ထိုင်းနိုင်ငံတောင်ပိုင်း၊ လိပ်ကျွန်းတွင် ဗြိတိန်စုံတွဲကို စက်တင်ဘာ ၁၄ ရက်နေ့က သတ်သည်ဟူသောစွဲချက်ဖြင့် မြန်မာ လုပ်သား ၃ ဦးအား ဖမ်းဆီးထားမှုကို တပ်မတ်ာကာကွယ်ရေးဦးစီးချုပ် ညွှန်ကြားချက်အရ မြန်မာစစ်သံရုံးမှ လိုက်ပါ ကူညီဆောင်ရွက်ပေး နေကြောင်း သတင်းရရှိသည်။
တပ်မတော်ကာကွယ်ရေးဦးစီးချုပ်၏ ညွန်ကြားချက်အရ ဘန်ကောက်မြို့ရှိ မြန်မာစစ်သံရုံးအနေဖြင့် မြန်မာသံရုံး ကောင်စစ်အရာရှိ ဦးထွန်းအေး၊ မြန်မာရွှေ့ပြောင်းအလုပ်သမားအရေးကို ကူညီဆောင် ရွက်ပေးနေသော MAT ထိုင်းနိုင်ငံရောက် မြန်မာနိုင်ငံသားများအသင်းက ဦးကျော်သောင်း၊ မြန်မာအလုပ်သမားများ ကူညီ စောင့်ရှောက်ရေးရှေ့နေ ဦးအောင်မျိုးသန့်၊ ထိုင်းနိုင်ငံတောင်ပိုင်း အခြေစိုက် FED ပညာရေးနဲ့ ဖွံ့ဖြိုးတိုးတက်ရေး ဖောင်ဒေးရှင်း မှ ဦးမင်းဦး၊ ဦးမိုးဝေတို့နှင့်အတူ ပူးပေါင်းကူညီဆောင်ရွက်လျက်ရှိကြောင်း စစ်သံရုံးမှ တာဝန်ရှိသူတစ်ဦးက ပြောသည်။
အဆိုပါအဖွဲ့သည် ဖမ်းဆီးခံမြန်မာလုပ်သားများ လွတ်မြောက်ရေးအတွက် လိပ်ကျွန်းသို့ သွားရောက်စစ်ဆေးခဲ့ရာ ထိုကျွန်းတွင် နေထိုင်လုပ်ကိုင်သော လူအများစုက ဖမ်းဆီးခံ မြန်မာလုပ်သား ၃ ဦး သတ်ဖြတ်ခဲ့ခြင်းမဟုတ်ကြောင်း ပြောကြားခဲ့သည်ဟု သွားရောက်စစ်ဆေးရာတွင်ပါဝင်သော ရှေ့နေတစ်ဦးက ပြောသည်။
``ကိုယ့်နိုင်ငံသားတွေ အဖမ်းခံရတာဆိုတော့ ကျွန်တော်တို့ အနေနဲ့လည်း ကူညီဆောင်ရွက်ပေးရမှာပါ၊ အခုဆိုရင် မြန်မာ သံရုံးအဖွဲ့တွေနဲ့ ပူးပေါင်းဆောင်ရွက်နေပါတယ်၊ အဲဒီအမှုကိုလိုက်ဖို့ ရှေ့နေတွေ ငှားဖို့လည်း လုပ်နေပါတယ်၊ အမှုမှန် ပေါ်ပေါက်ဖို့ ဆောင်ရွက်သွားမှာပါ´´ ဟု ထိုင်းနိုင်ငံ မြန်မာစစ်သံရုံးမှ တာဝန်ရှိသူတစ်ဦးက ပြောသည်။
အဆိုပါ အမှုနှင့်ပတ်သက်ပြီး မြန်မာနိုင်ငံအစိုးရကို တင်ပြရမည်ဖြစ်သလို မြန်မာအလုပ်သမားများ မကျူးလွန်ကြောင်း ယုံကြည် သည့်အတွက် အမှုတွဲတောင်းပြီး ပြန်လည်စစ်ဆေးမည်ဖြစ်ကြောင်း၊ အောက်တိုဘာ ၆ ရက်နေ့တွင် ထိုင်းနိုင်ငံမှ ရှေ့နေများနှင့် အစည်းအဝေးလုပ်ရန် ချိန်းထားကြောင်း သိရှိရသည်။
ထိုင်းဝန်ကြီးချုပ် ဗိုလ်ချုပ်ကြီး ပရာယုဒ် ချန်အိုချာ၏ မြန်မာနိုင်ငံခရီးစဉ်အတွင်း ထိုင်းနိုင်ငံ လိပ်ကျွန်းလူသတ်မှုနှင့် ပတ်သက်ပြီး နိုင်ငံတော်သမ္မတ ဦးသိန်းစိန်မှ ထည့်သွင်းဆွေးနွေးသွားမည်ဖြစ်ကြောင်း သတင်းရရှိသည်။
နေမျိုး
No comments:
Post a Comment