နိုင်ငံ၏ ကံကြမ္မာသည် တပ်မတော်၏ လက်ထဲတွင်သာ ရှိသည်မဟုတ်ဘဲ နိုင်ငံသူနိုင်ငံသားအားလုံး၏ လက်ထဲတွင်ရှိကြောင်း ဒေါ်အောင်ဆန်းစုကြည်ပြောကြား

နိုင်ငံ၏ ကံကြမ္မာသည် တပ်မတော်၏ လက်ထဲတွင်သာ ရှိသည်မဟုတ်ဘဲ နိုင်ငံသူ နိုင်ငံသား အားလုံး၏ လက်ထဲတွင်ရှိကြောင်း အမျိုးသားဒီမိုကရေစီ အဖွဲ့ချုပ်ဥက္ကဋ္ဌ ဒေါ်အောင်ဆန်းစုကြည် က ပြောကြားခဲ့သည်။

နိုဝင်ဘာလ ၅ ရက်တွင် အမျိုးသားဒီမိုကရေစီ အဖွဲ့ချုပ်ရုံး၌ ပြုလုပ်သည့် မီဒီယာတွေ့ဆုံပွဲတွင် ဒေါ်အောင်ဆန်းစုကြည်က ယခုကဲ့သို့ ပြောကြားခဲ့ခြင်းဖြစ်သည်။

သတင်းထောက်တစ်ဦး မေးမြန်းသည့် “ဖွဲ့စည်းပုံအခြေခံဥပဒေကို ပြင်ဆင်ရန် တပ်မတော်အား ဖိအားပေးပါက တိုင်းပြည်မကောင်းသည့်ဘက်သို့ ရောက်သွားနိုင်ခြင်း ရှိ၊ မရှိ” ဆိုသည့်အချက်အား ပြန်လည်ဖြေကြားရာတွင် ထည့်သွင်းပြောကြား ခဲ့ခြင်းဖြစ်သည်။

ဒေါ်အောင်ဆန်းစုကြည်က ပြောကြားရာတွင် “ကျွန်မအမြင်မှာတော့ ဒီနိုင်ငံရဲ့ ကံကြမ္မာဟာ တပ်မတော်ရဲ့ လက်ထဲမှာပဲရှိတာ မဟုတ်ပါဘူး။ ဒီနိုင်ငံရဲ့ ကံကြမ္မာဟာ ဒီနိုင်ငံရဲ့ နိုင်ငံသူ နိုင်ငံသားအားလုံးရဲ့ လက်ထဲမှာရှိပါတယ်။ အဲဒါဟာ ဘယ်အဖွဲ့အစည်းကနေ ဘယ်အုပ်စုကနေ ဘယ်အုပ်စုကို ဖိအားပေးလို့ ဆိုတာထက် ဘယ်လိုအားလုံးက ပူးပေါင်းဆောင်ရွက်မလဲ ဆိုတာက အဓိကပါ။ အန်တီတို့က အစကတည်းက ပြောခဲ့တာက တွေ့ဆုံဆွေးနွေးရေးပဲ။ တွေ့ဆုံဆွေးနွေးရေး ဆိုတာက အခုမှပြောတာ မဟုတ်ပါဘူး။ ၁၉၈၈ ခုနှစ် ပထမဆုံးအမျိုးသား ဒီမိုကရေစီအဖွဲ့ချုပ်ကို စတင်ထူထောင်စဉ် ကတည်းက အမျိုးသားရင်ကြားစေ့ရေးကို ဦးတည်တဲ့ တွေ့ဆုံဆွေးနွေးရေးကို တောင်းခဲ့တာဖြစ်ပါတယ်။ အဲဒီတုန်းကလည်း ဒီတောင်းဆိုချက်ကို မလိုက်လျောခဲ့ပါဘူး။ အခုထိလည်း တကယ်တော့ မလိုက်လျောသေးပါဘူး။ ဆိုတော့ ကျွန်မတို့ နိုင်ငံရဲ့ပြဿနာတွေကို အေးအေးဆေးဆေးနဲ့ ပြည်သူလူထု စိတ်ချမ်းသာရအောင်လ ဖြေရှင်းရမယ်ဆိုလို့ရှိရင် ဒီဆွေးနွေးပွဲလမ်းကနေပြီး အခြားလမ်းကြောင်း မရှိပါဘူး။ အဲဒီတော့ ပြည်သူများအနေနဲ့ ကျွန်မတို့နိုင်ငံမှာ အေးအေးဆေးဆေးနဲ့ လိုရာပန်းတိုင်ကို ဆက်သွားနိုင်ဖို့ဆိုလို့ရှိရင် ဖိအားပေးတယ်ဆိုတာ တပ်မတော်တင် မဟုတ်ဘူး။ ဆွေးနွေးပွဲထဲမှာ ပါသင့်ပါထိုက်တဲ့သူတွေ ကျွန်မတို့ကတော့ လေးပွင့်ဆိုင်လို့ ပြောတာပေါ့။ လေးပွင့်ဆိုင်ဆိုတာ သမ္မတကြီး ဦးသိန်းစိန်ရယ် ကာကွယ်ရေးဦးစီးချုပ်ရယ် နောက်ပြီးတော့ လွှတ်တော်ကို ကိုယ်စားပြုတဲ့ ဥက္ကဋ္ဌဦးရွှေမန်းရယ် ကျွန်မရယ် ဒီလေးပွင့်ဆိုင်ဆွေးနွေးပွဲ ဖြစ်မြောက်ရေးအတွက် ပြည်သူတွေကနေပြီးတော့ အားပေးကြပါ။ ပြည်သူတွေကနေ ထောက်ခံကြပါလို့ ကျွန်မက ဒီလိုပဲတောင်းခံချင်ပါတယ်” ဟု ပြောကြားခဲ့သည်။

လွှတ်တော်တွင်းရှိ တပ်မတော်သား လွှတ်တော်ကိုယ်စားလှယ်များသည် ဖွဲ့စည်းပုံအခြေခံဥပဒေပါ ပုဒ်မ ၄၃၆ အား မပြင်ဆင်လိုကြောင်း သဘောထားမှတ်ချက် ပြုထားသည်။

Eleven Media Group