နယ်စပ်ရေးရာ ဒုတိယ၀န်ကြီး အဖြစ်ကနေ မူလတပ်တာဝန်တွေကို ပြန်လည်ထမ်းဆောင် စေခဲ့တဲ့ ဗိုလ်ချုပ် မောင်မောင်အုန်းကို ရခိုင်ပြည်နယ် လွှတ်တော်အတွက် တပ်မတော် ကိုယ်စားလှယ်အဖြစ် အစားထိုး ပြောင်းလဲ ကြောင်း ရွေးကောက်ပွဲ ကော်မရှင်က ဒီကနေ့ ကြေညာပါတယ်။
ရခိုင်ပြည်နယ်၊ ရန်ကုန်တိုင်းဒေသကြီးနှင့် မကွေးတိုင်းဒေသကြီး လွှတ်တော်တွေအတွက် တပ်မတော်သား ကိုယ်စားလှယ် ခြောက်ဦးကို ပြောင်းလဲခန့်အပ်လိုကြောင်း ကာကွယ်ရေးဦးစီးချုပ်က တင်ပြခဲ့တဲ့ အတွက် ပြည်ထောင်စု ရွေးကောက်ပွဲကော်မရှင်က ဇွန်လ ၂၀ ရက်စွဲနဲ့ အစားထိုးခန့်အပ်ခဲ့ကြောင်း ဒီကနေ့ အစိုးရသတင်းမီဒီယာတွေကနေ ကြေညာလိုက်တာဖြစ်ပါတယ်။
အခုလို အစားထိုးခန့်အပ်တဲ့ တပ်မတော်အရာရှိ ၆ ဦးမှာ ဗိုလ်ချုပ်မောင်မောင်အုန်းဟာ အသက်အရွယ်နဲ့ ရာထူးအမြင့်ဆုံး စစ်ဖက်အရာရှိဖြစ်ပြီး ကျန် ၅ ဦးက ဗိုလ်ကြီးအဆင့်သာရှိကြပါတယ်။
ဇွန်လ ၁၉ ရက်နေ့က ရခိုင်ပြည်နယ်ဝန်ကြီးချုပ် ဦးလှမောင်တင်ကို ဆန္ဒအလျှောက် ရာထူးက နှုတ်ထွက်ခွင့် ပြုကြောင်း သမ္မတရုံးက ကြေငြာခဲ့အပြီး ဝန်ကြီးချုပ်ရာထူးနေရာအတွက် သမ္မတကခန့်အပ်နိုင်ဖို့ ဗိုလ်ချုပ် မောင်မောင်အုန်းကို ပြည်နယ်လွှတ်တော် ကိုယ်စားလှယ်အဖြစ် အခုလို ပြောင်းလဲတာဝန်ပေး တာဖြစ် တယ်လို့ ဒီကနေ့ ပြည်တွင်းထုတ် သတင်းမီဒီယာတွေမှာ ရေးသားနေကြပါတယ်။
လက်ရှိအစိုးရလက်ထက် တပ်မတော်သား ပြည်နယ်လွှတ်တော် ကိုယ်စားလှယ်တစ်ဦးကို ပြည်နယ် ၀န်ကြီးချုပ်အဖြစ် ပထမဆုံးခန့်အပ်ခံခဲ့တဲ့ သာဓကရှိခဲ့ပြီး ကရင်ပြည်နယ်ဝန်ကြီးချုပ် ဦးဇော်မင်းဟာ ဝန်ကြီးချုပ် မခန့်အပ်မီ တပ်မတော်သား ပြည်နယ်လွှတ်တော် ကိုယ်စားလှယ်အဖြစ် ကာကွယ်ရေးဦးစီးချုပ် က တိုက်ရိုက်ပြောင်းလဲ ခန့်ထားခံခဲ့ရသူတစ်ဦးဖြစ်ပါတယ်။
RFA Burmese
No comments:
Post a Comment