(ပုံစာ-လားရှိုးမြို့ သီရိမင်္ဂလာမန်ဆူရှမ်းကျောင်းတွင် လာရောက် ခိုလှုံနေ သော လောက်ကိုင်ဒေသခံများ လောက်ကိုင်မြို့၌ ပြန်လည်အခြေချ နေထိုင်ရန် ဧပြီ ၂၁ ရက်က ပြန်လည်ထွက်ခွာရန် ပြင်ဆင်နေစဉ်)
လောက်ကိုင်ဒေသတွင် ဖြစ်ပွားနေသော တိုက်ပွဲများကြောင့် လားရှိုးမြို့ သီရိမင်္ဂလာ မန်ဆူရှမ်းကျောင်း တွင် လာရောက်ခိုလှုံနေသော လောက်ကိုင် ဒေသခံများ လောက်ကိုင်မြို့၌ ပြန်လည်အခြေချနေထိုင်ရန် ဧပြီ ၂၁ ရက်က ပြန်လည်ထွက်ခွာသွားကြပြီ ဖြစ်ကြောင်း သိရသည်။ လားရှိုးမြို့ သီရိမင်္ဂလာ မန်ဆူ ရှမ်းကျောင်းတွင် လာရောက်ခိုလှုံ နေထိုင် နေသော အိမ်ထောင်စု ၇၄စုမှ မိသားစုဝင်ပေါင်း ၂၃၄ ဦးအား မော်တော်ယာဉ်ကြီး ငါးစီးဖြင့် လောက်ကိုင် မြို့သို့ ပို့ဆောင် ပေးသွားမည်ဖြစ်ကြောင်း သိရသည်။
“ဒီနေ့ လောက်ကိုင်ပြန်တဲ့အဖွဲ့တွေကို လောလောဆယ် အ.ထ.က(၁) မှာ ယာယီထားပါမယ်။ နောက် တော့ မိုးကာတဲတွေနဲ့ သူ့တဲနဲ့သူ ထားပါမယ်။ အိမ်ရှိတဲ့သူတွေကလည်း သူ့အိမ်သူပြန်လို့ရအောင် စီစဉ် ပေးသွား ပါမယ်” ဟု လူမှုဝန်ထမ်းကယ်ဆယ်ရေး နှင့် ပြန်လည်နေရာချထားရေးဝန်ကြီးဌာနမှ ဒုတိယ ညွှန်ကြားရေးမှူး ဦးကျော်ကျော်ထွန်းက ပြောကြားသည်။ အဆိုပါ လားရှိုးမြို့ သီရိမင်္ဂလာမန်ဆူ ရှမ်းကျောင်းတိုက် တွင် လာရောက်ခိုလှုံနေသော လောက်ကိုင်ဒေသခံများမှာ လောက်ကိုင်ဒေသတွင်း တိုက်ပွဲများ စတင်ဖြစ် ပွား ခဲ့သည့် ဖေဖော်ဝါရီလအတွင်းမှ စတင်၍ ဧပြီ ၂၁ ရက်အထိ နှစ်လ ကျော်ကြာ နေထိုင်ခဲ့ကြရကြောင်း သိရသည်။
“လောက်ကိုင်ကို ပြန်ရတော့မယ်ဆိုတော့ ပျော်ပါတယ်။ ဒါပေမဲ့ လောက်ကိုင် က ကျွန်မတို့နေတဲ့ အိမ်တွေ၊ တိုက်ခန်းတွေတော့ အဖောက်ခံထားရတယ် ပြောတယ်။ တချို့ဆိုရင် မီးလောင်သွားတယ်တဲ့။ ဒါပေမဲ့ လောက်ကိုင်ကို ပြန်ရောက်လို့ အရင်လိုအခြေအနေတွေ ပြန်ကောင်းရင် ဘာပဲလုပ်ကိုင်စားရ စားရ လုပ်စားနိုင်ပါတယ်။ ဒီလို ကူညီ စောင့်ရှောက်ပေးတဲ့သူတွေ အားလုံး ကို ကျေးဇူးတင်ပါတယ်လို့ ပြောချင်ပါ တယ်”ဟု လောက်ကိုင်မြို့သို့ ပြန်မည့် မထုရှန်က ပြောကြားသည်။
လောက်ကိုင်မြို့သို့ ပြန်ကြမည့် တိုက်ပွဲရှောင်သူများသည် သက်ဆိုင်ရာမှ စီစဉ်ပေးထားသောကားများနှင့် ပြန်ကြသကဲ့သို့ မိမိတို့၏ ဆိုင်ကယ်များ၊ သုံးဘီးဆိုင်ကယ်များ၊ကားများနှင့်လည်း အတူပြန်ကြပြီ ဖြစ် ကြောင်း၊ နှစ်လကျော်ကာလအတွင်း မြန်မာနိုင်ငံ ဒေသအသီးသီးမှ နေရပ်ပြန်သူ များအား လားရှိုးမြို့ သီရိ မင်္ဂလာ မန်ဆူရှမ်းကျောင်းတိုက်မှ တစ်ဆင့် ၎င်းနေရပ်များသို့ ပြန်လည်ပို့ဆောင်ပေးခဲ့သူ ၂၄၂၀၀ ဦးအား ယာဉ်စီးပေါင်း ၈၅၀ ဖြင့် နေရပ်ပြန်ရန် စီစဉ်ပေးနိုင်ခဲ့ကြောင်း သိရသည်။
Eleven Media Group
No comments:
Post a Comment