ထိုင်းနိုင်ငံရှိ ခရီးသွားလုပ်ငန်းတွင် ရိုးရာယဉ်ကျေးမှုကို ပြသပြီး ဝင်ငွေရှာနေသည့် လည်ပင်းကြေးကွင်းဝတ် ကယန်း တိုင်းရင်းသားများ အနေနှင့် မိမိတို့၏ နေရပ်ရင်း ဒေသသို့ ပြန်လာပါက စားဝတ်နေရေး နှင့် အလုပ်အကိုင် အတွက် ပြည်နယ်အစိုးရက စီစဉ်ဆောင်ရွက်ထားကြောင်း ကယားပြည်နယ် တိုင်းရင်းသားရေးရာ ဝန်ကြီး ဦးစိန်ဦးက ဒီဇင်ဘာလ ၆ ရက်နေ့က ပြောကြားသည်။
လည်ပင်းကြေးကွင်းဝတ် ကယန်းလူမျိုး အများစုသည့် ထိုင်းနိုင်ငံမြောက်ပိုင်း မယ်ဟောင်ဆောင်တွင် ကယန်းသာယာရွာ၊ ဟွေ့စူးထောက်ရွာ၊ ဟွေ့ပူကဲရွာ တို့တွင် နေထိုင်နေကြပြီး ချင်းမိုင်၊ ချင်းရိုင် ခရိုင်နှင့် ထိုင်းနိုင်ငံတောင်ပိုင်း ဖူးခက်ဒေသတွင်လည်း နေထိုင် လုပ်ကိုင်နေကြသည်။
ရိုးရာယဉ်ကျေးမှု ပြသနေသည့် လုပ်ငန်းလုပ်ကိုင်သည့် ကယန်းလူမျိုးများ၏ တစ်နေ့ ပျမ်းမျှဝင်ငွေမှာ မြန်မာကျပ်ငွေ တစ်သောင်းငါးထောင် ကျပ်ခန့် ရှိပြီး ခရီးသွား ဧည့်သည်များနှင့် ဓာတ်ပုံအရိုက်ခံနှင့် ရိုးရာ ဂျက်ခုတ်ထည်များ ရက်ပြရုံသာ ပြုလုပ်ကြရကြောင်းလည်း ထိုင်းနိုင်ငံသို့ သွားရောက် လုပ်ကိုင်ဖူးသည့် ဒေသခံ ကယန်းလူမျိုးများက ပြောကြားသည်။
မြန်မာပြည်သို့ ပြန်လာပါကလည်း အလားတူ လုပ်ငန်းများကို မိမိတို့နေရပ်တွင် ဆောင်ရွက်နိုင်သွားရန် စီစဉ်ပေးမည်ဟု ဦးစိန်ဦးက ပြောဆိုသည်။
ယင်း ကယန်းလူမျိုးများ နေထိုင် လုပ်ကိုင်သည့် နေရာကို ထိုင်းနိုင်ငံတွင် Human Zoo (လူသားတိစ္ဆာန်ရုံ) ဟုလည်း လူသိများကြကြောင်း၊ ယဉ်ကျေးမှုရိုးရာ ဝတ်စုံများကို ဝတ်ဆင်ပြသပြီး ကမ္ဘာလှည့် ခရီးသည်များအား ဆွဲဆောင်သည့် လုပ်ငန်းဖြင့် ထိုင်းနိုင်ငံအနေနှင့် ဝင်ငွေရရှိနေကြောင်း ယင်းနေရာတွင် မြန်မာနိုင်ငံမှ အဆိုပါ တိုင်းရင်းသား ၅၀၀ ကျော်ရှိပြီး ၂၀၀၀ ပြည့်နှစ် နောက်ပိုင်းမှ စတင်သွားရောက် လုပ်ကိုင်ကြခြင်း ဖြစ်ကြောင်း ကယန်းဒေသ ရှိ ပါတီအဖွဲ့အစည်း များထံမှ သိရသည်။
ကယားပြည်နယ်ရှိ လည်ပင်း ကြေးကွင်းဝတ် ကယန်းလူမျိုးများ နေထိုင်သည့် ကျေးရွာဒေသ များ တွင် ရေအခက်အခဲ ရှိခြင်း၊ သီးနှံစိုက်ပျိုးမှု မအောင်မြင်ခြင်းနှင့် စားဝတ်နေရေး အတွက် စီးပွားရေးလုပ်ငန်းများ မရှိခြင်းကြောင့် ရွာတိုင်းတွင် လူဦးရေ ထက်ဝက်ကျော်ခန့် ထိုင်းနိုင်ငံသို့ သွားနေကြကြောင်း ကယားပြည်နယ် ဒီမောဆို မြို့နယ် ရွမ်းကူးကျေးရွာရှိ ဒေါ်မူးသားက ပြောကြားသည်။
၎င်းက "စသွားတုန်းက တစ်ယောက်စ၊ နှစ်ယောက်စပဲ။ ပိုက်ဆံများများ ရတော့ သွားတဲ့သူတွေ က ပြန်လာခေါ်ကြလို့ ပါသွားကြတာ။ ဒီနိုင်ငံမှာပဲ ပိုက်ဆံရမယ်ဆိုရင် ထိုင်းမသွားတော့ဘူး" ဟုပြောသည်။
ယင်းကယန်းလူမျိုးများ မိမိနေရပ်ရင်း ဒေသသို့ ပြန်လာလိုသည့် ဆန္ဒများရှိရန် အတွက် ၄င်းတို့၏ စားဝတ်နေရေး အတွက် လိုအပ်သည့် အထောက်အပံ့နှင့် အကူအညီများ ရှိသင့်သည်ဟု ကယန်းအမျိုးသား ပါတီမှ ဒုဥက္ကဋ္ဌ ဦးပေါလုချမ်းက ဆိုသည်။
၎င်းက "သူတို့ကို ကိုယ့်တိုင်းပြည် ပြန်ခေါ်ဖို့ဆိုတာက အလုပ်အကိုင် အခွင့်အလမ်း၊ ပုံမှန်ဝင်ငွေ ရှိအောင် လုပ်ပေးဖို့ လိုမယ်" ဟုပြောသည်။
လည်ပင်းကြေးကွင်းဝတ် ကယန်းတိုင်းရင်းသားများသည် ကယားပြည်နယ် အနောက်ပိုင်း လွိုင်ကော်မြို့နယ်နှင့် ဒီမောဆို မြို့နယ်တို့တွင် အများဆုံး နေထိုင်ကြပြီး ကယားပြည်နယ်နှင့် ရှမ်းပြည်နယ်စပ် မိုးဗြဲနယ် တို့တွင်လည်း တွေ့ရသည်။
The Voice Weekly
No comments:
Post a Comment