်းစည်းကမ်း၊ လုပ်ထုံးလုပ်နည်းတို့ကို နည်းမှန် လမ်းမှန် လိုက်နာကျင့်သုံး ကြရမည် ဖြစ်ပါသည်။ ဒီမိုကရေစီ ဂျာနယ်ထဲတွင် ဆောင်းပါးရှင် တစ်ဦးရေးသားခဲ့သည့် ''အစာကိုပဲ မြင်သူ''ဆောင်းပါးထဲ၌ နိုင်ငံ့ဝန်ထမ်း အချို့၏ ဖောက်လှဲ ဖောက်ပြန်မှုများကို မချိတင်ကဲဖြစ်ကာ ဝန်ထမ်းဖြစ်ပြီး ကိုယ်ကျိုးရှာချင်လျှင် ကုန်သည်ပွဲစား လုပ်လျှင်လုပ်၊ ဓားပြတိုက်လျှင် တိုက်ဟု ဖော်ပြရေးသား ခဲ့ပါသည်။

ယခင်လမ်းစဉ်ပါတီ ခေတ်ကာလက ပါတီဥက္ကဋ္ဌ သမ္မတ ဦးနေဝင်းက နိုင်ငံ့ဝန်ထမ်းများကို လူကောင်း၊ လူတော်ဖြစ်ဖို့အရေး ဆိုခဲ့ဖူးပါသည်။ အမိနိုင်ငံတွင် ၁၉၈၃ ခုနှစ်ကျော်ကပင် ဝန်ထမ်းများနှင့် ပတ်သက်ပြီး ဘီဘီစီကပင် ''မလုပ်၊ မရှုပ်၊ မပြုတ်'' "No work, No miss, No Admiss" ဟု ဆိုသည့် အသုံးအနှုန်းဖြင့် ဝန်ထမ်းများ၏ လုပ်ဆောင် နေမှုများအား သရော် ခဲ့သည်ကို အမှတ်ရခဲ့ပါသည်။ အချိန်ကာလအရ နှစ်ပေါင်း ၃ဝ ကျော်လာပြီး ဖြစ်သည့်အတွက် ဝန်ထမ်းများ၏ အကျင့်ပျက်မှု၊ စည်းကမ်းပျက်မှုများ ကဲ့သို့သော အကျင့်ဆိုးများ အမြစ်တွယ် နေမှာကိုဖြင့် စိုးရွံ့မိပါသည်။ အဆိုပါ အချိန်ကာလက ကျောက်ဆည်မြို့ ပြည်သူ့ကောင်စီ ဝင်တစ်ဦး ဝေဖန်ထောက်ပြဖူးသည့် ''ရုပ်ဝတ္ထု တစ်ခု ဖြစ်ထွန်းဖို့ နှစ်ကာလ သတ်မှတ်ပြီး လုပ်ဆောင်နိုင်ပေမယ့် လူတွေရဲ့ အကျင့်ပျက်မှု၊ စိတ်ဓာတ် ပျက်ပြားမှုနဲ့ ဆိုင်တဲ့ အကျင့် စာရိတ္တ ပျက်စီးယိုယွင်းမှုကို နှစ်ကာလ သတ်မှတ်ပြီး မည်သူက အာမခံ၍ ကောင်း လာအောင် ဆောင်ရွက်နိုင်မှာလဲ''ဆိုသည့် မေးခွန်းတစ်ခုကို ပြန်လည်ကြားယောင် မိပါသည်။ နှစ်ကာလ ကြာမြင့်မှုအရ ဝန်ထမ်းအိုတစ်ဦး အရွယ်ဘဝ ရောက်လာပြီးဖြစ်သည့် ယနေ့ကာလတွင် မိုးခါးရေ သောက်သုံးသည့်သူ များပြားလာပြီး သောက်စရာ မိုးခါးရေကော ရှိပါ့ဦးမလား ဆိုသည့်အရေး တွေးကြောက်မိပါသည်။

နိုင်ငံ့ဝန်ထမ်း ဆိုသည်မှာ ပြည်သူ့ဝန်ကို ထမ်းရွက်ကြရမည့်သူများ ဖြစ်ကြသကဲ့သို့ အစိုးရ (အာဏာသုံးရပ် ကျင့်သုံး အကောင်အထည်ဖော်သူ)၏ တိုင်းပြည်နှင့်လူမျိုး ကောင်းစားရေး ရွက်ဆောင်ကြိုး ပမ်းနေသည့် အချိန်တွင် တစ်နိုင်ငံလုံးရှိ ပြည်သူ တစ်ရပ်လုံး လိုက်ပါ ဆောင်ရွက်ကြဖို့ အတွက် အစိုးရနှင့် ပြည်သူအကြား စည်းရုံးရေးမှူးများ အဖြစ် ထမ်းရွက်ကြ ရသူများ ဖြစ်ကြပါသည်ဟု ဆိုပါရစေ။ သို့အတွက် နိုင်ငံ့ဝန်ထမ်းများ အနေဖြင့် စောင့်ထိန်း အပ်သော ဝန်ထမ်းကျင့်ဝတ်၊ ဝန်ထမ်းစည်းမျဉ်း စည်းကမ်းနှင့် ဌာနဆိုင်ရာ လုပ်ထုံးလုပ်နည်း များကို နည်းမှန်လမ်းမှန် ကျင့်သုံးကြရမည် ဖြစ်သကဲ့သို့ ဝန်ထမ်းတစ်ဦးချင်း ကိုယ်ကျင့် သိက္ခာ၊ အကျင့်သီလတို့နှင့် ပြည့်စုံကြရပေမည်။ ဤသို့ဖြင့် ဝန်ထမ်းကောင်းများ အဖြစ် ရပ်တည်ခွင့် ရှိလာမည်ဖြစ်ပြီး ပြည်သူ့အကျိုး၊ နိုင်ငံအကျိုး၊ ဌာနအကျိုးသုံးပါး တို့ကို အမှန်တကယ် ထမ်းရွက်ကြသူများ အဖြစ် ရောက်ရှိလာမည် ဖြစ်ပါသည်။ ထိုမှသည် နိုင်ငံ အဝန်းရှိ ဝန်ထမ်းထု တစ်ရပ်လုံးသည် ပြည်သူများထဲမှ ပေါက်ဖွားလာသူများ ဖြစ်ကြသည်နှင့် အညီ ပြည်သူကို ကျေးဇူးပြုသော ပြည်သူ့ဝန်တာ အရပ်ရပ်ကို ကျေပွန်စွာ ထမ်းဆောင် ကြသူများ ဖြစ်ကြသူများ အဖြစ် ပြည်သူ တစ်ရပ်လုံးမှ အားကိုး ယုံကြည်ရသော ဝန်ထမ်းများ ဖြစ်လာကြမည် ဖြစ်သည်။ ငယ်ရွယ်စဉ် မူလတန်း ကျောင်းသားဘဝက သင်ကြားခဲ့ရသော မိမိကိုယ်ကို ကောင်းအောင် ကြိုးစားမည်၊ မိမိအတန်းနှင့်ကျောင်းကို ကောင်းအောင်ကြိုး စားမည်၊ မိမိတိုင်းပြည်အတွက် ကောင်းအောင် ကြိုးစားမည် ဆိုသကဲ့သို့ ဝန်ထမ်းကိုယ်စီ တို့သည် ဝန်ထမ်းကောင်းမှ ဌာနကောင်းမည်၊ ဌာနကောင်းမှ တိုင်းပြည်ကောင်းမည် ဆိုသော သဘောတရားကို လက်ကိုင်ကျင့်သုံး အပ်လှပေသည်။ ဝန်ထမ်းအချင်းချင်း သံယောဇဉ် တရား၊ မေတ္တာတရား၊ သစ္စာတရားတို့ဖြင့် ထုံမွမ်း အပ်လှပေသည်။ ဝန်ထမ်းအချင်းချင်း ဆက်ဆံရေး ကောင်းမွန်မှု၊ တာဝန်ဝတ္တရား ကျေပွန်စွာ ထမ်းဆောင်မှု၊ စိတ်ဝမ်းတူညီ ရှိကြမှု တို့ဖြင့် ဝန်ထမ်းအချင်းချင်း စည်းလုံးညီညွတ်မှု ရှိကြရပေမည်။ တပ်မတော်တွင် ကျင့်ထုံး တစ်ရပ်ဖြစ်သည့် တပ်နေပျော်၍ စစ်တိုက်တော်ရမည် ဆိုသကဲ့သို့ ဝန်ထမ်းများသည် ဌာနပျော်၍ အလုပ်တော်ရမည် ဟူသော လက်ကိုင်တရား စွဲကိုင်ပြု အပ်လှပေသည်။

ဌာနတိုင်းရှိ ဝန်ထမ်း အသီးသီး၏ အခြေခံရပိုင်ခွင့်များ ဖြစ်သည့် ဝန်ထမ်းခန့်ထားရေး၊ ရာထူး တိုးမြှင့်ရေး၊ ပြောင်းရွှေ့ရေးနှင့် လစာစရိတ်ခံစား ရရှိမှုများ၊ နေထိုင် သွားလာမှုများ အဆင်ပြေစွာ ရရှိခံစားရေးနှင့် လုပ်ငန်းခွင် လုပ်ကိုင်မှု လွယ်ကူချောမွေ့ စေခြင်းတို့ဖြင့် ဝန်ထမ်း များသည် ဌာနတွင်း ပျော်ရွှင်ချမ်းမြေ့ကာ အလုပ်များကြိုးပမ်း လုပ်ကိုင် လိုစိတ်များ ပွားများလာစေမည် ဖြစ်ပါသည်။ ဝန်ထမ်းများ အနေဖြင့် နိုင်ငံတော်မှ ပြဋ္ဌာန်းထားသော ဥပဒေ စည်းမျဉ်းစည်းကမ်း၊ နည်းဥပဒေများကို လိုက်နာကျင့်သုံး နေရမည် ဖြစ်သလို ဌာနစည်းမျဉ်း စည်းကမ်း လုပ်ထုံးလုပ်နည်းများကိုပါ တစ်ပြိုင်နက် လိုက်နာကျင့်သုံး နေရမည် ဖြစ်ပေသည်။ နိုင်ငံတစ်ဝန်း ဌာနအသီးသီးရှိ ဝန်ထမ်း တိုင်းသည် နိုင်ငံတော်မှ ချမှတ်ပေးသော ရည်မှန်းချက် လုပ်ငန်း တာဝန်များကို ကျေပွန်စွာ ထမ်းဆောင်ခြင်းဖြင့် ပြည်သူတစ်ရပ်လုံး၏ ရှေ့မှောက်တွင် နိုင်ငံ၏ အစိုးရကိုယ်စား တိုင်းပြည်နှင့် လူမျိုးကောင်းစား ရေး အတွက် ပြည်သူ တစ်ရပ်လုံး အတွက် ဦးစီးဦးဆောင်များ၊ စည်းရုံးရေးမှူးများ အဖြစ် ပြည်သူ့ကိုယ်စားပြု နိုင်ငံ့ဝန်ထမ်း အဖြစ် ဝင့်ထည်စွာ ရပ်တည်ဆောင်ရွက် နိုင်ကြမည် ဖြစ်ပေသည်။ နိုင်ငံ့ဝန်ထမ်း တိုင်းသည် ဆရာကောင်း သမားကောင်းများ၏ ကျင့်ထုံးဖြစ်သည့် စေတနာ၊ ဝါသနာ၊ အနစ်နာဟု ဆိုအပ်သော နာ(၃)နာဖြင့် ပြည်သူ့ အကျိုး၊ နိုင်ငံ့အကျိုး ရွက်ဆောင်ကြိုးပမ်း ကြသူများ ဖြစ်ကြပါစေဟု ဆန္ဒပြု ပါရစေ။ ။

နိုင်ငံ့ဝန်ထမ်း တစ်ဦး

မြ၀တီ