ဂိုလန်ကုန်းမြင့်အားစောင့်ကြည့်နေသည့် ကုလသမဂ္ဂ ငြိမ်းချမ်းရေး ထိန်းသိမ်းမှု တပ်ဖွဲ့ဝင်နှစ်ဦးကို တွေ့ရစဉ်
ဆီးရီးယားနှင့် နယ်စပ်ဒေသကို ဖြတ်ကျော်ကာ အစ္စရေး ထိန်းချုပ်ထားသည့် ဂိုလန်ကုန်းပြင်မြင့် ဧရိယာဘက်သို့ ကျူးကျော်လာသည့် မောင်းသူမဲ့ လေယာဉ်တစ်စီးကို အစ္စရေး စစ်တပ်က ပစ်ချခဲ့ကြောင်း သိရှိရသည်။
ဩဂုတ်(၃၁)ရက်တွင် ဆီးရီးယားဘက်မှ လွှတ်တင်လိုက်သည်ဟု ယူဆရသည့် အဆိုပါ လေယာဉ်သည် ကုလသမဂ္ဂ ငြိမ်းချမ်းရေး ထိန်းသိမ်းမှု တပ်ဖွဲ့များ စောင့်ကြပ်နေသော ဒေသကို ကျော်ဖြတ်ပြီး အစ္စရေး ထိန်းချုပ် ထားသည့် ဂိုလန်ကုန်းမြင့်ဘက် ပျံသန်းလာခဲ့ခြင်း ဖြစ်သည်။ အစ္စရေး လေကြောင်းကာကွယ်ရေး တပ်ဖွဲ့က အချက်အခြာကျသည့် နယ်ခြားဒေသတွင် ဝေဟင်ပိုင်နက် ကျူးကျော်လာသော အဆိုပါ လေယာဉ်ကို အောင်မြင်စွာ ကြားဖြတ် ပစ်ချခဲ့ကြောင်း ကြေညာသည်။
“မောင်းသူမဲ့ လေယာဉ်တစ်စီးဟာ ဆီးရီးယားနဲ့ နယ်ခြားဒေသမှာ အစ္စရေး ဝေဟင်ပိုင်နက်ဘက် ကျူးကျော် လာပါတယ်။ ဒါကို အောင်အောင်မြင်မြင် ကြားဖြတ် ဟန့်တားနိုင်ခဲ့တယ်။ ကျွန်တော်တို့ အကြိမ်ကြိမ် ပြောပြီးပါပြီ။ အစ္စရေးဟာ အချုပ်အခြာအာဏာနဲ့ ပိုင်နက်ကို ထိပါးလာတဲ့ ဘယ်လိုကျူးကျော်မှုကိုမဆို လက်တုံ့ပြန်သွားမှာပါ”ဟု လေတပ်မှ ပြောရေးဆိုခွင့်ရ ပုဂ္ဂိုလ်တစ်ဦးက ဆိုသည်။
ဆီးရီးယားတွင် သမ္မတ ဘာရှာအာဆက်ဒ်၏ တပ်ဖွဲ့များနှင့် သူပုန်တပ်များကြား ပြင်းထန်သော တိုက်ပွဲများ ဖြစ်ပွားနေပြီး အဆိုပါ ပဋိပက္ခသည် အစ္စရေး ထိန်းချုပ်ထားသည့် ဂိုလန်ကုန်းမြင့် ဒေသအနီးထိ ကူးစက် လာသည်။ မကြာသေးမီက ယင်းဒေသတွင် လုံခြုံရေးယူ စောင့်ကြပ်နေသည့် ကုလသမဂ္ဂ ငြိမ်းချမ်းရေး ထိန်း သိမ်းမှု တပ်ဖွဲ့ဝင်များကို ဆီးရီးယား သူပုန်တပ်များက ဖမ်းဆီးထိန်းသိမ်းခဲ့သည်။ ဖိလစ်ပိုင်မှ ငြိမ်းချမ်းရေး ထိန်းသိမ်းမှု တပ်ဖွဲ့ဝင်များ တပ်စွဲထားသည့် နေရာကို သူပုန်တပ်များက ထရပ်ကားများဖြင့် ဝင်တိုက်ကာ ချိုးဖျက်ကျူးကျော်ရန် ကြိုးစားခဲ့သော်လည်း စစ်သည်များက တောင့်ခံနိုင်ခဲ့ကြောင်း ဖိလစ်ပိုင်စစ်တပ်က ကြေညာချက် ထုတ်ပြန်ခဲ့သည်။
အစ္စရေးသည် ဆီးရီးယားပိုင် ဂိုလန်ကုန်းမြင့်ဒေသ ဧရိယာများနှင့် နယ်နိမိတ် ထိစပ်နေသည့် ကူနက်ထရာ နယ်ခြားဖြတ်ကျော် စခန်းကို အထူးဂရုပြု စောင့်ကြည့်လျက် ရှိသည်။ ပြီးခဲ့သည့် သီတင်းပတ်က ဆီးရီးယား ဘက်မှ ပစ်လွှတ်လိုက်သည့် ဒုံးကျည်အချို့ အစ္စရေးပိုင်နက်ဘက် ကျရောက် ပေါက်ကွဲခဲ့ပြီး အသေအပျောက် အထိအခိုက် မရှိခဲ့ကြောင်းလည်း သိရှိရသည်။
အစ္စရေးသည် ဂိုလန်ကုန်းမြင့် ဒေသ၏ (၁၂၀၀) စတုရန်း ကီလိုမီတာမျှ ကျယ်ဝန်းသော အစိတ်အပိုင်းကို (၁၉၆၇) ခုနှစ်က ဖြစ်ပွားသည့် (၆)ရက်စစ်ပွဲတွင် သိမ်းယူခဲ့ပြီး (၁၉၈၁)ခုနှစ်တွင် နိုင်ငံတကာ ဖိအားပေးမှု များကို ဆန့်ကျင်ကာ ၎င်းတို့၏ ပိုင်နက်အဖြစ် သိမ်းသွင်းခဲ့သည်။
Ref: Channelnewsasia
7Day DAILY
No comments:
Post a Comment