ရန်ကုန်နည်းပညာတက္ကသိုလ်မှာ အသုံးပြုနိုင်တော့မည့် အဆင့်မြင့်လက်တွေ့စမ်းသပ်ခန်း

 

Schneider Electric Laboratory "ရှီနိုက်ဒါ အလက်ထရစ် လပ်ဘော်ရက်ထရီ" ကုမ္ပဏီမြန်မာနဲ့ မိတ်ဖက်အဖွဲ့အစည်းတွေက မြန်မာနိုင်ငံမှာ ပထမဆုံးအကြိမ်အဖြစ် ရန်ကုန်နည်းပညာတက္ကသိုလ်မှာ Schneider Electric Laboratory "ရှီနိုက်ဒါအလက်ထရစ် လပ်ဘော်ရက်ထရီ" လက်တွေ့စမ်းသပ်ခန်း ပစ္စည်းတွေကို ဇူလိုင်လ(၈)ရက်နေ့က အင်းစိန်မြို့နယ်၊အင်းစိန်လမ်းမပေါ်ရှိ ရန်ကုန်နည်းပညာတက္ကသိုလ် မှာ လှူဒါန်းဖွင့်လှစ်ခဲ့တယ်လို့ သိရပါတယ်။

ပြင်သစ်နိုင်ငံအခြေစိုက် Schneider Electric ကုမ္ပဏီဟာ မိမိနိုင်ငံထုတ် လျှပ်စစ်စွမ်းအင်ပစ္စည်းဖြစ်တဲ့ Domestic Enclouser (၅)လုံး၊ Motor Starter Enclouser (၅)လုံး၊ PLC Training Kit (၅)လုံးနဲ့ ကျောင်းမှာလိုအပ်မှုရှိနေတဲ့ Software တွေကို ပထမဦးဆုံးအကြိမ်အဖြစ် မြန်မာနိုင်ငံ ရန်ကုန် နည်းပညာတက္ကသိုလ်မှာ လှူဒါန်းခဲ့တာဖြစ်ပြီး မိတ်ဖက်အဖွဲ့အစည်းတွေကလည်း Oscilloscope (၁၀)လုံးအပြင် အခြားလက်တွေ့စမ်းသပ်ခန်းသုံး လျှပ်စစ်ပစ္စည်းတွေကို လှူဒါန်းခဲ့တယ်လို့ သိရပါတယ်။

ရန်ကုန်နည်းပညာတက္ကသိုလ် (YTU) ကျောင်းမှာလက်ရှိသင်ကြားနေတဲ့ Electrical Power, Electronic and Communication, Information and Communication Technology နဲ့ Mechantronic ဘာသာရပ်(၄)ခုရှိပြီး အခုလို Schneider Electric ကုမ္ပဏီမှလာရောက်လှူဒါန်းတဲ့ လက်တွေ့စမ်းသပ် ခန်းသုံး ပစ္စည်းတွေဟာ ကျောင်းအတွက် လက်တွေ့အသုံးပြုနိုင်တဲ့ ပစ္စည်းတွေဖြစ်တယ်လို့ သိရပါတယ်။ အခုလိုလာရောက်လှူဒါန်းတဲ့ ပစ္စည်းတွေဟာ ဒုတိယနှစ်အတန်းကနေစတင်ပြီး မဟာတန်းအထိ လက်တွေ့အသုံးပြုနိုင်တဲ့ ပစ္စည်းတွေဖြစ်တယ်လို့ သိရပါတယ်။

ရန်ကုန်နည်းပညာတက္ကသိုလ် (YTU) ကိုလာရောက်လှူဒါန်းတဲ့ Schneider Electric Laboratory လက်တွေ့စမ်းသပ်ခန်းရဲ့ စုစုပေါင်းတန်ဖိုးမှာ ကျပ်သိန်းပေါင်း(၇၀၀)ဖြစ်ပြီး Schneider Electric မြန်မာမှ တန်ဖိုးကျပ်ငွေသိန်းပေါင်း(၆၀၀)နဲ့ မိတ်ဖက်အဖွဲ့အစည်းများမှ တန်ဖိုးကျပ်ငွေသိန်းပေါင်း(၁၀၀) စုပေါင်းလှူဒါန်းခဲ့ကြတယ်လို့ သိရပါတယ်။

MRTV-4