မြန်မာသတင်းမီဒီယာတွေ ဖိအားပေးခြိမ်းခြောက်ခံနေရတာ ဖမ်းဆီးထိန်းသိမ်းခံနေရတာတွေ ရင်ဆိုင်နေရချိန် ပြန်ကြားရေးဝန်ကြီး ဦးအောင်ကြည်ကို သူ့ရဲ့သဘောဆန္ဒအလျောက် နှုတ်ထွက်ခွင့်ပြုတယ်လို့ သမ္မတက ဇူလိုင် ၂၉ရက်နေ့မှာ ကြေညာလိုက်ပါတယ်။
ဆက်ဆံရေးဝန်ကြီး၊ အလုပ်သမားဝန်ကြီး၊ ပြန်ကြားရေးဝန်ကြီး စတဲ့တာဝန်တွေယူခဲ့တဲ့ ဦးအောင်ကြည်ကို တာဝန်ကအနားပေးလိုက်ပြီး လစ်လပ်သွားတဲ့ ပြန်ကြားရေးဝန်ကြီးနေရာမှာ သမ္မတရုံးပြောခွင့်ရပုဂ္ဂိုလ်အဖြစ်ရော ဒုတိယဝန်ကြီးပါ တာဝန်ယူနေတဲ့ ဦးရဲထွဋ်ကို ခန့်အပ်နိုင်ခြေရှိပေမယ့် တရားဝင် ကြေညာချက် ထုတ်ပြန်တာ မရှိသေးပါဘူး။
ကျန်းမာရေးဝန်ကြီး ဒေါက်တာဖေသက်ခင်ကိုလည်း ပြန်ကြားရေးဝန်ကြီး ဦးအောင်ကြည်နဲ့ အတူ ရာထူးကနေ အနားပေးလိုက်သလို နယ်စပ်ရေးရာ ဒုတိယဝန်ကြီးအဖြစ် ကကကြည်းက ဗိုလ်ချုပ်တင်အောင်ချစ်ကို ခန့်အပ်ကြောင်းကိုလည်း တစ်ရက်တည်းမှာ ကြေညာခဲ့ပါတယ်။
သမ္မတဦးသိန်းစိန်လက်ထက် ဝန်ကြီးနဲ့ ဒုတိယဝန်ကြီးတွေ အများဆုံးအပြောင်းအလဲလုပ်ခဲ့ပြီး သာသာနာရေးဝန်ကြီး ဦးဆန်းဆင့်ကိုတော့ အမိန့်မနာခံမှုနဲ့ အရေးယူခဲ့ပြီး ဖမ်းဆီးခဲ့ပါတယ်။ ကျန်တဲ့ ဝန်ကြီးတွေ၊ ဒုတိယဝန်ကြီးတွေကိုတော့ ဌာနအပြောင်းအရွှေ့တွေ အများဆုံးလုပ်ခဲ့ပြီး ဒုတိယဝန်ကြီးတွေဟာ ဝန်ကြီးအဖြစ် အများဆုံး ရာထူးတိုးခံခဲ့ရတာများပါတယ်။
ဦးရဲထွဋ်ဟာ မြန်မာသတင်းမီဒီယာသမားတွေကြားမှာ Facebook ဝန်ကြီးလို့ ခေါ်ဝေါ်သမုတ်ခံရသူဖြစ်ပြီး ၂ဝဝ၅ခုနှစ်က စစ်တပ်ကနေ ပြန်ကြားရေးဝန်ကြီးဌာနမှာ အရာရှိအဖြစ် စတင်တာဝန်ယူခဲ့ပြီးနောက်ပိုင်း ပြန်ကြားရေးရဲ့ အဓိက မူဝါဒတွေကို ချုပ်ကိုင်ခဲ့သူအဖြစ် ထင်ရှားပါတယ်။
အခုနောက်ပိုင်း ပြန်ကြားရေးပိုင် သတင်းစာ၊ ရေဒီယိုနဲ့ ရုပ်မြင်သံကြားတွေကို အများပြည်သူဝန်ဆောင်မှုမီဒီယာ PSM အဖြစ် အသွင်ကူးပြောင်းဖို့ အဓိကဆောင်ရွက်နေသူဖြစ်ပြီး မြန်မာနိုင်ငံစာနယ်ဇင်းကောင်စီ(ယာယီ)က ပြင်းပြင်းထန်ထန် ကန့်ကွက်ထားပါတယ်။
.kamayutmedia
No comments:
Post a Comment