ပြည်ထောင်စုရွေးကောက်ပွဲကော်မရှင်က ထုတ်ပြန်ထားသည့် ယခုနှစ် ဒီဇင်ဘာလအတွင်း ကျင်းပမည့် ကြားဖြတ်ရွေးကောက်ပွဲမှာ ပြည်သူ့ဘဏ္ဍာငွေကို ဖြုန်းတီးခြင်းဖြစ်ကြောင်းနှင့် ဇူလိုင်လ ၂၀ ရက်နေ့ထိ ကောက်ခံရရှိသည့် ပုဒ်မ ၄၃၆ လူထုဆန္ဒလက်မှတ် အရေအတွက်မှာ အလွန်နည်းပါးမှုကို အားမရကြောင်း အမျိုးသားဒီမိုကရေစီအဖွဲ့ချုပ် NLD ပါတီ ဗဟိုအလုပ်အမှုဆောင် အစည်းအဝေးတွင် ဥက္ကဋ္ဌ ဒေါ်အောင်ဆန်းစုကြည်မှ ပြောကြားလိုက်သည်။
သြဂုတ်လ ၄ ရက်နေ့က ဗဟန်းမြို့နယ် NLD ရုံးချုပ်တွင်ကျင်းပသော အစည်းအဝေးတွင် ဗဟို အလုပ် အမှုဆောင်ကော်မတီဝင် ဦးဥာဏ်ဝင်းမှ ၂၀၀၈ ဖွဲ့စည်းပုံအခြေခံဥပဒေ ပုဒ်မ ၄၃၆ ပြင်ဆင်ရေး လက်မှတ် ၄ သန်းကျော်သာ ရရှိကြောင်း၊ ကချင်၊ ကယား၊ ချင်း၊ ရခိုင်နှင့် ရှမ်းပြည်နယ်များတွင် လက်မှတ်ရရှိမှု အလွန့်အလွန်နည်းပါးကြောင်း၊ ပြည်ပရောက် မြန်မာနိုင်ငံသားများထံမှလည်း မှန်းထားသလောက်မရရှိ ကြောင်း တင်ပြခဲ့ရာ ဒေါ်အောင်ဆန်းစုကြည်မှ “သန်း ၆၀ ရှိတဲ့ နိုင်ငံမှာ လက်မှတ် ၄ သန်းပဲ ရတယ်ဆိုတာ အလွန်နည်းတယ်.. ဘယ်လိုမှ မဖြစ်သင့်ဘူး.. ပါတီလည်း သိက္ခာကျတယ်.. ကျွန်မတို့ပါတီအနေနဲ့ စည်းရုံး ရေး တွေ တိုး လုပ်ရမယ်..” ဟု ပြောဆိုခဲ့သည်။
ကြားဖြတ်ရွေးကောက်ပွဲနှင့်ပတ်သက်၍“ဒီကြားဖြတ်ရွေးကောက်ပွဲကို ဘာကြောင့် လုပ်ရတာလဲ။ အထွေထွေ ရွေးကောက်ပွဲ နီးလာတဲ့အချိန်မှာ မလိုအပ်ဘဲ လုပ်တာဖြစ်တယ်” ဟု ဒေါ်အောင်ဆန်းစုကြည်မှ ဆိုသည်။ ထို့နောက် ကြားဖြတ်ရွေးကောက်ပွဲတွင် ရွေးကောက်ခံကိုယ်စားလှယ်လူငယ်များကို ဦးစားပေး ရွေးချယ် သွားမည်ဖြစ်ပြီး လက်ရှိ ဒီချုပ် လူငယ်များ ဗဟုသုတ လိုက်စားမှုနည်းပါးနေမှုကို အားမရစသဖြင့် နိုင်ငံရေးစာအုပ်များ၊ ပါတီသမိုင်းနှင့် မူဝါဒလုပ်ငန်းများ ဖတ်ခိုင်းရန်လိုသည် ဟု ပြောဆိုခဲ့ကြောင်း သိရသည်။
လွန်ခဲ့သည့် ၆ လ အကြာ မတ်လ ၃၁ ရက်က ပြုလုပ်သော ဗဟိုအလုပ်အမှုဆောင် အစည်းအဝေးတွင် ၂၀၁၄ ကြားဖြတ်ရွေးကောက်ပွဲ၌ NLD ပါတီမှ နေရာအပြည့် ဝင်ပြိုင်မည်ဟု ဆုံးဖြတ်ခဲ့ကြောင်း NLD ပြောရေး ဆိုခွင့်ရှိသူ ဦးဥာဏ်ဝင်းက "ကျွန်တော်တို့ ဒီနေ့ CEC အစည်းအဝေးရဲ့ ဆုံးဖြတ်ချက်က ကျွန်တော် ပြောနိုင် တာကတော့ အခုပြုလုပ်မယ့် ကြားဖြတ်ရွေးကောက်ပွဲမှာ နေရာအားလုံး ၀င်ရောက်ယှဉ်ပြိုင်မယ် ဆိုတာပါပဲ။ အဲဒီကိစ္စကို ဒီနေ့ဆုံးဖြတ်ခဲ့ပါတယ်။ ကိုယ်စားလှယ်လောင်းတွေတော့ မရွေးချယ်ရသေးပါဘူး" ဟု ပြောကြား ခဲ့သည်။
သြဂုတ်လ ၄ ရက်နေ့ အစည်းအဝေးသို့ ဗဟိုအလုပ်အမှုဆောင်အဖွဲ့မှ ဦးဥာဏ်ဝင်း၊ ဦးထွန်းထွန်းဟိန်း၊ ဦးဟံသာမြင့် အပါအဝင် အဖွဲ့ဝင် ၁၂ ဦး တက်ရောက်ခဲ့ပြီး ၄၃၆ လက်မှတ်ကောက်ခံရရှိမှုကို အဓိက ဆွေးနွေး ခဲ့ကာ ဒုတိယအဆင့်အနေဖြင့် PR ကန့်ကွက်ရေး လှုပ်ရှားမှုများဆောင်ရွက်ရန် ဆွေးနွေးခဲ့ ကြောင်း သိရသည်။
အမျိုးသားဒီမိုကရေစီအဖွဲ့ချုပ်နှင့် ၈၈ မျိုးဆက်ပွင့်လင်းလူ့အဖွဲ့အစည်းတို့ ပူးပေါင်း၍ ၂၀၀၈ ဖွဲ့စည်းပုံ အခြေခံ ဥပဒေ ပုဒ်မ ၄၃၆ ပြင်ဆင်ရေး လူထုဆန္ဒလက်မှတ်များကို ဇွန်လိုင်လ ၁၉ ရက်နေ့ နောက်ဆုံးထား ကောက်ယူခဲ့ရာ ယခုအခါ ရက်သတ္တပတ် ၂ ပတ်ကြာသည်အထိ လက်မှတ်အရေအတွက် စာရင်းအတိအကျ ထုတ်ပြန်နိုင်ခြင်းမရှိသေးပေ။ ဒီချုပ်ဗဟိုကော်မတီဝင် ဦးထွန်းထွန်းဟိန်းနှင့် နီးစပ်သည့် မြစ်မခမီဒီယာတွင် မဲလက်မှတ်အရေအတွက်မှာ ၁ ဒဿမ ၇ သန်းသာ ရရှိကြောင်း သတင်းထုတ်ပြန်ထားသည်။
Eleven Media Group
No comments:
Post a Comment