မြို့နယ်ပညာရေးမှူး(ငြိမ်း) ဒေါ်မြ၀င်းကို မကွယ်လွန်မီက တွေ့ရစဉ်
မြန်မာနိုင်ငံ၏ ပထမဆုံးသမ္မတ စ၀်ရွှေသိုက်၏ စတုတ်္တမြောက်ဇနီး၊ မြို့နယ်ပညာရေးမှူး(ငြိမ်း)ဒေါ်မြ၀င်း သည် အသက် (၉၆)နှစ်အရွယ်တွင် သြဂုတ် ၁၀ ရက် မွန်းလွဲနာရီခွဲခန့်က တောင်ကြီးမြို့၊ ရေအေး ကွင်းရပ်ကွက်ရှိ ၎င်း၏ နေအိမ်တွင် လူကြီးရောဂါဖြင့် ကွယ်လွန်သွားသည်ဟု သမီးဖြစ်သူ ဒေါ်စ၀်ဟေမာ သိုက် က မဇ္ဈိမကို အတည်ပြုသည်။
ဒေါ်မြ၀င်းသည် ဇနီးငါးယောက်ရှိသည့် သမ္မတစပ်ရွှေသိုက်၏ သက်ရှိထင်ရှား နောက်ဆုံးကျန်ရစ်သည့် ဇနီးသည် (စတုတ္ထမြောက်ဇနီး)အဖြစ် မှတ်တမ်းဝင်သူဖြစ်သည်။
ဒေါ်မြ၀င်း၏ ဈာပနအတွက် ရှမ်းပြည်နယ်အစိုးရ၊ သတ္တုနှင့် သစ်တောရေးရာဝန်ကြီး ဦးစိုင်းအိုက်ပေါင်းက ၎င်း၏ ရှမ်းတိုင်းရင်းသားများ ဒီမိုကရက်တစ်ပါတီမှတစ်ဆင့် အလှူငွေထည့်သွင်းရန် အကြောင်းကြားထား သည်ဟု ဒေါ်စ၀်ဟေမာသိုက်က ပြောသည်။
ဒေါ်မြ၀င်း၏ ဈာပနသို့ ပညာရေးဌာနအသိုင်းအ၀န်းမှ ပုဂ်္ဂိုလ်များ၊ အရပ်ဖက်လူ့အဖွဲ့အစည်းများ၊ နိုင်ငံရေး အ သိုင်းအ၀န်းမှ ပုဂ်္ဂိုလ်များ လာရောက်လျက်ရှိပြီး သြဂုတ် ၁၂ရက်၊ နေ့လယ် မွန်းလွဲ ၁ နာရီအချိန်တွင် ၎င်းနေအိမ်မှတစ်ဆင့် တောင်ကြီးမြို့၊ တိုင်းရင်းသားပေါင်းစုံသုသာန်သို့ ပို့ဆောင် မီးသင်္ဂြိုဟ်ရန် စီစဉ် ထားသည်။
သမ္မတစ၀်ရွှေသိုက်သည် ၁၈၉၆ တွင် မွေးဖွားပြီး ၁၉၆၂ခုနှစ်၊ အသက် ၆၆နှစ်အရွယ်တွင် ကွယ်လွန်ခဲ့ သည်။ သူသည် မြန်မာ့လွတ်လပ်ရေးနေ့ ၁၉၄၈ ခုနှစ်၊ ဇန်န၀ါရီ ၄ရက်မှ ၁၉၅၂ ခုနှစ်၊ မတ် ၁၆ရက်အထိ သမ္မတတာဝန် စတင် ထမ်းဆောင်ခဲ့သူဖြစ်သည်။
ညောင်ရွှေစော်ဘွားတစ်ဦးဖြစ်သူ စ၀်ရွှေသိုက်သည် လွတ်လပ်ရေးခေတ် ဗမာ့တပ်မတော်တွင် စစ်မှုထမ်းဆောင်ခဲ့သူဖြစ်ပြီး ၁၉၄၇ ခုနှစ် နိုင်ငံတော်ဖွဲ့စည်းပုံအခြေခံဥပဒေမူကြမ်းရေး ဆွဲခြင်း ကော်မတီ အဖွဲ့ဝင်နှင့် ဥပဒေပြုအဖွဲ့ ဥက္ကဋ္ဌ၊ ၁၉၅၂ခုနှစ် လူမျိုးစုလွှတ်တော်နာယကစသည့် တာဝန်များကို ထမ်းဆောင်ခဲ့သည်။
စ၀်ရွှေသိုက်သည် ၁၉၅၉ ခုနှစ်၊ ဧပြီ ၂၉ရက်တွင် ညောင်ရွှေစော်ဘွားအာဏာကို စွန့်လွှတ်ခဲ့သည်။ ၁၉၆၂ခုနှစ်၊ ဗိုလ်ချုပ်ကြီး နေ၀င်းဦးဆောင်သည့် တော်လှန်ရေးကောင်စီက အာဏာသိမ်းပြီးနောက် ၁၉၆၂၊ နိုဝင်ဘာ၂၁ ရက်တွင် ထိန်းသိမ်းခံခဲ့ရပြီး အကျဉ်းသားဘ၀ဖြင့်ပင် ကွယ်လွန်ခဲ့ရသည်။
သမ္မတစ၀်ရွှေသိုက်နှင့် ဇနီးဖြစ်သူ ဒေါ်မြ၀င်းတို့တွင် သမီးဖြစ်သူ ဒေါ်စ၀်ဟေမာသိုက် (ရှမ်းပြည်နယ် အမျိုးသမီးများ ဖွံ့ဖြိုးတိုးတက်ရေးဥက္ကဋ္ဌ)၊ ဒေါ်စ၀်သန်းကြည်တို့နှင့်အတူ မြေး သုံးယောက်၊ မြစ် သုံးယောက် တို့ ကျန် ရစ်ခဲ့သည်။
Mizzima - News in Burmese
No comments:
Post a Comment