မြန်မာတစ်နိုင်ငံလုံးကို လျှပ်စစ်ဓာတ်အား ဖြန့်ဖြူးပေးနေသည့် မဟာဓာတ်အား လိုင်း ချို့ယွင်းမှု ဖြစ်ပွား သဖြင့် ဒီဇင်ဘာလ ၇ ရက် နံနက်ပိုင်းက တစ်နိုင်ငံလုံး လျှပ်စစ်မီး ငါးနာရီကျော် ကြာအောင် ပြတ်တောက် ခဲ့ကြောင်း မြို့နယ်အသီးသီး တွင် နေထိုင်သူများ၏ ပြောကြားချက်အရ သိရှိရသည်။
ပဲခူးတိုင်းဒေသကြီး တောင်ငူမြို့နှင့် ကျောက်တံခါး မြို့အကြားတွင် ဓာတ်အား လိုင်းစနစ် ချို့ယွင်းခဲ့သဖြင့် ဒီဇင်ဘာလ ၇ ရက် နံနက် ၄ နာရီခွဲ ဝန်းကျင်မှ ၁၀ နာရီကျော်အထိ လျှပ်စစ်မီး ပြတ်တောက်ခဲ့ခြင်း ဖြစ်ပြီး ချို့ယွင်းမှုကို ပြန်လည် ပြုပြင် နိုင်ခဲ့ကြောင်း ရန်ကုန်မြို့တော် လျှပ်စစ်ဓာတ်အားပေးရေး အဖွဲ့မှ တာဝန် ရှိသူ တစ်ဦးက ပြောကြားသည်။
“အရင်ရက်တွေမှာ ကြာကြာပြတ်တာမျိုး မရှိဘူး။ ခုကလည်း ဓာတ်အားလိုင်း စနစ် ထိခိုက်သွားတာ ကြောင့်ပါ” ဟု ရန်ကုန်မြို့တော် လျှပ်စစ်ဓာတ်အား ပေးရေး အဖွဲ့မှ ဥက္ကဋ္ဌ ဦးအောင်ခိုင်က ဆိုသည်။
ဓာတ်အားလိုင်းစနစ် System Break Down ဖြစ်သဖြင့် ယာယီပြတ်တောက် ခြင်း ဖြစ်ပြီး ဓာတ်အားလိုင်း များမှာ လယ်ကွင်းနှင့် တောထဲတွင်ဖြတ်၍ တည်ဆောက်ထားသဖြင့် သစ်ကိုင်းကျိုးခြင်းကဲ့သို ဖြစ်ရပ်များ ကြောင့်လည်း ဓာတ်အားလိုင်း ထိခိုက်ရကြောင်း အဆိုပါအဖွဲ့မှ အင်ဂျင်နီယာတစ်ဦးက ရှင်းပြသည်။
ရန်ကုန်မြို့တော်တွင် ပုံမှန်လျှပ်စစ်မီး ရရှိနေသော်လည်း ယခု ရက်သတ္တ တစ်ပတ် အတွင်း လျှပ်စစ်မီး ပြတ်တောက်မှု အချို့လည်း ကြုံတွေ့နေရကြောင်း မြို့နယ်အချို့တွင် နေထိုင်သူများက ပြောဆိုသည်။
ယခုနှစ် စက်တင်ဘာ ၁၉ ရက်နေ့ ည ၇ နာရီ ဝန်းကျင်ကလည်း ပဲခူးတိုင်း ဒေသကြီး ညောင်လေးပင် မြို့နယ်အတွင်းရှိ မဟာဓာတ်အားလိုင်းချို့ယွင်းသဖြင့် တစ်နာရီခွဲကြာ လျှပ်စစ်မီးပြတ်တောက်မှု ကြုံတွေ့ခဲ့ ရသည်။
The Voice Weekly
No comments:
Post a Comment