သမ္မတ၏ “စားပွဲဝိုင်းတွင် တွေ့ဆုံဆွေးနွေးခြင်း” နည်းလမ်း KIO ကြိုဆို
နယူးဒေလီ (မဇ္ဈိမ)။ ။ နိုင်ငံတော် သမ္မတ ဦးသိန်းစိန်၏ “စားပွဲဝိုင်းတွင်
တွေ့ဆုံဆွေးနွေးခြင်း” နည်းလမ်းအား ကချင်လွတ်လပ်ရေးအဖွဲ့ KIO က
ကြိုဆိုကြောင်း ဗုဒ္ဓဟူးနေ့က တုန့်ပြန်ကြေညာချက်တရပ် ထုတ်ပြန်လိုက်သည်။
ဖေဖော်ဝါရီလ ၄ ရက်နေ့က ပြည်ထောင်စုငြိမ်းချမ်းရေး ဖော်ဆောင်ရေးကော်မတီမှ
ဝန်ကြီး ဦးအောင်မင်း ဦးဆောင်သောအဖွဲ့နှင့် KIO မှ အမြဲတမ်း ဗဟိုကော်မတီ
ဦးဆွမ်လွတ်ဂမ်တို့ ဦးဆောင်သောအဖွဲ့တို့ တရုတ်နိုင်ငံ၊ ရွှေလီမြို့တွင်
တွေ့ဆုံဆွေးနွေးပွဲသို့ ပေးပို့သော သမ္မတ၏ ဆုတောင်းမေတ္တာပို့သစာပါ
သဘောထားအား ကြိုဆိုလိုက်ခြင်းလည်း ဖြစ်သည်။
“တိုင်းရင်းသားများအားလုံးအတွက် တန်းတူညီမျှမှု၊ ကိုယ်ပိုင်ပြဋ္ဌာန်းခွင့်များကို စားပွဲဝိုင်းမှာ တွေ့ဆုံဆွေးနွေးခြင်းသည်သာ တခုတည်းသောနည်းလမ်းဖြစ်ကြောင်း” သမ္မတ က ယုံကြည်သည်ဟု ဆိုထားခြင်းဖြစ်သည်။
KIO ဗဟိုကော်မတီမှလည်း “စစ်မှန်သော ငြိမ်းချမ်းရေး ရရှိနိုင်ရန် နှင့်
တိုင်းရင်းသားများ အားလုံးအတွက် တန်းတူညီမျှမှု၊ ကိုယ်ပိုင်
ပြဋ္ဌာန်းခွင့်များကို စားပွဲဝိုင်းတွင် တွေ့ဆုံ ဆွေးနွေးကာ
အဖြေရှာမည်ဖြစ်ပါသည်” ဟု ကြေညာလိုက်သည်။
ထို့ပြင် ဖေဖော်ဝါရီလ ၁
ရက်နေ့နှင့် ၄ ရက်နေ့ပါ KIO နှင့် မြန်မာအစိုးရတို့ ပူးတွဲကြေညာချက်ပါ
အချက်များအတိုင်း ဆက်လက် ဆောင်ရွက်သွားမည် ဖြစ်ကြောင်း KIO အဖွဲ့
ကြေညာချက်က ဖော်ပြသည်။
အစိုးရနှင့် KIO တို့ ယခုလအတွင်း ထပ်မံ တွေ့ဆုံရန် သဘောတူထားခဲ့ကြသည်။
No comments:
Post a Comment