သူရဦးရွှေမန်းက နေပြည်တော်ရှိ ပြည်သူ့လွှတ်တော် အဆောက်အအုံဝင်း အတွင်း နိုဝင်ဘာ ၁၈ ရက်ကပြုလုပ်သည့် သတင်းမီဒီယာများနှင့် တွေ့ဆုံပွဲတွင် မီဒီယာများ၏ မေးမြန်းမှုအပေါ် အထက်ပါကဲ့သို့ ထည့်သွင်းပြောကြား ခဲ့ခြင်းဖြစ်သည်။
“အမျိုးသားပညာရေးဥပဒေနဲ့ ပတ်သက်လို့ လွှတ်တော်က ပြန်လည်သုံးသပ်ဖို့ ဆိုတဲ့အကြောင်းကို ဒီအထိ တော့ လောလောဆယ် မရောက်လာသေးဘူး။ တကယ်လို့ လွှတ်တော်က သူတို့အနေနဲ့ တင်ပြလာမယ် ဆိုလို့ရှိရင် အလေးထား သုံးသပ်ပေးမှာ ဖြစ်ပါတယ်” ဟု ပြည်ထောင်စုလွှတ်တော်နာယက ပြည်သူ့ လွှတ်တော်ဥက္ကဋ္ဌ သူရဦးရွှေမန်းက ပြောကြားသည်။
အမျိုးသားပညာရေးဥပဒေနှင့် ပတ်သက်၍ ကျောင်းသားသမဂ္ဂများက ဆန္ဒပြ မှုကို နိုဝင်ဘာ ၁၄ ရက်မှ ၁၈ ရက်အထိ ပြုလုပ်လျက်ရှိပြီး ရန်ကုန် တက္ကသိုလ်ဝင်း အတွင်းရှိ ဖောက်ခွဲဖျက်ဆီးခံခဲ့ရသည့် ကျောင်းသား သမဂ္ဂ အဆောက်အအုံနှင့် ကိုလိုနီခေတ် ကျွန်ပညာရေးစနစ်ကို သပိတ်မှောက် ဆန္ဒပြခဲ့သည့် သမိုင်းဝင် အထိမ်းအမှတ်နေရာများသို့ သွားရောက်ကာ ဆန္ဒပြမှုများရှိကြောင်း သိရသည်။
ပြည်ထောင်စုလွှတ်တော်နာယက သူရဦးရွှေမန်းက “ဒါနဲ့ပတ်သက်ပြီးတော့ မိမိအမြင် ပြောမယ်ဆိုလို့ ရှိရင် ပေါ့လေ။ ကျောင်းသားလူငယ်များဟာလည်း သူတို့မှာ ကောင်းမြတ်တဲ့စေတနာများ ရှိကြမှာပါ။ သူတို့ရဲ့ အတွေးအခေါ် တွေကလည်း နိုင်ငံအတွက် နိုင်ငံတန်ဖိုးအတွက် ဖြစ်မယ်လို့ ယူဆပါတယ်။ ဒါကြောင့်မိုလို့ သူတို့ရဲ့ ဆန္ဒပြတောင်းဆိုမှုတွေဟာ နိုင်ငံအတွက် ကျောင်းသား များအတွက်၊ အများပြည်သူများအတွက် ဖြစ်နိုင်တယ်။ စိတ်ကောင်းစေတနာနဲ့ ဆောင်ရွက်သွားမယ်လို့လည်း မိမိယုံကြည်ပါတယ်” ဟု သုံးသပ် ပြောကြား သည်။
အမျိုးသားပညာရေးဥပဒေနှင့် ပတ်သက်၍ “လွှတ်တော်ကို သူတို့အနေနဲ့ တင်ပြလာမယ်ဆိုလို့ရှိရင် ဒီလို တင်ပြချက်တွေကို အလေးအနက်ထားပြီး ဆောင်ရွက်ဖို့ လွှတ်တော်ဘက်က အသင့်ရှိပါတယ်” ဟု သူရ ဦးရွှေမန်းက သတင်းမီဒီယာများနှင့် တွေ့ဆုံရာတွင် ပြောကြားသည်။
အမျိုးသားပညာရေးဥပဒေနှင့် ပတ်သက်၍ ကျောင်းသားသမဂ္ဂများက “ကျောင်းသားထုကို အခြေမခံသော ပညာရေးစနစ် အလိုမရှိ”၊ “ဒီမိုကရေစီ ပညာရေး ဒို့အရေး”၊ “ကျောင်းသားသမဂ္ဂများ လွတ်လပ်စွာ ဖွဲ့စည်းခွင့် ရရှိရေး”၊ “သပိတ်သပိတ်မှောက်မှောက်” စသည့် ကြွေးကြော်သံများဖြင့် ဆန္ဒပြ နေကြသည်။
Eleven Media Group
No comments:
Post a Comment